ഫ്രാന്‍സിസ് നോറോണ മറ്റൊരു  പെരുമാള്‍ മുരുകനാകാന്‍ പാടില്ല.

മലയാള സാഹിത്യത്തിന്‍റെ നവഭാവുകത്വത്തിന് വഴിയൊരുക്കുന്നത് ഒന്നോ രണ്ടോ എഴുത്തുകാരോ ഏതെങ്കിലും പ്രത്യേക ധാരയോ അല്ല. അത് വ്യത്യസ്ത ശീലുകളിലും ഭാഷാവൈവിധ്യങ്ങളിലും സംഭവിക്കുന്നതാണ്. അത്തരത്തില്‍ അത്രയേറെ ശ്രദ്ധിക്കപ്പെട്ട  എഴുത്തുകാരനാണ് ഫ്രാന്‍സിസ് നോറോണ.അദ്ദേഹമാണ് ഇനിയങ്ങോട്ടുള്ള ഔദ്യോഗിക ജീവിതവും എഴുത്തും എളുപ്പമല്ലെന്ന് കണ്ട് തീവ്രവേദനയോടെ ഏക ഉപജീവനമാര്‍ഗമായ സര്‍ക്കാര്‍ ജോലിയില്‍ നിന്ന് മുന്‍കൂട്ടി പിരിഞ്ഞത്.

 കക്കുകളി  നാടകത്തിലാണ് വിവാദം ആരംഭിക്കുന്നത്. നോറോണയുടെ കഥ അടിസ്ഥാനമാക്കി രചിച്ച നാടകം കേരളത്തിലെ ഏതാണ്ട് എല്ലാജില്ലകളിലും അരങ്ങേറിയതിനു ശേഷമാണ് തൃശൂര്‍ രൂപതക്ക് നാടകം സഭക്കെതിരാണെന്ന തോന്നലുണ്ടാക്കുന്നത്. ഈ നാടകത്തിന് കെസിബിസി യുടെ പുരസ്ക്കാരവും കിട്ടിയിട്ടുണ്ടെന്ന് നാടകകൃത്ത് പറയുന്നു .

ഇപ്പോള്‍ നോറോണയുടെ മാസ്റ്റര്‍ പീസ് എന്ന നോവലിന്‍റെ പേരിലും വിവാദവും പരാതിയും കേസുമാണ്. ഒരെഴുത്തുകാരന്‍റെ എഴുത്തെന്നു പറയുന്നത് അയാളുടെ അനുഭവമണ്ഡലത്തിന്‍റെ ഓര്‍മ്മകളുടെ സര്‍ഗാവിഷ്ക്കാരമാണ്.ആ ആവിഷ്ക്കാരത്തിന് എഴുത്തുകാര്‍ക്ക് സ്വാതന്ത്ര്യം ലഭിക്കുമ്പോഴാണ് അവരിലൂടെ സമൂഹം സംസാരിച്ചു തുടങ്ങുന്നതും കൃതികള്‍  സമൂഹത്തിന്‍റെ കണ്ണാടികള്‍ ആകുന്നതും. അതിന് ധാരാളം അവസരങ്ങള്‍ ഉണ്ടായ സമൂഹമാണ് കേരളം. അസഹിഷ്ണുതകളെ നാം ചെറുത്ത് തോല്പിച്ചിട്ടുമുണ്ട്. പേരുകള്‍ എടുത്ത് പറയുന്നില്ല. സക്കറിയയുടെ കണ്ണാടികാണ്മോളം എന്ന കഥ വന്ന കാലത്തെ ബഹളം മാത്രം പരാമര്‍ശിക്കുന്നു. അന്നൊന്നും എഴുത്തുകാരെ കൊലപാതകഭീതി ഗ്രസിച്ചിരുന്നില്ല.ഇന്നതുമുണ്ട്.

 വിയോജിക്കാനുള്ള സ്വാതന്ത്ര്യം ഉള്ളപ്പോൾ തന്നെ വിയോജിപ്പിനെ സംരക്ഷിക്കാനുള്ള സ്വാതന്ത്ര്യവും നമുക്കോരോരുത്തർക്കും ഉണ്ട്.

ഫ്രാന്‍സിസ് നൊറോണയുടെ കുറിപ്പ്