കൗമാരക്കാരുടെ എക്കാലത്തെയും പേടി സ്വപ്‌നമാണ് മുഖക്കുരു. മുഖത്ത് കുരുക്കള്‍ പൊന്തുന്നത് പലപ്പോഴും കറുത്തപാടുകള്‍ രൂപപ്പെടുന്നതിന് കാരണമാകാറുണ്ട്. നല്ല പാടുകളില്ലാത്ത ക്ലിയര്‍ സ്‌കിന്‍ നേടിയെടുക്കുന്നതിനായി എന്തെല്ലാം കാര്യങ്ങള്‍ചെയ്യാമെന്നും ഇതിന് എന്തെല്ലാം ശ്രദ്ധിക്കണമെന്നും നോക്കാം.
മുഖക്കുരുവും കാരണങ്ങളും
പല കാരണത്താല്‍ നമ്മളുടെ മുഖത്ത് കുരുക്കള്‍ പ്രത്യക്ഷപ്പെടാറുണ്ട്. ആര്‍ത്തവകാലം അടുക്കുമ്പോള്‍ പലപ്പോഴും പല പെണ്‍കുടടികള്‍ക്കും മുഖത്ത് കുരുക്കള്‍ പ്രത്യക്ഷപ്പെടുന്നു. ഇതിന്റെ പ്രധാന കാരണം ഹോര്‍മോണ്‍ വ്യതിയാനം തന്നെ.
അതുപോലെ, ചര്‍മ്മം കൃത്യമായി സൂക്ഷിച്ചില്ലെങ്കില്‍, ശരീരത്തില്‍ നിന്നും വിഷം പുറത്തേക്ക് കൃത്യമായി പോയില്ലെങ്കില്‍ എല്ലാം തന്നെ മുഖത്ത് കുരുക്കള്‍ പ്രത്യക്ഷപ്പെടാറുണ്ട്. ചിലര്‍ക്ക് പിസിഒഡി, പിസിഒഎസ് പോലെയുള്ള അവസ്ഥകള്‍ വരുമ്പോഴും മുഖത്ത് നിറയെ കുരുക്കള്‍ പൊന്തുന്നത് കാണാം.
അമിതമായി എണ്ണമയം ഇരിക്കുന്നത്, വറുത്തതും പൊരിച്ചതുമായ ആഹാരങ്ങള്‍ കഴിക്കുന്നതുമെല്ലാം തന്നെ നിങ്ങളുടെ ചര്‍മ്മത്തിന്റെ ആരോഗ്യത്തെ കാര്യമായി ബാധിക്കുന്നുണ്ട് എന്ന് പറയാം.
ശ്രദ്ധിക്കേണ്ട കാര്യം
മുഖത്ത് കുരു പ്രത്യക്ഷപ്പെടാതിരിക്കാനും ചര്‍മ്മത്തിന്റെ ആരോഗ്യം കാക്കുന്നതിനും ശ്രദ്ധിക്കേണ്ട കുറച്ച് കാര്യങ്ങളുണ്ട്. അതില്‍ പ്രധാനപ്പെട്ടതാണ് മുഖം നല്ലപോലെ വൃത്തിയാക്കി കൊണ്ടു നടക്കുക എന്നത്.
ഇടയ്ക്കിടയ്ക്ക് മുഖം ക്ലെന്‍സ് ചെയ്യുന്നതും സ്‌ക്രബ് ചെയ്ത് മോയ്സ്ച്വറൈസര്‍ പുരട്ടുന്നതും നല്ലതാണ്. അതുപോലെ, ആഹാര കാര്യത്തിലും കുറച്ച് ശ്രദ്ധ നല്‍കു്നനത് നല്ലതായിരക്കും.
നല്ലപോലെ പഴം പച്ചക്കറികള്‍ കഴിക്കുന്നത് ചര്‍മ്മത്തിന് തിളക്കം നല്‍കുന്നതിനും ആരോഗ്യം നിലനിര്‍ത്തുന്നതിനും സഹായിക്കുന്നുണ്ട്. അതുപോലെ, നന്നായി എരിവ്, ഉപ്പ് എന്നിവ ആഹാരത്തില്‍ നിന്നും ഒഴിവാക്കുക. അമിതമായി എണ്ണമയമുള്ള ആഹാരങ്ങള്‍ ഒഴിവാക്കുന്നതും നല്ലതായിരിക്കും.
പരമാവധി ആഹാര സാധനങ്ങള്‍ വറുക്കാതേയും പൊരിക്കാതേയും കഴിക്കാന്‍ശ്രദ്ധിക്കുന്നത് നല്ലതാണ്. അമിതമായി പൊരിച്ചതും വറുത്തതും കഴിക്കുന്നത് മുഖത്ത് കുരു പ്രത്യക്ഷപ്പെടുന്നതിന് കാരണമാണ്.
ഫേയ്സ്പാക്ക്
മുഖം ക്ലിയറാക്കി നിലനിര്‍ത്തുന്നതിന് നമുക്ക് വീട്ടില്‍ തന്നെ ചെയ്യാവുന്ന ചില ഫേയ്സ്പാക്കുകളുണ്ട്. ഇത് സ്ഥിരമാക്കിയാല്‍ മുഖത്ത് പാടുകള്‍ വരികയില്ല. അതുപോലെ തന്നെ, മുഖക്കുരു അകറ്റാനും ചര്‍മ്മം ക്ലിയറാക്കാനും ഇത് സഹായിക്കുന്നുണ്ട്. അവ ഏതെല്ലാമെന്ന് നോക്കാം.
തൈര്- മഞ്ഞള്‍ ഫേയ്സ്പാക്ക്
നിങ്ങള്‍ക്ക് വീട്ടില്‍ തന്നെ തയ്യാറാക്കി എടുക്കാവുന്ന ഒരു ഫേയ്സ്പാക്കാണിത്. കുറച്ച് തൈര് എടുക്കുക. ഇതിലേയ്ക്ക് മഞ്ഞള്‍പ്പൊടിയും ചേര്‍ത്ത് മിക്സ് ചെയ്ത് മുഖത്ത് പുരട്ടാവുന്നതാണ്. കുറച്ച് ഉണങ്ങിത്തുടങ്ങുമ്പോള്‍ ഇത് കഴുകി കളയുക. തൈരിന്റെ കൂടെ കടലപ്പൊടി ചേര്‍ക്കുന്നതും നല്ലതാണ്. ഇത് കൂടുതല്‍ ഗുണം നല്‍കും.
കറ്റാര്‍വാഴ
ചര്‍മ്മം വളരെയധികം മോയ്സ്ച്വര്‍ ചെയ്ത് നിലനിര്‍ത്തുന്നതിനും മുഖത്ത് കറുത്തപാടുകളും കുരുക്കളും കുറയ്ക്കുന്നതിനും കറ്റാര്‍വാഴ വളരെ നല്ലതാണ്. ഇതിനായി കറ്റാര്‍വാഴ ജെല്‍ എടുത്ത് ദിവസത്തില്‍ മൂന്ന് നേരം വീതം മുഖത്ത് പുരട്ടാവുന്നതാണ്. അതുപോലെ, ചെറിയ രീതിയില്‍ മസാജ് ചെയ്തും കൊടുക്കുക. ഇത് ചര്‍മ്മത്തെ മൃദുവാക്കുന്നതിനും പാടുകള്‍ നീക്കം ചെയ്യുന്നതിനും സഹായിക്കുന്നുണ്ട്.
പേരയില
പേരയിലയുടെ കൂമ്പും മഞ്ഞളും ചേര്‍ത്ത് അരച്ച് മുഖത്ത് പുരട്ടുന്നത് മുഖക്കുരു അകഖ്ഖാന്‍ നല്ലതാണ്. അതുപോലെ, മുഖത്തെ കറുത്തപ്പാടുകള്‍ നീക്കുന്നതിനും മുഖത്തിന് നല്ല നിറം ലഭിക്കുന്നതിനും ഈ കൂട്ട് വളരെയധികം സഹായിക്കുന്നുണ്ട്. ആഴ്ച്ചയില്‍ രണ്ട് തവണ വീതം ചെയ്യുന്നത് വളരെ നല്ലത്.
