പാലക്കാട്: അട്ടപ്പാടി ആനക്കട്ടി തൂവയിൽ മലവെള്ളപ്പാച്ചലിൽ കാർ ഒഴുകി പോയി. തമിഴ്നാട് സ്വദേശി കീർത്തിരാജിൻ്റെ കാറാണ് ഒഴുക്കിൽപ്പെട്ടത്. കാറിലുണ്ടായിരുന്ന കീർത്തി രാജിൻ്റെ ഭാര്യ പെട്ടെന്ന് പുറത്തേക്ക് ഇറങ്ങിയതിനാൽ അപകടത്തിൽ നിന്നും രക്ഷപ്പെട്ടു.
കീർത്തി രാജ് ഭാര്യക്കൊപ്പം കോയമ്പത്തൂരിൽ നിന്ന് വിനോദ സഞ്ചാരത്തിനായി എത്തിയതായിരുന്നു. വണ്ടി വഴിയിൽ നിർത്തിയിട്ടിരിക്കുമ്പോഴാണ് തൂവ ആറിൽ രണ്ടു പേർ ഒഴുക്കിൽപ്പെട്ടതായി കണ്ടത്. ഭാര്യയെ കാറിൽ ഇരുത്തി കീർത്തി രാജ് അവരെ രക്ഷപ്പെടുത്താൻ അങ്ങോട്ടു പോയി. പിന്നാലെ ആറിലെ ജലനിരപ്പ് ഉയ‍ര്‍ന്നു. ഇതോടെ കീര്‍ത്തിരാജ് ഭാര്യയോട് കാറിൽ നിന്നിറങ്ങാൻ വിളിച്ചു പറയുകയും ഭാര്യ രക്ഷപെടുകയുമായിരുന്നു.
