ന്യൂഡല്‍ഹി: വൃദ്ധ ദമ്പതിമാര്‍ കൊല്ലപ്പെട്ട സംഭവത്തില്‍ മരുമകള്‍ അറസ്റ്റില്‍. ഡല്‍ഹി ഗോകുല്‍പുരി സ്വദേശികളായ രാധേശ്യാം വര്‍മ(72) ഭാര്യ വീണ(68) എന്നിവര്‍ കൊല്ലപ്പെട്ട കേസിലാണ് മകന്റെ ഭാര്യ മോണിക്കയെ പോലീസ് അസ്റ്റ് ചെയ്തത്. മോണിക്കയുടെ കാമുകനും മറ്റൊരാളും ചേര്‍ന്നാണ് കൃത്യം നടത്തിയതെന്നും ഒളിവില്‍പ്പോയ ഇവര്‍ക്കായി തിരച്ചില്‍ തുടരുകയാണെന്നും പോലീസ് പറഞ്ഞു.
ഇതോടെ സ്വത്ത് തര്‍ക്കമാണ് കൊലപാതകത്തിന് കാരണമായതെന്ന നിഗമനത്തില്‍ പോലീസെത്തി. മകന്‍ രവിയും ഭാര്യ മോണിക്കയും ഇവരുടെ മകനും വീട്ടിലെ മുകള്‍നിലയിലാണ് കിടന്നിരുന്നത്. ഞായറാഴ്ച രാത്രി പത്തരയ്ക്കാണ് താന്‍ മാതാപിതാക്കളെ അവസാനമായി കണ്ടതെന്നു മകന്‍ മൊഴി നല്‍കിയിരുന്നു. തുടര്‍ന്ന് വീട്ടുകാരെ കേന്ദ്രീകരിച്ച് നടത്തിയ അന്വേഷണത്തിലാണ് മോണിക്കയാണ് കൊലപാതകത്തിന് പിന്നിലെന്ന് പോലീസ് കണ്ടെത്തിയത്.
ഞായറാഴ്ച രാത്രി ഏഴുമണിയോടെയാണ് മോണിക്കയുടെ കാമുകനും കൂട്ടാളിയും ഇവരുടെ വീട്ടിലെത്തിയത്. തുടര്‍ന്ന് മോണിക്ക ഇരുവരെയും വീടിന്റെ ടെറസില്‍ ഒളിപ്പിച്ചു. വീട്ടിലെ എല്ലാവരും ഉറങ്ങാന്‍ പോയെന്ന് ഉറപ്പിച്ചതിന് പിന്നാലെ് പ്രതികള്‍ മുറിയിലെത്തി ദമ്പതിമാരെ ആക്രമിച്ചതെന്നും കഴുത്തറുത്താണ് ഇരുവരെയും കൊലപ്പെടുത്തിയതെന്നും പോലീസ് പറഞ്ഞു.
