കൊല്‍ക്കത്ത: പശ്ചിമ ബംഗാളിലെ പഞ്ചായത്ത് തെരഞ്ഞെടുപ്പുമായി ബന്ധപ്പെട്ട സംഘര്‍ഷവും അക്രമവും തുടരുന്നു. നാമനിര്‍ദേശപത്രിക സമര്‍പ്പിക്കേണ്ട അവസാന ദിവസമായ വ്യാഴാഴ്ച മൂന്ന് പേര്‍ വെടിയേറ്റ് മരിച്ചു.
സൗത്ത് 24 പര്‍ഗാനാസ് ജില്ലയില്‍ രണ്ടും നോര്‍ത്ത് ദിനാജ്പുരില്‍ ഒരാളുമാണ് മരിച്ചത്. മൂന്നുപേരും ഇടതുപക്ഷ- അനുയായികളാണെന്നും നോര്‍ത്ത് ദിനാജ്പുര്‍ ജില്ലയിലെ ചോപ്ര ബ്ലോക്ക് ഓഫിസില്‍ നാമനിര്‍ദേശ പത്രിക സമര്‍പ്പിക്കാൻ പോകുന്നതിനിടെയാണ് വെടിവെപ്പുണ്ടായതെന്നും സി.പി.എം സംസ്ഥാന സെക്രട്ടറി മുഹമ്മദ് സലീം പറഞ്ഞു.
തൃണമൂല്‍ കോണ്‍ഗ്രസ് ഗുണ്ടകളാണ് അക്രമം നടത്തിയതെന്ന് സി.പി.എം ആരോപിച്ചു. ബിര്‍ഭും ജില്ലയിലും മറ്റിടങ്ങളിലും സംഘര്‍ഷമുണ്ടായി.ജൂലൈ എട്ടിനാണ് പശ്ചിമ ബംഗാളില്‍ പഞ്ചായത്ത് തെരഞ്ഞെടുപ്പ്.സംഭവത്തില്‍ സംസ്ഥാന തെരഞ്ഞെടുപ്പ് കമീഷൻ പ്രതികരിച്ചിട്ടില്ല.
