ഇന്ത്യൻ സിനിമയിൽ സമീപകാലത്ത് ഏറ്റവുമധികം പ്രീ റിലീസ് ഹൈപ്പോടെ എത്തുന്ന ചിത്രമാണ് ജവാൻ. തമിഴ് സംവിധായകൻ ആറ്റ്ലിയുടെയും നായികയായി എത്തുന്ന നയൻതാരയുടെയും ബോളിവുഡ് അരങ്ങേറ്റ ചിത്രമെന്ന പ്രത്യേകത ഉണ്ടെങ്കിലും ഷാരൂഖ് ഖാൻ നായകനാവുന്ന ചിത്രമെന്നതുതന്നെ ജവാൻറെ പ്രധാന ആകർഷണം. പഠാൻറെ വൻ വിജയത്തിന് ശേഷമുള്ള കിംഗ് ഖാൻ ചിത്രം എന്നതിനാൽ ബോളിവുഡിന് ഈ പ്രോജക്റ്റിന് മേലുള്ള പ്രതീക്ഷ ഏറെ വലുതാണ്. ഇപ്പോഴിതാ സമൂഹമാധ്യമമായ എക്സിൽ ആരാധകരുമായി സംവദിച്ചിരിക്കുകയാണ് ഷാരൂഖ് ഖാൻ.
She is so beautiful and such a wonderful actor. Has added immensely to her role. Hope her fans in Tamil Nadu fall in love with her all over again and Hindi audience appreciates her hard work. #Jawan https://t.co/Pbv2OxZAnZ
— Shah Rukh Khan (@iamsrk) September 3, 2023
ആസ്ക് എസ്ആർകെ ടാഗ് ചേർത്ത് ആരാധകർ ചോദിച്ചവയിൽ നിന്ന് തെരഞ്ഞെടുത്തവയ്ക്കാണ് എക്സിലൂടെത്തന്നെ കിംഗ് ഖാൻ മറുപടി പറഞ്ഞിരിക്കുന്നത്. റിലീസിന് മുൻപ് ചിത്രത്തെക്കുറിച്ച് ഒരു സ്പോയ്ലർ തരാമോ എന്നാണ് ബാബർ എന്ന ആരാധകൻറെ ചോദ്യം. താൻ ഭാര്യയുമൊത്ത് ഹോങ് കോങിൽ ചിത്രം കാണുമെന്നും ടിക്കറ്റ് ഇതിനകം ബുക്ക് ചെയ്തെന്നും ഇദ്ദേഹം പറയുന്നു. ചിത്രം കാണുമ്പോൾ ഒരു കാര്യം പ്രത്യേകം ശ്രദ്ധിക്കണമെന്നാണ് ഇതിനോടുള്ള ഷാരൂഖ് ഖാൻറെ പ്രതികരണം. സിനിമയുടെ തുടക്കം ദയവായി മിസ് ആകാതെ നോക്കൂ. സമയത്ത് എത്തൂ, എന്നാണ് എസ്ആർകെയുടെ മറുപടി. തുടക്കത്തിൽ പ്രാധാന്യമുള്ള എന്തോ ഉണ്ട് എന്ന അനുമാനത്തിലാണ് അദ്ദേഹത്തിൻറെ ആരാധകർ.
നയൻതാരയുമായുള്ള വർക്കിംഗ് എക്സ്പീരിയൻസിനെക്കുറിച്ചാണ് മറ്റൊരു ചോദ്യം. അതിനുള്ള ഷാരൂഖ് ഖാൻറെ മറുപടി ഇങ്ങനെ- സുന്ദരിയും ഗംഭീര അഭിനേതാവുമാണ് അവർ. സ്വന്തം കഥാപാത്രത്തിലേക്ക് ഒരുപാട് കാര്യങ്ങൾ കൊണ്ടുവന്നിട്ടുണ്ട് അവർ. അവരുടെ തമിഴ്നാട്ടിലെ ആരാധകർ ഒരിക്കൽക്കൂടി അവരെ സ്നേഹിക്കുമെന്ന് പ്രതീക്ഷിക്കുന്നു. ഹിന്ദി പ്രേക്ഷകർ അവരുടെ കഠിനാധ്വാനത്തെ അംഗീകരിക്കുമെന്നും, ഷാരൂഖ് ഖാൻ പറയുന്നു. അതേസമയം ചിത്രത്തിൻറെ അഡ്വാൻസ് ബുക്കിംഗ് കുതിക്കുകയാണ്. രാജ്യത്തെ പ്രധാന മൾട്ടിപ്ലെക്സ് ശൃംഖലകളായ പിവിആർ, ഐനോക്സ്, സിനിപൊളിസ് എന്നിവയിലായി ആകെ രണ്ട് ലക്ഷത്തിലധികം ടിക്കറ്റുകളാണ് ഇതിനകം വിറ്റിരിക്കുന്നത്. ഏഴാം തീയതിയാണ് റിലീസ്.
