കോഴിക്കോട്: കുതിരവട്ടം മാനസിക ആരോഗ്യ കേന്ദ്രത്തില്‍ നിന്ന് ചാടിപ്പോയ കൊലക്കേസ് പ്രതിയെ പിടികൂടി. വേങ്ങരയില്‍ ബസ് ഇറങ്ങിയപ്പോഴാണ് ഇവര്‍ പിടിയിലായത്. മലപ്പുറം വേങ്ങര സഞ്ചിത് പാസ്വാന്‍ വധക്കേസിലെ പ്രതി പൂനം ദേവിയാണ് കടന്നുകളഞ്ഞത്. ഫൊറന്‍സിക് ലാബിലെ തടവുകാരിയായിരുന്നു. ശനിയാഴ്ചയാണ് പൂനംദേവിയെ മാനസികാരോഗ്യ കേന്ദ്രത്തില്‍ എത്തിച്ചത്.
ശൗചാലയത്തിന്റെ വെന്റിലേറ്റര്‍ ഗ്രില്‍ ഇളക്കി മാറ്റിയാണ് ഇവര്‍ രക്ഷപ്പെട്ടത്. വെന്റിലേറ്റര്‍ ഗ്രില്‍ ഇളക്കിയ നിലയില്‍ കണ്ടെത്തിയ സുരക്ഷാ ജീവനക്കാര്‍ വിവരം അധികൃതരെ അറിയിക്കുകയായിരുന്നു. ബിഹാറിലെ വൈശാലി സ്വദേശിയാണ് പൂനം.
ഞായറാഴ്ച പുലര്‍ച്ചെ 12.15 ഓടെയാണ് സംഭവം. കഴിഞ്ഞ ദിവസം വേങ്ങര പോലീസ് സ്റ്റേഷനില്‍ രജിസ്റ്റര്‍ ചെയ്ത കൊലപാതക കേസിലെ പ്രതിയാണ് പൂനം. ഭര്‍ത്താവ് സഞ്ചിത് പാസ്വാനെ പൂനം ദേവി കഴുത്ത് ഞെരിച്ച് കൊലപ്പെടുത്തിയെന്നാണ് കേസ്. കാമുകനൊപ്പം ജീവിക്കാന്‍ വേണ്ടിയായിരുന്നു കൊലപാതകം. മുന്‍പ് കുതിരവട്ടത്തുനിന്ന് രണ്ടു അന്തേവാസികള്‍ ചാടിപ്പോയിരുന്നു.
