ഡല്‍ഹി മെട്രോ പലപ്പോഴും വിചിത്രമായ പല സംഭവങ്ങള്‍ കൊണ്ടും വാര്‍ത്തയില്‍ ഇടം നേടാറുണ്ട്. അനൗണ്‍സ്‌മെന്റിന് പകരം പാട്ട് വച്ചതും അനുചിതമെന്ന് തോന്നുന്ന തരത്തില്‍ വസ്ത്രം ധരിച്ച് പെണ്‍കുട്ടി കയറിയതും ഒക്കെ അതില്‍ പെടുന്നു. എന്നാല്‍, ഇപ്പോള്‍ വൈറലാവുന്നത് മെട്രോയില്‍ വച്ച് സീറ്റിന് വേണ്ടി വഴക്കുണ്ടാക്കുന്ന യാത്രക്കാരാണ്.
രണ്ട് പുരുഷന്മാരായ യാത്രക്കാരാണ് സീറ്റിന് വേണ്ടി മെട്രോയില്‍ വച്ച് വഴക്കുണ്ടാക്കുന്നത്. അതേ മെട്രോയില്‍ സഞ്ചരിച്ച മറ്റൊരു യാത്രക്കാരനാണ് സംഭവം വീഡിയോയില്‍ പകര്‍ത്തിയത്. അധികം വൈകാതെ തന്നെ വീഡിയോ സാമൂഹിക മാധ്യമങ്ങളില്‍ വൈറലാവുകയും ചെയ്തു.
Verbal kalesh Inside Delhi metro over Seat issue pic.twitter.com/YRwF5zLqSD
— Ghar Ke Kalesh (@gharkekalesh) April 4, 2023
‘Ghar Ke Kalesh’ എന്ന അക്കൗണ്ടിലാണ് വീഡിയോ ട്വിറ്ററില്‍ ഷെയര്‍ ചെയ്തിരിക്കുന്നത്. അതില്‍ അടിക്കുറിപ്പില്‍ സീറ്റിന് വേണ്ടി നടന്ന വഴക്കാണ് എന്ന് വ്യക്തമാക്കിയിട്ടുണ്ട്. 27 സെക്കന്റ് വരുന്ന വീഡിയോയില്‍ മുഴുവന്‍ നേരവും ഇരുവരും സീറ്റിന്റെ പേരില്‍ വഴക്കടിക്കുക തന്നെയാണ്. രണ്ടുപേരും പരസ്പരം വഴക്കടിക്കുക മാത്രമല്ല ഭീഷണിപ്പെടുത്തുക കൂടി ചെയ്യുന്നുണ്ട്. മെട്രോയില്‍ ഉണ്ടായിരുന്ന മറ്റ് യാത്രക്കാര്‍ ഇരുവരേയും ശാന്തരാക്കാന്‍ ശ്രമിക്കുന്നുണ്ട് എങ്കിലും ഇരുവരും അതൊന്നും കേള്‍ക്കാന്‍ തയ്യാറാകുന്നില്ല.
വീഡിയോ കണ്ട ആളുകള്‍ സത്യത്തില്‍ രോഷാകുലരായി. എന്ത് തരം പെരുമാറ്റം ആണിത് എന്നാണ് മിക്കവരും ചോദിച്ചത്. ഒരു സീറ്റിന് വേണ്ടി ഇങ്ങനെ പൊതുസ്ഥലത്ത് വഴക്ക് കൂടാന്‍ നാണമാവുന്നില്ലേ എന്നും പലരും ചോദിച്ചു. അതേസമയം, മെട്രോയില്‍ ഇത്തരം സംഭവങ്ങള്‍ ഉണ്ടാകാതിരിക്കാന്‍ കര്‍ശനമായ നിയമങ്ങള്‍ തന്നെ ആവശ്യമാണ് എന്നാണ് ഒരു പടി കൂടി കടന്ന് മറ്റ് ചിലര്‍ അഭിപ്രായപ്പെട്ടത്.
