വയനാട്: വാഹനപരിശോധനയ്ക്കിടെ പോലീസ് ജീപ്പും കെ.എസ്.ആര്‍.ടി.സി. ബസും തടഞ്ഞുനിര്‍ത്തി അര്‍ധരാത്രിയില്‍ കല്പറ്റ ടൗണില്‍ അഭ്യാസംകാണിച്ച ഏഴുപേര്‍ അറസ്റ്റില്‍.
കല്പറ്റ മണിയന്‍കോട് ഓടമ്പംവീട്ടില്‍ വിഷ്ണു, ഇഷ്ടികപൊയില്‍ പ്രവീണ്‍കുമാര്‍, നെടുങ്ങോട് വയല്‍ അരുണ്‍, വാക്കേല്‍വീട്ടില്‍ വിഘ്‌നേഷ്, അരുണ്‍നിവാസില്‍ എം.പി. അരുണ്‍, പുത്തൂര്‍വയല്‍ ഒഴുക്കുന്നത്ത് കാട്ടില്‍ അഭിലാഷ്, താഴെ മുട്ടില്‍ ശ്രീനികവീട്ടില്‍ ശ്രീരാഗ് എന്നിവരെയാണ് പോലീസ് അറസ്റ്റുചെയ്തത്.
ബുധനാഴ്ച അര്‍ധരാത്രി കല്പറ്റ ചുങ്കം ജങ്ഷനിലാണ് സംഭവം. പട്രാളിങ് നടത്തുന്നതിനിടെ പോലീസ് ജീപ്പിന്റെ ഫോട്ടോയെടുത്ത് ഇന്‍ഷുറന്‍സില്ലെന്നുപറഞ്ഞ് ഇവര്‍ ബഹളമുണ്ടാക്കുകയായിരുന്നു. വാഹനമെടുക്കാന്‍ അനുവദിക്കില്ലെന്നുപറഞ്ഞ് തട്ടിക്കയറിയതായും പോലീസ് പറഞ്ഞു. ബഹളമുണ്ടായ സമയത്ത് അതുവഴിവന്ന കെ.എസ്.ആര്‍.ടി.സി. ബസും ഇവര്‍ തടഞ്ഞുനിര്‍ത്തി. കെ.എസ്.ആര്‍.ടി.സി. ബസും പരിശോധിക്കാതെ വിടില്ലെന്ന നിലപാടിലായിരുന്നു. യാത്രക്കാര്‍ ബുദ്ധിമുട്ടിലായതോടെ പിടിച്ചുമാറ്റാന്‍ ശ്രമിച്ചപ്പോള്‍ കൈയേറ്റംചെയ്തെന്നും പോലീസ് പറഞ്ഞു. ലഹരിയിലായിരുന്നു യുവാക്കളെന്നു പോലീസ് പറഞ്ഞു.
