കൊളംബോ: എമേർജിംഗ് ഏഷ്യാ കപ്പിൽ പാകിസ്ഥാൻ എയെ 8 വിക്കറ്റിന് തകർത്ത് ഇന്ത്യ എ ഗ്രൂപ്പ് ബി ചാമ്പ്യൻമാർ. സായ് സുദർശൻറെ സെഞ്ചുറിയും(104*), നികിൻ ജോസിൻറെ ഫിഫ്റ്റിയും(53), രാജ്‍വർധൻ ഹംഗർഗേക്കറിൻറെ 5 വിക്കറ്റുമാണ് ഇന്ത്യക്ക് തകർപ്പൻ ജയം സമ്മാനിച്ചത്. പാകിസ്ഥാൻ എയുടെ 205 റൺസ് 36.4 ഓവറിൽ 2 വിക്കറ്റ് മാത്രം നഷ്ടത്തിൽ ഇന്ത്യ എ മറകടന്നു. സ്കോർ: പാകിസ്ഥാൻ എ- 205 (48), ഇന്ത്യ എ- 210/2 (36.4). ബി ഗ്രൂപ്പിൽ മൂന്ന് വീതം മത്സരങ്ങളിൽ ഇന്ത്യക്ക് ആറും പാകിസ്ഥാന് നാലും നേപ്പാളിന് രണ്ടും പോയിൻറ് വീതമാണുള്ളത്. യുഎഇ കളിച്ച മൂന്ന് കളിയും തോറ്റു. ബംഗ്ലാദേശാണ് സെമിയിൽ ഇന്ത്യയുടെ എതിരാളികൾ.
മറുപടി ബാറ്റിംഗിൽ ഇന്ത്യ എയ്ക്ക് രണ്ട് വിക്കറ്റുകൾ മാത്രമേ നഷ്‍ടമായുള്ളൂ. കഴിഞ്ഞ മത്സരത്തിലെ അർധസെഞ്ചുറിവീരൻ ഓപ്പണർ അഭിഷേക് ശർമ്മയെ(28 പന്തിൽ 20) മുബശിർ ഖാനും 64 പന്തിൽ 53 നേടിയ നികിൻ ജോസിനെ മെഹ്റാൻ മുംതാസും പുറത്താക്കി. ഒരറ്റത്ത് പിടിച്ചുനിന്ന ഓപ്പണർ സായ് സുദർശനും(110 പന്തിൽ 104*), ക്യാപ്റ്റൻ യഷ് ദുള്ളും(19 പന്തിൽ 21*) ഇന്ത്യ എയെ അനായാസ ജയത്തിലേക്ക് ആനയിച്ചു. തുർച്ചയായി രണ്ട് സിക്സുകളോടെയാണ് സായ് സെഞ്ചുറി തികച്ചതും ടീമിനെ വിജയിപ്പിച്ചതും തുടർച്ചയായ രണ്ടാം മത്സരത്തിലാണ് സായ് ഫോം കണ്ടെത്തുന്നത്. നേപ്പാളിനെതിരായ കഴിഞ്ഞ മത്സരത്തിൽ സായ് സുദർശൻ പുറത്താവാതെ 58* റൺസെടുത്തിരുന്നു. എമേർജിംഗ് ഏഷ്യാ കപ്പിലെ ഗ്രൂപ്പ് ഘട്ടത്തിൽ മൂന്ന് മത്സരങ്ങളും ജയിച്ച ഏക ടീം ഇന്ത്യ എയാണ്.
നേരത്തെ, ഇന്ത്യൻ യുവ ബൗളർമാർക്ക് മുന്നിൽ വിയർത്ത പാകിസ്ഥാൻ എ 48 ഓവറിൽ 205 റൺസിൽ എല്ലാവരും പുറത്താവുകയായിരുന്നു. ടോസ് നേടി ബാറ്റിംഗിന് ഇറങ്ങിയ പാക് ടീമിൻറെ പ്രതീക്ഷകളെല്ലാം ഇന്ത്യൻ യുവ ബൗളർമാർ എറിഞ്ഞുടച്ചു. ഏഴാമനായിറങ്ങി 63 പന്തിൽ 48 റൺസ് നേടിയ ഖാസിം അക്രമാണ് പാകിസ്ഥാൻറെ ടോപ് സ്കോറർ. വാലറ്റത്തിൻറെ പോരാട്ടമാണ് പാകിസ്ഥാനെ 200 കടത്തിയത്. ഇന്ത്യക്കായി രാജ്‍വർധൻ ഹംഗർഗേക്കർ 8 ഓവറിൽ 42 റൺസിന് അഞ്ച് വിക്കറ്റ് വീഴ്ത്തി. ഹംഗർഗേക്കറുടെ അഞ്ചിന് പുറമെ മാനവ് സത്താർ മൂന്നും നിഷാന്ത് സന്ധുവും റിയാൻ പരാഗും ഓരോ വിക്കറ്റും നേടി.
ഓപ്പണർ സയീം അയൂബ്(0), സഹഓപ്പണർ സഹീബ്‍സദ ഫർഹാൻ(35), മൂന്നാമൻ ഒമെർ യൂസഫ്(0), നാലാമൻ ഹസീബുള്ള ഖാൻ(27) എന്നിവർക്ക് ശേഷം കമ്രാൻ ഗുലാം 15 ഉം ക്യാപ്റ്റൻ മുഹമ്മദ് ഹാരിസ് 14 ഉം റൺസിന് പുറത്തായി. ഇതിന് ശേഷം ഏഴാമൻ ഖാസിം അക്രം(63 പന്തിൽ 48), എട്ടാമൻ മുബശിർ ഖാൻ(38 പന്തിൽ 28), ഒൻപതാമൻ മെഹ്റാൻ മുംതാസ്(26 പന്തിൽ 25*) എന്നിവരുടെ പോരാട്ടമാണ് പാകിസ്ഥാനെ കുഞ്ഞൻ സ്കോറിൽ നിന്ന് കാത്തത്. മുഹമ്മദ് വസീം ജൂനിയർ 7 പന്തിൽ 8 ഉം ഷാനവാസ് ദഹാനി 4 പന്തിൽ 4 ഉം റൺസെടുത്ത് പുറത്തായി.
