തൊടുപുഴ: പെരുമ്പിള്ളിച്ചിറ കുരിശുപള്ളിക്ക് സമീപം നാല്‍പ്പതയടിയോളം താഴ്ചയുള്ള കിണറ്റില്‍ വീണ സ്‌കൂള്‍ വിദ്യാര്‍ഥിയെ അഗ്നിരക്ഷാ സേന രക്ഷപ്പെടുത്തി. ആറാം ക്ലാസ് വിദ്യാര്‍ഥിയായ ലിജോയാണ് കിണറ്റില്‍ വീണത്. ഇന്നലെ വൈകിട്ട് 3.45 ഓടെയാണ് സംഭവം.
കുട്ടി സ്‌കൂള്‍ വിട്ട് വീട്ടിലേക്ക് വരുന്ന വഴി അബദ്ധത്തില്‍ ചുറ്റുമതില്‍ ഇല്ലാതെ കാടുപിടിച്ച് കിടന്ന സ്വകാര്യ വ്യക്തിയുടെ കിണറ്റില്‍ വീഴുകയായിരുന്നു. കുട്ടി വീഴുന്നത് കണ്ട് നാട്ടുകാര്‍ ഉടന്‍ ഓടിയെത്തി കിണറ്റിലേക്ക് കയറിട്ടുകൊടുത്തു. പത്തടിയോളം വെള്ളമുണ്ടായിരുന്ന കിണറ്റില്‍ ഈ കയറില്‍ പിടിച്ചു കുട്ടി ധൈര്യം കൈവിടാതെ നില്‍ക്കുകയായിരുന്നു.
ഇതിനിടെ വിവരമറിഞ്ഞ് അഗ്നിരക്ഷാ സേനയെത്തി വലയും കയറും ഉപയോഗിച്ച് കുട്ടിയെ പുറത്തെത്തിക്കുകയായിരുന്നു. അസി. സ്റ്റേഷന്‍ ഓഫീസര്‍ എം.എച്ച്. അബ്ദുല്‍ സലാം, ഫയര്‍ ഓഫീസര്‍മാരായ ടി.ഇ. അലിയാര്‍, ടി.പി. ഷാജി, കെ.ബി. ജനീഷ്‌കുമാര്‍, ജെയിംസ് നോബിള്‍, രഞ്ജി കൃഷ്ണന്‍, സ്റ്റോജന്‍ ബേബി, സുനില്‍ എം. കേശവന്‍ എന്നിവര്‍ രക്ഷാപ്രവര്‍ത്തനത്തിന് നേതൃത്വം നല്‍കി.
