കാസര്‍ഗോട്: കനത്ത ചൂടില്‍ മുന്തിരി വിളയില്ല എന്നാണ് പറയാറ്. എന്നാല്‍, കാസര്‍ഗോട്ടെ കാലാവസ്ഥയിലും മുന്തിരി വിളയിക്കാമെന്നു തെളിയിക്കുകയാണ് പിലിക്കോട് എരവില്‍ സ്വദേശിനി കെ.വി. ചന്ദ്രമതി (55) എന്ന വീട്ടമ്മ. വീട്ടുമുറ്റത്ത് കായ്ച്ചു നില്‍ക്കുന്ന മുന്തിരിയുടെ മധുരം നുകരാന്‍ വിരുന്നുകാരെത്തുകയാണ്. നാലുവര്‍ഷം മുമ്പ് ഒരു വിനോദയാത്രയ്ക്ക് പോയപ്പോഴാണ് കൃഷി സ്‌നേഹിയായ ചന്ദ്രമതി 50 രൂപ കൊടുത്തു ഒരു വള്ളി വാങ്ങിയത്. ഒരു കൗതുകത്തിലാണ് വാങ്ങിയെങ്കിലും വെള്ളം നനച്ചും ജൈവവളം പ്രയോഗിച്ചും പരിപാലിച്ചു പരീക്ഷണ കൃഷിയിറക്കി.
തൈകള്‍ തളിര്‍ത്തു വന്നതോടെ ചാണകപ്പൊടി, എല്ലുപൊടി, വേപ്പിന്‍ പിണ്ണാക്ക് തുടങ്ങിയവയും അടുക്കള മാലിന്യങ്ങളും വളമായിട്ടു. ഇതോടെ എട്ടാം മാസം മുതല്‍ മുന്തിരി വിളയാന്‍ തുടങ്ങി. മുന്തിരി കായ്ക്കാന്‍ തുടങ്ങിയിട്ട് നാലുവര്‍ഷം ആയെങ്കിലും ഇക്കുറിയാണ് ഏറ്റവും കൂടുതല്‍ വിളവെടുത്തത്. അസുഖം കാരണം വീട്ടിനുള്ളില്‍ മാത്രം കഴിയേണ്ട അവസ്ഥ വന്ന കാലത്താണ് മാനസിക ഉല്ലാസത്തിനായി പച്ചക്കറി കൃഷി ആരംഭിച്ചത്. അങ്ങനെയാണ് ഒരു പരീക്ഷണം എന്ന നിലയില്‍ മുന്തിരിവള്ളി വീട്ടുമുറ്റത്ത് വളര്‍ത്തിയതെന്ന് ഇവര്‍ പറഞ്ഞു.
മുന്തിരിയെ കൂടാതെ പയര്‍, കോവയ്ക്ക, വഴുതന, തക്കാളി, ബീറ്റ് റൂട്ട്, കാരറ്റ് തുടങ്ങിയ പച്ചക്കറികളും വീട്ടുവളപ്പില്‍ കൃഷി ചെയ്യുന്നുണ്ട്. ഉള്ളിയും ഉരുളക്കിഴങ്ങും മാത്രമാണ് കടയില്‍ നിന്ന് വാങ്ങാറുള്ളത്. മകള്‍ സജിനയും ഭര്‍ത്താവ് സുമേഷും ഇവര്‍ക്ക് വേണ്ട എല്ലാ സഹായവും ചെയ്യുന്നുണ്ട്. മുന്തിരി കൃഷിയില്‍ വിജയം കണ്ടതോടെ ഇനി ആപ്പിളും ഉറുമാമ്പഴവും റമ്പൂട്ടാനും സപ്പോട്ടയും കൃഷി ചെയ്യാനുള്ള ഒരുക്കത്തിലാണ് ചന്ദ്രമതി. കറുത്ത മുന്തിരി വിളഞ്ഞുനില്‍ക്കുന്ന ചന്ദ്രമതിയുടെ വീട്ടുമുറ്റം ഇപ്പോള്‍ നാട്ടുകാര്‍ക്ക് കൗതുക കാഴ്ചയാണ്.
