മുംബൈ: ഓട്ടോ ഡ്രൈവറുമായുള്ള തര്‍ക്കത്തെ തുടര്‍ന്ന് സ്ത്രീയെ റോഡിലൂടെ 200 മീറ്ററോളം വലിച്ചിഴച്ചു. മഹാരാഷ്ട്രയിലെ കോലാപുരില്‍ കഴിഞ്ഞ ദിവസമായിരുന്നു സംഭവം. സ്ത്രീയെ വലിച്ചിഴയ്ക്കുന്നതിന്റെ സിസി ടിവി ദൃശ്യങ്ങള്‍ സമൂഹമാധ്യമങ്ങളില്‍ പ്രചരിച്ചതോടെയാണു സംഭവം പുറംലോകം അറിഞ്ഞത്.
സംഭവത്തില്‍ കേസെടുത്ത പോലീസ് പ്രതിയായ ഡ്രൈവര്‍ക്കായി തിരച്ചില്‍ ആരംഭിച്ചു. സ്ത്രീയെ വലിച്ചിഴയ്ക്കുന്നതു കണ്ട് ഒരു ബൈക്ക് യാത്രികന്‍ വാഹനം നിര്‍ത്താന്‍ ആവശ്യപ്പെടുന്നുണ്ടെങ്കിലും ഡ്രൈവര്‍ നിര്‍ത്താതെ പോകുന്നതു വിഡിയോയില്‍ കാണാം. ഓട്ടോറിക്ഷയില്‍ സ്ത്രീയുടെ വസ്ത്രം കുടുങ്ങിയിട്ടുണ്ടെന്ന് അറിഞ്ഞിട്ടും വാഹനം നിര്‍ത്താന്‍ ഡ്രൈവര്‍ തയാറായില്ല എന്നതാണ് സംശയത്തിനു കാരണമായത്.
നേരത്തെ സമാനമായ സംഭവം ഡല്‍ഹിയില്‍ നിന്നും റിപ്പോര്‍ട്ട് ചെയ്തിരുന്നു. പുതുവത്സര തലേന്ന് കാറില്‍ പത്തുകിലോമിറ്ററോളം വലിച്ചിഴയ്ക്കപ്പെട്ട യുവതി ഒടുവില്‍ മരിച്ചു. സംഭവത്തെ തുടര്‍ന്ന് ട്രാഫിക് സുരക്ഷ ഉറപ്പുവരുത്തണമെന്ന ആവശ്യം ശക്തമായിരുന്നു.
