കഴിച്ച പാത്രം കഴുകി വെയ്ക്കുന്നത് പൊട്ട ശീലമല്ല: പാത്രം കഴുകി വെച്ചതുകൊണ്ട് വോട്ട് പാത്രത്തിൽ വീഴില്ല : ഡൽഹിയിലായാലും തിരുവനന്തപുരത്തായാലും ഭക്ഷണം കഴിച്ച പാത്രം സ്വയം കഴുകിവയ്ക്കുന്നത് ഞങ്ങളുടെ ശീലം എന്ന് മന്ത്രി ശിവൻകുട്ടി: അത് കാണുമ്പോൾ അസ്വസ്ഥത തോന്നുന്നത് പഴഞ്ചൻ ഫ്യൂഡൽ മാടമ്പിത്തരം ഉള്ളിൽപേറുന്നവർക്ക്
തിരുവനന്തപുരം : അവനവൻ ഭക്ഷണം കഴിച്ച പാത്രം കഴുകി വെയ്ക്കുന്നത് ഒരിക്കലും ഒരു പൊട്ട ശീലമല്ല.ഇവിടെ സ്ത്രീകൾക്കു മാത്രമായി ഒരു പണിയും പതിച്ചു കൊടുത്തിട്ടുമില്ല. ഒരു സ്ത്രീ ചെയ്യുന്ന ഏത് ജോലിയും പുരുഷനും ചെയ്യാവുന്നതാണ്.അതുകൊണ്ടുതന്നെ സിപിഎം ജനറൽ സെക്രട്ടറി എം എ ബേബി താൻ ഭക്ഷണം കഴിച്ച പാത്രം കഴുകി വെച്ചതുകൊണ്ട് ഇവിടെ ഒന്നും സംഭവിക്കാൻ പോകുന്നില്ല.ബേബി പാത്രം കഴുകി എന്നതുകൊണ്ട് ആ പാത്രത്തിലേക്ക് സിപിഎമ്മിന് വോട്ടുകളും വീഴാൻ പോകുന്നില്ല. അത് മറ്റാരെക്കാളും നന്നായി സിപിഎമ്മിന് അറിയാം. കാരണം ബേബി ആ പാത്രം കഴുകിയത് വോട്ട് കിട്ടാനോ കയ്യടിക്കോ സിംപതിക്കോ വേണ്ടിയല്ല.
ഇക്കാര്യം വളരെ വിശദമായി മന്ത്രി വി ശിവൻകുട്ടി ഫേയ്സ്ബുക്കിൽ സുദീർഘമായ ഒരു കുറിപ്പിലൂടെ പറഞ്ഞിട്ടുണ്ട്.
ബേബിയുടെ പാത്രം കഴുകലിനെ പരിഹസിച്ചവർ നിർബന്ധമായും വായിച്ചിരിക്കേണ്ട കുറിപ്പാണിത്. ഒരു രാഷ്ട്രീയ മറുപടി എന്നതിനപ്പുറം ഒരുപാട് കാര്യങ്ങൾ ശിവൻകുട്ടിയുടെ കുറിപ്പിൽ ഉണ്ട്.
‘പഴഞ്ചൻ ഫ്യൂഡൽ മാടമ്പിത്തരം ഉള്ളിൽപേറുന്നവർക്ക് ഒരാൾ സ്വന്തം പാത്രം കഴുകുന്നത് കാണുമ്പോൾ അസ്വസ്ഥത ഉണ്ടാകാമെന്ന് ശിവൻകുട്ടി പറയുന്നു.
കമ്മ്യൂണിസ്റ്റ് പാര്ട്ടിയെ സംബന്ധിച്ചിടത്തോളം ഇതൊരു പുതിയ കാര്യമല്ല. ഡല്ഹിയിലെ എകെജി ഭവനിലായാലും തിരുവനന്തപുരത്തെ എകെജി സെന്ററിലായാലും മറ്റേത് ജില്ലാ കമ്മിറ്റി ഓഫീസിലായാലും, ഭക്ഷണം കഴിച്ച പാത്രം സ്വയം കഴുകി വെക്കുക എന്നത് ഞങ്ങളുടെ രീതിയും ശീലവുമാണെന്നും വിദ്യാഭ്യാസ മന്ത്രി ചൂണ്ടിക്കാട്ടുന്നു.
സിപിഎം ഗൃഹസന്ദര്ശനത്തിനിടെ ഭക്ഷണം കഴിച്ച പാത്രം സ്വയം കഴുകിവെയ്ക്കുന്ന സിപിഎം ജനറല് സെക്രട്ടറി എം എ ബേബിയുടെ ചിത്രത്തെ പരിഹസിക്കുന്നതിലൂടെ വെളിപ്പെടുന്നത് സാംസ്കാരിക ശൂന്യതയും ഫ്യൂഡല് മനോഭാവവുമെന്ന് മന്ത്രി വി ശിവന്കുട്ടി തുറന്നടിച്ചിട്ടുണ്ട്.എവിടെയായിരുന്നാലും സ്വന്തം പാത്രം കഴുകിവെയ്ക്കുന്ന ശീലം എംഎ ബേബിക്ക് പണ്ടേയുള്ളതാണെന്നും വി ശിവന്കുട്ടി കുറിച്ചു.
ഇത് സംബന്ധിച്ച് വി ശിവന്കുട്ടി പങ്കുവെച്ച കുറിപ്പ്
ഗൃഹസന്ദര്ശനത്തിനിടെ ഭക്ഷണം കഴിച്ച പാത്രം സ്വയം കഴുകിവെച്ച സിപിഐഎം ജനറല് സെക്രട്ടറി സഖാവ് എംഎ ബേബിയെ പരിഹസിച്ചുകൊണ്ട് ചില കോണുകളില് നിന്ന് ഉയരുന്ന ട്രോളുകള് ശ്രദ്ധയില്പ്പെട്ടു. ആ പരിഹാസത്തിന് പിന്നിലുള്ളവരുടെ സാംസ്കാരിക ശൂന്യതയും ഫ്യൂഡല് മനോഭാവവുമാണ് ഇതിലൂടെ വെളിച്ചത്തുവരുന്നത്. കമ്മ്യൂണിസ്റ്റ് പാര്ട്ടിയെ സംബന്ധിച്ചിടത്തോളം ഇതൊരു പുതിയ കാര്യമല്ല. ഡല്ഹിയിലെ എ.കെ.ജി ഭവനിലായാലും തിരുവനന്തപുരത്തെ എ.കെ.ജി സെന്ററിലായാലും മറ്റേത് ജില്ലാ കമ്മിറ്റി ഓഫീസിലായാലും, ഭക്ഷണം കഴിച്ച പാത്രം സ്വയം കഴുകി വെക്കുക എന്നത് ഞങ്ങളുടെ രീതിയും ശീലവുമാണ്. ബേബി സഖാവിനെ അടുത്തറിയുന്നവര്ക്ക്, അദ്ദേഹം എവിടെയായിരുന്നാലും സ്വന്തം പാത്രം കഴുകി വെക്കുന്ന ശീലം പണ്ടേയുള്ളതാണെന്നും, പാത്രം കഴുകുക മാത്രമല്ല നന്നായി പാചകം ചെയ്യാനും അദ്ദേഹത്തിന് അറിയാമെന്നും വ്യക്തമായി അറിയാം
തുണികഴുകല്, പാചകം, വീട് വൃത്തിയാക്കല്, കക്കൂസ് കഴുകല് തുടങ്ങിയ ജോലികള് ‘മോശപ്പെട്ട’ പണികളാണെന്നും, അവയൊക്കെ സ്ത്രീകളോ അല്ലെങ്കില് സമൂഹത്തിലെ താഴെക്കിടയിലുള്ളവര് എന്ന് ഒരു വിഭാഗത്താല് വിളിക്കപ്പെടുന്നവരോ മാത്രം ചെയ്യേണ്ടതാണെന്നും കരുതുന്നവര് ഇന്നും നമുക്കിടയിലുണ്ട്. പുരുഷന്മാര് ഇതൊന്നും ചെയ്യാന് പാടില്ലെന്നുള്ള പഴഞ്ചന് ഫ്യൂഡല് മാടമ്പിത്തരം ഉള്ളില് പേറുന്നവര്ക്ക്, ഒരാള് സ്വന്തം പാത്രം കഴുകുന്നത് കാണുമ്പോള് അസ്വസ്ഥത ഉണ്ടായേക്കാം. ഏതൊരു തൊഴിലിനും അന്തസ്സുണ്ടെന്നും, സ്വന്തം കാര്യം നോക്കുന്നത് ആത്മാഭിമാനത്തിന്റെ ഭാഗമാണെന്നും തിരിച്ചറിയാനുള്ള പക്വത ഇക്കൂട്ടര്ക്ക് ഇല്ലാതെ പോയി.
ഈ അവസരത്തില് എന്റെ പ്രിയപ്പെട്ട വിദ്യാര്ത്ഥികളോട് ഒരുകാര്യം ഓര്മ്മിപ്പിക്കാന് ഞാന് ആഗ്രഹിക്കുന്നു. സ്വന്തം കാര്യങ്ങള് സ്വയം ചെയ്യുന്നത് ഒരിക്കലും കുറച്ചിലല്ല, മറിച്ച് അതൊരു വലിയ ഗുണമാണ്. പഠനത്തോടൊപ്പം തന്നെ വീട്ടിലെ ചെറിയ ജോലികള് ചെയ്യാനും, ആണ്കുട്ടികള് പാചകവും പാത്രം കഴുകലും അടക്കമുള്ള കാര്യങ്ങള് ശീലിക്കുന്നതും നല്ല സംസ്കാരത്തിന്റെ ഭാഗമാണ്. തൊഴിലിന്റെ മഹത്വം തിരിച്ചറിഞ്ഞ്, ലിംഗഭേദമില്ലാതെ എല്ലാ ജോലികളും ചെയ്യാന് മടിയില്ലാത്ത ഒരു പുതിയ തലമുറയായി നിങ്ങള് വളര്ന്നുവരണം. ജീര്ണ്ണിച്ച ചിന്താഗതികളെ അവഗണിച്ചുകൊണ്ട്, അധ്വാനത്തിന്റെ മഹത്വം ഉയര്ത്തിപ്പിടിച്ച് നമുക്ക് മുന്നോട്ട് പോകാം
നിയമസഭാ തെരഞ്ഞെടുപ്പിന് മുന്നോടിയായി സിപിഐഎം സംഘടിപ്പിക്കുന്ന ഗൃഹസന്ദര്ശനത്തിനിടെ വീട്ടിലെത്തിയ എംഎ ബേബി ഭക്ഷണം കഴിച്ച പാത്രം കഴുകിവെയ്ക്കുന്നതിന്റെ ചിത്രം സോഷ്യല്മീഡിയയില് വ്യാപകമായി പ്രചരിക്കുകയാണ്. ഇതിനകം നിരവധി പേരാണ് ചിത്രത്തെ വിമര്ശിച്ചും അഭിനന്ദിച്ചും രംഗത്തുവരുന്നത്. തുടരണം കിട്ടാൻ വേണ്ടി സിപിഎമ്മുകാർ കാണിക്കുന്ന അഭിനയം എന്ന രീതിയിൽ ദേവിയെ വിമർശിക്കുന്നവരും പരിഹസിക്കുന്നവരും ഏറെയാണ്.അതേസമയം ബേബിയുടെ പാത്രം കഴുകലിനെ അഭിനന്ദിച്ചവരും ഒരുപാടുണ്ട്.
