ഇന്ന് അന്താരാഷ്ട്ര യോഗ ദിനം; ശരീരത്തിനും മനസിനും ആരോഗ്യം പകരുന്ന യോഗയെക്കുറിച്ച് അറിയേണ്ടതെല്ലാം
ശാരീരികവും മാനസികവുമായ ആരോഗ്യം നിലനിര്‍ത്താന്‍ ഇന്ത്യയുടെ സംഭാവനയാണ് യോഗ. ഫിറ്റ്‌നസ് നിലനിര്‍ത്തുന്നു എന്നതോടൊപ്പം ശക്തിയും വഴക്കവും വികസിപ്പിക്കുകയും ചെയ്യുന്നു യോഗ. ജൂണ്‍ 21 ന് ലോക യോഗ ദിനമായി ലോകമെമ്പാടും ആചരിക്കുന്നു. യോഗയുടെ പ്രാധാന്യത്തെക്കുറിച്ചും ജനങ്ങളുടെ ആരോഗ്യത്തില്‍ ചെലുത്തുന്ന സ്വാധീനത്തെക്കുറിച്ചും ബോധവല്‍ക്കരണത്തിനായി ചരിത്രത്തിന്റെ താളുകളില്‍ ഈ ദിനം രേഖപ്പെടുത്തപ്പെട്ടു.
ചരിത്രം
2014 സെപ്തംബര്‍ 27 ന് ഐക്യരാഷ്ട്രസഭ പൊതുസഭയില്‍ നടത്തിയ പ്രസംഗത്തില്‍ ഇന്ത്യന്‍ പ്രധാനമന്ത്രി നരേന്ദ്ര മോദിയാണ് അന്താരാഷ്ട്ര യോഗ ദിനം എന്ന ആശയം ആദ്യമായി നിര്‍ദേശിച്ചത്. ഉത്തരാര്‍ധ ഗോളത്തിലെ വര്‍ഷത്തിലെ ഏറ്റവും ദൈര്‍ഘ്യമേറിയ ദിവസമായതിനാലാണ് ഈ തീയതി തിരഞ്ഞെടുത്തത്. ഈ പ്രാരംഭ നിര്‍ദേശത്തിന് ശേഷം, യു.എന്‍ അതേ വര്‍ഷം തന്നെ യോഗ ദിനം എന്ന പേരില്‍ കരട് പ്രമേയം അംഗീകരിച്ചു.
2014 ഡിസംബര്‍ 11ന് ഇന്ത്യയുടെ സ്ഥിരം പ്രതിനിധി അശോക് മുഖര്‍ജി ഐക്യരാഷ്ട്രസഭയുടെ പൊതുസഭയില്‍ പ്രമേയത്തിന്റെ കരട് അവതരിപ്പിച്ചു. 177 അംഗരാജ്യങ്ങളില്‍ നിന്ന് പിന്തുണ ലഭിച്ചു. നിരവധി ആഗോള നേതാക്കളുടെയും പിന്തുണ ലഭിച്ചു. ഒരു വര്‍ഷത്തിനുശേഷം, 2015 ജൂണ്‍ 21ന് ലോകമെമ്പാടും ആദ്യത്തെ അന്താരാഷ്ട്ര യോഗ ദിനം ആചരിച്ചു.
പ്രാധാന്യം
യോഗ പരിശീലിക്കുന്നതിന്റെ നിരവധി നേട്ടങ്ങളെക്കുറിച്ച് ലോകമെമ്പാടും അവബോധം വളര്‍ത്താനാണ് ഈ ദിനം ലക്ഷ്യമിടുന്നത്. ഇന്ന്, യോഗ ലോകമെമ്പാടും വിവിധ രൂപങ്ങളില്‍ പരിശീലിക്കപ്പെടുന്നു, ഓരോ വര്‍ഷം കഴിയുന്തോറും കൂടുതല്‍ പ്രചാരം നേടുന്നു. യോഗ എന്നത് വ്യായാമം മാത്രമല്ല, ലോകവുമായും പ്രകൃതിയുമായും ഐക്യം കണ്ടെത്താനുള്ള ഒരു മാര്‍ഗമാണ്.
വേദകാലം മുതലാണ് യോഗ ഇന്ത്യയില്‍ ആരംഭിച്ചത്. വര്‍ഷങ്ങളായി ഇത് ഇന്ത്യക്കാരുടെ ജീവിതശൈലിയുടെ ഭാഗമാണ്. ശാരീരിക ഘടകങ്ങളുടെയും മാനവികതയുടെ ആത്മീയ ഉന്നമനത്തിന്റെയും ഗുണങ്ങളുള്ള ഇന്ത്യന്‍ സംസ്‌കാരത്തിന്റെയും നാഗരികതയുടെയും ഒരു പ്രധാന ഭാഗമാണ് യോഗ. അറിവ്, കര്‍മം, ഭക്തി എന്നിവയുടെ ഉത്തമമായ സംയോജനമാണിത്.
യോഗയുടെ ശാരീരികവും ആത്മീയവുമായ നിരവധി ഗുണങ്ങളെക്കുറിച്ച് ലോകജനതയിലേക്ക് അവബോധം സൃഷ്ടിക്കുക എന്നതാണ് ‘അന്താരാഷ്ട്ര യോഗ ദിന’ത്തിന്റെ ലക്ഷ്യം. എല്ലാ വര്‍ഷവും ഈ പരിപാടിക്ക് വ്യത്യസ്ത പ്രമേയം ഉണ്ട്. ‘മാനവികത’ എന്നതാണ് 2023 ലെ അന്താരാഷ്ട്ര യോഗ ദിനത്തിന്റെ തീം.
