ശ്രീനഗര്‍: കശ്മീരിലെ പൂഞ്ചില്‍ നിയന്ത്രണരേഖയിലൂടെയുള്ള നുഴഞ്ഞുകയറ്റശ്രമം തടഞ്ഞ് സേന. ഏറ്റുമുട്ടലില്‍ മൂന്ന് ഭീകരരെ വധിച്ചു.
രാവിലെ പത്തുമണിയോടെയാണ് പൂഞ്ച് സെക്ടറില്‍ സൈന്യവും ഭീകരരും ഏറ്റുമുട്ടിയത്. പീര്‍പഞ്ചല്‍ താഴ്‌വരയില്‍ ഭീകരരുടെ സാന്നിധ്യം ആദ്യം സൈന്യം സ്ഥിരീകരിച്ചു. പിന്നാലെ ഭീകരര്‍ സൈന്യത്തിനുനേരെ വെടിയുതിര്‍ക്കുകയായിരുന്നു. തുടര്‍ന്നുള്ള ഏറ്റുമുട്ടലിലാണ് മൂന്ന് ഭീകരരെ സേന വധിച്ചത്.
രണ്ട് എകെ-47 തോക്കുകള്‍, ഒരു പിസ്റ്റള്‍ എന്നിവ കണ്ടെടുത്തു. ഇവര്‍ ഇന്ത്യന്‍ ഭാഗത്തേക്ക്‌ നുഴഞ്ഞുകയറാന്‍ ശ്രമിക്കുകയായിരുന്നുവെന്ന് സേന അറിയിച്ചു. കൂടുതല്‍ ഭീകരര്‍ ഉണ്ടെന്ന സംശയത്തെ തുടര്‍ന്ന് പ്രദേശത്ത് വ്യാപക തിരച്ചില്‍ തുടരുകയാണ്.
