അഹമ്മദാബാദ്: പൈപ്പ് വഴി ഹോട്ടലിന്റെ നാലാംനിലയില്‍ കയറിയ യുവാവ് മുറിയില്‍ അതിക്രമിച്ചുകയറി യുവതിയെ ശാരീരികമായി ഉപദ്രവിച്ചു. ഗുജറാത്തിലെ നരോദയിലാണ് സംഭവം. യുവതിയെ ഉപദ്രവിച്ച സര്‍ദാര്‍നഗര്‍ സ്വദേശി പാര്‍ത്ഥ് പട്ടേലി(31)നെ യുവതിയുടെ ഭര്‍ത്താവും ഹോട്ടല്‍ ജീവനക്കാരും ചേര്‍ന്ന് പിടികൂടി പോലീസില്‍ ഏല്‍പ്പിച്ചു.
കഴിഞ്ഞ ദിവസം പുലര്‍ച്ചെ മൂന്നരയോടെയാണ് പ്രതി ഹോട്ടലിന്റെ നാലാംനിലയിലെ മുറിയില്‍ അതിക്രമിച്ചുകയറിയത്. സംഭവസമയം യുവതിയുടെ ഭര്‍ത്താവ് പുറത്തുപോയതായിരുന്നു. ഇതിനിടെയാണ് 26 വയസുകാരിക്ക് നേരേ ആക്രമണമുണ്ടായത്. പൈപ്പ് വഴി ഹോട്ടല്‍കെട്ടിടത്തിന്റെ നാലാംനിലയിലെത്തിയ യുവാവ് ജനലിനുള്ളിലൂടെ യുവതിയുടെ മുറിയിലേക്ക് ചാടുകയായിരുന്നു. പിന്നാലെ തനിക്ക് ലൈംഗിക ബന്ധത്തിലേര്‍പ്പെടണമെന്ന് ഇയാള്‍ യുവതിയോട് ആവശ്യപ്പെട്ടു.
യുവതി ഇതിനെ എതിര്‍ത്തതിന് പിന്നാലെയാണ് ശാരീരികമായി ഉപദ്രവിച്ചത്. ഇതോടെ യുവതി ബഹളംവെച്ച് മുറിയില്‍നിന്ന് പുറത്തേക്ക് ഓടുകയായിരുന്നു. ഉടന്‍തന്നെ ഹോട്ടല്‍ ജീവനക്കാരും യുവതിയുടെ ഭര്‍ത്താവും ഓടിയെത്തി പ്രതിയെ പിടികൂടി. ഇതിനിടെ യുവതിയുടെ ഭര്‍ത്താവിനെയും പ്രതി ആക്രമിച്ചു. തുടര്‍ന്ന് ജീവനക്കാര്‍ വിവരമറിയിച്ചതനുസരിച്ച് ഹോട്ടലിലെത്തിയ പോലീസ് പ്രതിയെ കസ്റ്റഡിയിലെടുക്കുകയായിരുന്നു.
വീടിന്റെ നവീകരണം നടക്കുന്നതിനാല്‍ പരാതിക്കാരിയും ഭര്‍ത്താവും ഒന്നരമാസമായി ഹോട്ടല്‍മുറിയിലാണ് താമസം. ഹോട്ടലില്‍ താമസിക്കുന്ന യുവതിയെ പ്രതി ഏറെനാളായി നിരീക്ഷിച്ചിരുന്നു. ഇതിനുപിന്നാലെയാണ് പൈപ്പ് വഴി നാലാംനിലയിലേക്ക് വലിഞ്ഞുകയറി യുവതിയെ ഉപദ്രവിച്ചതെന്നും പോലീസ് പറഞ്ഞു.
