ദില്ലി: ബോളിവുഡ് സൂപ്പർതാരം അക്ഷയ് കുമാറിന് ഇന്ത്യൻ പൗരത്വം ലഭിച്ചു. ഇത് സംബന്ധിച്ച സർക്കാർ രേഖകളുടെ ചിത്രങ്ങൾ അക്ഷയ് കുമാർ തന്നെ സോഷ്യൽ മീഡിയയിൽ പങ്കുവച്ചത്. അക്ഷയ് കുമാറിനെതിരെ നിരന്തരം ഉയർന്ന വിമർശനങ്ങളിൽ ഒന്നായിരുന്നു അക്ഷയ് കുമാർ കനേഡിയൻ പൗരനാണ് എന്നത്. അടുത്തിടെ ഇന്ത്യൻ പൗരത്വം നേടാനുള്ള നടപടികൾ പുരോഗമിക്കുന്നുവെന്ന് അക്ഷയ് വ്യക്തമാക്കിയിരുന്നു. അക്ഷയ് തൻറെ എക്സ് അക്കൌണ്ടിൽ പങ്കുവച്ച രേഖയിൽ അദ്ദേഹത്തിൻറെ പേരായ അക്ഷയ് ഹരി ഓം ഭട്യ എന്ന് കാണാം. 2019 ൽ താൻ ഇന്ത്യൻ പൗരത്വത്തിന് വേണ്ടി അപേക്ഷിച്ചിട്ടുണ്ടെന്ന് അക്ഷയ് കുമാർ പറഞ്ഞിരുന്നു. പിന്നീട് കൊവിഡ് പ്രശ്നങ്ങളാൽ അത് നീണ്ടുപോയെന്നും അക്ഷയ് കുമാർ അറിയിച്ചിരുന്നു.
മുൻപ് താൻ എന്തുകൊണ്ട് കനേഡിയൻ പൗരത്വം സ്വീകരിച്ചുവെന്ന് അക്ഷയ് വ്യക്തമാക്കിയിട്ടുണ്ട്. കുറച്ച് വർഷങ്ങൾക്കു മുൻപ് എൻറെ സിനിമകൾ വിജയിക്കുന്നുണ്ടായിരുന്നില്ല. 14- 15 സിനിമകൾ തുടർച്ചയായി പരാജയപ്പെട്ടപ്പോൾ മറ്റെവിടേക്കെങ്കിലും പോയി ജോലി ചെയ്യാമെന്ന് ആലോചിച്ചു. കാനഡയിലുള്ള ഒരു സുഹൃത്താണ് അങ്ങോട്ട് മാറാമെന്ന സാധ്യത പങ്കുവച്ചത്. ഒരുപാട് പേർ അവിടെ ജോലിക്കായി പോകുന്നുണ്ട്. പക്ഷേ അവരൊക്കെ ഇപ്പോഴും ഇന്ത്യക്കാർ തന്നെയാണ്. ഇവിടെ വിധി എനിക്ക് അനുകൂലമല്ലെങ്കിൽ എന്തെങ്കിലും പ്രവർത്തിക്കേണ്ടതുണ്ടെന്ന് ഞാൻ കരുതി. ആ സമയത്താണ് കനേഡിയൻ പൌരത്വത്തിന് അപേക്ഷിച്ചതും അത് ലഭിച്ചതും. എന്നാൽ ഇന്ത്യയിൽ വീണ്ടും വിജയം കണ്ടെത്താനായത് തൻറെ മനസിനെ മാറ്റിയെന്നും അക്ഷയ് മുൻപ് പറഞ്ഞത്.
എനിക്ക് ഒരു പാസ്പോർട്ട് ഉണ്ട്. എന്താണ് ഒരു പാസ്പോർട്ട്? ഒരു രാജ്യത്തു നിന്ന് മറ്റൊരു രാജ്യത്തേക്ക് പോകാനുള്ള രേഖയാണ് അത്. നോക്കൂ, ഞാനൊരു ഇന്ത്യക്കാരനാണ്. എൻറെ നികുതി ഞാൻ ഇവിടെയാണ് അടയ്ക്കുന്നത്. എനിക്ക് അത് അവിടെ വേണമെങ്കിലും അടയ്ക്കാനുള്ള സ്വാതന്ത്ര്യമുണ്ട്. പക്ഷേ ഞാനത് എൻറെ രാജ്യത്താണ് അടയ്ക്കാറ്. ഞാൻ എൻറെ രാജ്യത്താണ് ജോലി ചെയ്യുന്നത്. പലരും പലതും പറയാറുണ്ട്. അതിനവർക്ക് സ്വാതന്ത്ര്യവുമുണ്ട്. അവരെ സംബന്ധിച്ച് ഞാൻ ഇന്ത്യക്കാരനാണെന്ന് പറഞ്ഞാൽ മാത്രം മതി. പക്ഷേ ഞാൻ എപ്പോഴും അങ്ങനെതന്നെ ആയിരിക്കും എന്ന് അക്ഷയ് അന്ന് വ്യക്തമാക്കിയിരുന്നു.
https://twitter.com/akshaykumar/status/1691338023185809409?ref_src=twsrc%5Etfw%7Ctwcamp%5Etweetembed%7Ctwterm%5E1691338023185809409%7Ctwgr%5Ec965304812b6dd4fc9dd670009c47efd4a3a09c5%7Ctwcon%5Es1_c10&ref_url=https%3A%2F%2Fstatic.asianetnews.com%2Ftwitter-iframe%2Fshow.html%3Furl%3Dhttps%3A%2F%2Ftwitter.com%2Fakshaykumar%2Fstatus%2F1691338023185809409%3Fref_src%3Dtwsrc5Etfw
അതേ സമയം അമിത് റായ് സംവിധാനം ചെയ്തിരിക്കുന്ന ഒഎംജി 2 (ഓ മൈ ഗോഡ് 2) ആണ് അക്ഷയ് കുമാറിൻറെ അടുത്തിടെ റിലീസായ പടം. ആക്ഷേപഹാസ്യ വിഭാഗത്തിൽ പെടുന്ന ചിത്രം 2012 ൽ പുറത്തെത്തിയ ഒഎംജി- ഓ മൈ ഗോഡിൻറെ സീക്വൽ ആണ്.
