ആലപ്പുഴ: ട്രെയിൻ മാറി കയറാൻ ശ്രമിക്കുന്നതിനിടെ കാല്‍വഴുതി പാളത്തിലേക്ക് വീണ യുവതി മരിച്ചു. പാലക്കാട് മണ്ണാര്‍ക്കാട് പുല്ലശ്ശേരി ചേറുങ്ങോട്ടില്‍ രാജേഷിന്റെ ഭാര്യ മീനാക്ഷി (45) ആണു മരിച്ചത്.
വ്യാഴാഴ്ച വൈകിട്ട് 7.25ന് ആലപ്പുഴ റെയില്‍വേ സ്റ്റേഷനിലാണ് സംഭവം. എറണാകുളം -കായംകുളം പാസഞ്ചര്‍ ട്രെയിനില്‍ ആലപ്പുഴ റെയില്‍വേ സ്റ്റേഷനില്‍ വന്നിറങ്ങിയ യുവതി അതേസമയം സ്റ്റേഷനില്‍ എത്തിയ കൊച്ചുവേളി എക്സപ്രസില്‍ ഓടിക്കയറാൻ ശ്രമിക്കുന്നതിനിടെ ആ ട്രെയിൻ വിട്ടുപോയി. ഇതോടെ തിരിച്ച്‌ എറണാകുളം- കായംകുളം പാസഞ്ചറില്‍ കയറാൻ ശ്രമിക്കുന്നതിനിടെ കാല്‍വഴുതി പാളത്തിലേക്ക് വീഴുകയായിരുന്നെന്ന് റെയില്‍വേ അധികൃതര്‍ പറഞ്ഞു.
തലയ്ക്കും ഇടതു കാലിനും പരുക്കേറ്റ യുവതിയെ ആര്‍പിഎഫ് ഇടപെട്ട് ഉടൻ തന്നെ മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും രാത്രി ഒൻപതു മണിയോടെ മരണം സംഭവിക്കുകയായിരുന്നു.
