ദശലക്ഷത്തിലധികം ആളുകളെ ബാധിച്ചിരിക്കുന്ന ഒരു രോഗമാണ് സെറിബ്രല്‍ പാള്‍സി. കുട്ടികളെ ബാധിക്കുന്ന ഏറ്റവും സാധാരണമായ ശാരീരിക വൈകല്യങ്ങളിലൊന്നാണ് ഇത്. ഫലപ്രദമായ ചികിത്സയില്ലാതെ ഒരു കുട്ടിയുടെ ജീവിതകാലം മുഴുവന്‍ കഷ്ടത്തിലാക്കാന്‍ കെല്‍പ്പുള്ളതാണ് ഈ രോഗം.
എന്താണ് സെറിബ്രല്‍ പാള്‍സി
സെറിബ്രല്‍ പാള്‍സി എന്നത് മസ്തിഷ്‌ക ക്ഷതം മൂലമുണ്ടാകുന്ന വൈകല്യങ്ങളുടെ ഒരു കൂട്ടമാണ്. ഇത് ഒരു കുഞ്ഞിന്റെ ജനനത്തിനു മുമ്പോ ശേഷമോ അല്ലെങ്കില്‍ അതിനുശേഷമോ സംഭവിക്കുന്നു. ചലനശേഷിയും നാഡികളുടെ പ്രവര്‍ത്തനവും നഷ്ടപ്പെടുന്നതാണ് ഈ രോഗാവസ്ഥയുടെ സവിശേഷത. ഇത് ബാധിച്ചവര്‍ക്ക് ചലനശേഷി, കൈകളുടെ ഉപയോഗം, ആശയവിനിമയം എന്നിവയില്‍ പ്രശ്‌നങ്ങള്‍ അനുഭവപ്പെടുന്നു.
സെറിബ്രൽ പാൾസിയുടെ കാരണങ്ങൾ
സെറിബ്രൽ പാൾസിയിലേക്ക് നയിച്ചേക്കാവുന്ന നിരവധി കാരണങ്ങളുണ്ട്. ചില ലക്ഷണങ്ങൾ ജനനസമയത്ത് ഉണ്ടാകുന്നു. എന്നാൽ മറ്റു ചിലത് ജനിച്ച് മാസങ്ങളോ വർഷങ്ങളോ കഴിഞ്ഞ് കാണപ്പെടാം. സെറിബ്രൽ പാൾസിയിലേക്ക് നയിച്ചേക്കാവുന്ന കാരണങ്ങൾ ഇവയാണ്:
* ആവശ്യത്തിന് ഓക്‌സിജന്റെ അഭാവം – കുട്ടിയുടെ മസ്തിഷ്‌ക കോശങ്ങളെ തകരാറിലാക്കുന്ന ഹൈപ്പോക്‌സിയ എന്ന അവസ്ഥ.
* ഗർഭാവസ്ഥയുടെ ആദ്യ 4-5 മാസങ്ങളിൽ അമ്മയിൽ റൂബെല്ല, സൈറ്റോമെഗലോവൈറസ് അല്ലെങ്കിൽ ടോക്‌സോപ്ലാസ്‌മോസിസ് പോലുള്ള അണുബാധകൾ.
* പ്രമേഹം, ഹൃദ്രോഗം, കഠിനമായ ആസ്ത്മ, തൈറോയ്ഡ് തകരാറുകൾ തുടങ്ങിയ അമ്മയിലെ ഉപാപചയ വൈകല്യങ്ങൾ.
* ഗർഭകാലത്ത് ഡോക്ടർമാരുടെ ഉപദേശം കൂടാതെയുള്ള ചില മരുന്നുകളുടെ ഉപയോഗം.
* പ്രസവസമയത്ത് രക്തസ്രാവം പോലുള്ള തലയ്ക്കുണ്ടാകുന്ന ആഘാതം.
* കുറഞ്ഞ ഭാരം പോലെയുള്ള ജനനസമയത്തെ സങ്കീർണതകൾ.
സെറിബ്രൽ പാൾസിയുടെ കൃത്യമായ കാരണം തിരിച്ചറിയുന്നത് മിക്കവാറും ബുദ്ധിമുട്ടാണ്. മിക്ക കേസുകളിലും, ഗർഭധാരണ സമയത്ത് ഉണ്ടാകുന്ന ചില അസാധാരണത്വങ്ങളാണ് ഈ രോഗത്തിന് കാരണമാകുന്നത്.
സെറിബ്രൽ പാൾസിയുടെ ലക്ഷണങ്ങൾ
സ്തനമോ കുപ്പിയോ ഉപയോഗിച്ച് മുലകുടിക്കാനുള്ള ബുദ്ധിമുട്ട്. സാധാരണ മസിൽ ടോണിന്റെ അഭാവം, അസാധാരണമായ ശരീര ഭാവങ്ങൾ, ലക്ഷ്യമില്ലാത്ത ശരീര ചലനങ്ങളും മോശം ഏകോപനവും, മാനസിക വൈകല്യം, സംസാര വൈകല്യം എന്നിവ കുട്ടികളിൽ സെറിബ്രൽ പാൾസിയുടെ ലക്ഷണങ്ങളാണ്.
സെറിബ്രൽ പാൾസിയുടെ 4 തരങ്ങൾ
- സ്പാസ്റ്റിക് സെറിബ്രൽ പാൾസി – ഇതാണ് സെറിബ്രൽ പാൾസികളുടെ ഏറ്റവും സാധാരണമായ തരം. ഇത് ഒരു അവയവത്തെയോ ശരീരത്തിന്റെ ഒരു വശത്തെയോ കാലുകളെയോ അല്ലെങ്കിൽ ഇരു കൈകളെയും കാലുകളെയുമോ ബാധിച്ചേക്കാം. പക്ഷാഘാതം, സംവേദനക്ഷമതയിലെ അസാധാരണതകൾ, കേൾവിയുടെയും കാഴ്ചയുടെയും വൈകല്യങ്ങൾ എന്നിവ ഇതുകാരണം ഉണ്ടാകാം. അപസ്മാരം, സംസാര പ്രശ്‌നങ്ങൾ, ബുദ്ധിമാന്ദ്യം എന്നിവയാണ് മറ്റ് അനുബന്ധ പ്രശ്‌നങ്ങൾ.
- അഥെറ്റോയ്ഡ് സെറിബ്രൽ പാൾസി – ഇതിൽ അവിചാരിതമോ അനിയന്ത്രിതമായതോ ആയ ചലനങ്ങൾ കാണപ്പെടുന്നു. കുട്ടിയുടെ പേശികൾ വളരെ അസാധാരണമായ രീതിയിൽ പ്രതികരിക്കുന്നു. അതിന്റെ ഫലമായി അമിതവും അനിയന്ത്രിതവുമായ ശരീര ചലനങ്ങൾ ഉണ്ടാകുന്നു.
- അറ്റാക്‌സിക് സെറിബ്രൽ പാൾസി-മസ്തിഷ്‌കത്തിന്റെ പ്രത്യേക ഭാഗങ്ങൾ തകരാറിലായതിനാൽ ഉണ്ടാകുന്ന ഏകോപനത്തിന്റെയും സന്തുലിതാവസ്ഥയുടെയും അഭാവമാണ് ഇതിന്റെ സവിശേഷത.
- മിക്‌സഡ് സെറിബ്രൽ പാൾസി – ഒരേ വ്യക്തിയിൽ രണ്ടോ അതിലധികമോ തരം സെറിബ്രൽ പാൾസികൾ ഉണ്ടാകുമ്പോഴാണ് ഇത് സംഭവിക്കുന്നത്.
സെറിബ്രൽ പാൾസി രോഗനിർണയം
സെറിബ്രൽ പാൾസികയുടെ ആദ്യകാല രോഗനിർണയം വളരെ പ്രധാനമാണ്. അത് കുട്ടിക്ക് നല്ല രീതിയിൽ ഇതിൽ നിന്ന് കരകയറാൻ സഹായിക്കും. കുട്ടിയുടെ കഴിവുകൾ, പെരുമാറ്റം, കുട്ടിയുടെ പേശികളുടെ ഏകോപനം എന്നിവ നിരീക്ഷിക്കുക. ഇതിനായി ഒരു ശിശുരോഗവിദഗ്ദ്ധന്റെ സഹായവും തേടാം.
സെറിബ്രൽ പാൾസി ചികിത്സ
സെറിബ്രൽ പാൾസി ബാധിച്ചാൽ ഇതിന് പ്രത്യേക ചികിത്സയില്ല എന്നതാണ് സത്യം. പക്ഷേ ചികിത്സയുടെ ലക്ഷ്യം കുട്ടിയുടെ അവസ്ഥയ്ക്ക് മാറ്റമുണ്ടാക്കുക എന്നതാണ്. ഫിസിയോതെറാപ്പി, കണ്ണട, ശ്രവണസഹായികൾ, മരുന്നുകൾ, സ്‌പെഷ്യൽ സ്‌കൂൾ പഠനം തുടങ്ങിയ വഴികളിലൂടെ ഇത് ചെയ്യാൻ കഴിയും. എല്ലാറ്റിനുമുപരിയായി, മാതാപിതാക്കൾ അവരുടെ കുട്ടികളുടെ പ്രശ്‌നം മനസ്സിലാക്കുകയും പൊരുത്തപ്പെടുത്തുകയും പിന്തുണ നൽകുകയും വേണം.
