ടൈഗേഴ്സ് ലീപ് എന്നറിയപ്പെടുന്ന ടൈഗർ പോയിന്റാണ് ഇവിടെ കണ്ടിരിക്കേണ്ട ആദ്യത്തെ ഇടം. 650 മീറ്റർ ഉയരത്തിൽ നിന്നുള്ള ഇവിടുത്തെ കാഴ്ചകൾ അത്ഭുതപ്പെടുത്തുന്നവയാണ്. കാടുകളും വെള്ളച്ചാട്ടവും തടാകവും ഒക്കെ കാണുന്ന ഈ വ്യൂ പോയിന്റ് ഒരു കാരണവശാലും ഒഴിവാക്കുവാന്‍ പാടില്ലാത്ത ഒന്നാണ്. ഒരു കടുവയുടെ രൂപത്തോട് തോന്നിപ്പിക്കുന്ന സാദൃശ്യമാണ് ഈ സ്ഥലത്തിന് ഇങ്ങനെയൊരു പേര് വരാൻ കാരണം.
പ്രകൃതി സ്നേഹികൾ തീർച്ചയായും കണ്ടിരിക്കേണ്ട ഒരിടമാണ് ഇവിടുത്തെ ലയൺസ് പോയിന്റ്.അഗാധമായ താഴ്വരകളുടെയും വെള്ളച്ചാട്ടങ്ങളുടെയും ഒരു പഞ്ഞവുമില്ലാത്ത കാഴ്ചകൾ ഒരു ക്യാന്‍വാസിലെന്ന പോലെ ഇവിടെ നിന്നും കാണാൻ കഴിയും.
ഉയരത്തിന്റെ കാര്യത്തിൽ 14-ാം സ്ഥാനത്തു നിൽക്കുന്ന വെള്ളച്ചാട്ടമാണ് ലോനാവാലയ്ക്ക് സമീപത്തുള്ള കുനെ വെള്ളച്ചാട്ടം. 650 അടി ഉയരത്തിൽ നിന്നും പതിക്കുന്ന ഈ വെള്ളച്ചാട്ടം കണ്ണുകൾക്ക് വിരുന്നൊരുക്കുന്ന ഒന്നാണ്. ഇരട്ട മലനിരകളായ ലോനാവാലയ്ക്കും ഖണ്ഡാവാലയ്ക്കും നടുവിലായാണ് ഇത് സ്ഥിതി ചെയ്യുന്നത്.
മുംബൈ പട്ടണത്തില്‍ നിന്നും പൂണെയില്‍ നിന്നും ഏകദേശം നൂറു കിലോമീറ്റര്‍ ദൂരം വരുന്ന ഈ സ്ഥലത്തേക്ക് റോഡു മാര്‍ഗ്ഗവും, തീവണ്ടി മാര്‍ഗ്ഗവും വിമാന മാര്‍ഗ്ഗവും എത്തിച്ചേരാം.മുംബൈ -പൂണെ തീവണ്ടിപ്പാതയിലെ പ്രധാന സ്റ്റേഷനുകളിൽ ഒന്നാണ് ലോണാവാല. മുംബൈ -പൂണെ എക്സ്പ്രസ്സ്‌ വേയും മുംബൈ -പൂണെ ഹൈ വേയും ലോണാവാലയില്‍ കൂടി കടന്നു പോകുന്നു.വിമാനത്തിലാണ് നിങ്ങളുടെ യാത്രയെങ്കില്‍ പൂണെയാണ് ലോണാവാലക്ക് ഏറ്റവും അടുത്ത് കിടക്കുന്ന വിമാനത്താവളം.
