KeralaNEWS

വൈശാഖനും പ്രൊഫ. കെ.പി. ശങ്കരനും കേരള സാഹിത്യ അക്കാദമി വിശിഷ്ടാംഗത്വം; അന്‍വര്‍ അലി, ആര്‍. രാജശ്രീ, വിനോയ് തോമസ്, ദേവദാസ് വി.എം എന്നിവര്‍ക്കും പുരസ്‌കാരങ്ങള്‍

തൃശൂര്‍: എഴുത്തുകാരായ വൈശാഖന്‍, പ്രൊഫ. കെ.പി. ശങ്കരന്‍ എന്നിവര്‍ക്ക് കേരള സാഹിത്യ അക്കാദമി വിശിഷ്ടാംഗത്വം. അക്കാദമി അധ്യക്ഷന്‍ കെ. സച്ചിദാനന്ദനാണ് ഇക്കാര്യം പ്രഖ്യാപിച്ചത്. കേരള സാഹിത്യ അക്കാദമിയുടെ 2021-ലെ പുരസ്‌കാരങ്ങളും അദ്ദേഹം പ്രഖ്യാപിച്ചു. മികച്ച നോവലിനുള്ള പുരസ്‌കാരം ആര്‍. രാജശ്രീയും വിനോയ് തോമസും പങ്കിട്ടു. കവിതയ്ക്കുള്ള പുരസ്‌കാരം അന്‍വര്‍ അലിയും ചെറുകഥയ്ക്കുള്ള പുരസ്‌കാരം ദേവദാസ് വി.എമ്മും നേടി. ഇരുപത്തയ്യായിരം രൂപയും ഫലകവും സാക്ഷ്യപത്രവും ഉള്‍ക്കൊള്ളുന്നതാണ് പുരസ്‌കാരം.

വിശിഷ്ടാംഗത്വത്തിന് അമ്പതിനായിരം രൂപയും രണ്ടു പവന്റെ സ്വര്‍ണ്ണപ്പതക്കവും പ്രശസ്തിപത്രവും പൊന്നാടയും ഫലകവുമാണ് പുരസ്‌കാരം. 2018 ലെ വിലാസിനി പുരസ്‌കാരത്തിന് ഇ.വി. രാമകൃഷ്ണന്‍ രചിച്ച മലയാള നോവലിന്റെ ദേശകാലങ്ങള്‍ എന്ന പുസ്തകം അര്‍ഹമായി. അമ്പതിനായിരം രൂപയും ഫലകവും പ്രശസ്തിപത്രവുമാണ് പുരസ്‌കാരം.

സമഗ്ര സംഭാവനയ്ക്കുള്ള പുരസ്‌കാരത്തിന് ഡോ. കെ. ജയകുമാര്‍, കടത്തനാട്ട് നാരായണന്‍, ജാനമ്മ കുഞ്ഞുണ്ണി, കവിയൂര്‍ രാജഗോപാലന്‍, ഗീത കൃഷ്ണന്‍കുട്ടി, കെ.എ. ജയശീലന്‍ എന്നിവര്‍ അര്‍ഹരായി. 30,000 രൂപയും സാക്ഷ്യപത്രവും ഫലകവും പൊന്നാടയുമാണ് പുരസ്‌കാരം.

എന്‍ഡോവ്മെന്റ് അവാര്‍ഡുകള്‍

ഐ.സി. ചാക്കോ അവാര്‍ഡ്- വൈക്കം മധു, സി.ബി. കുമാര്‍ അവാര്‍ഡ്- അജയ് പി. മങ്ങാട്ട്, കെ.ആര്‍. നമ്പൂതിരി അവാര്‍ഡ്- പ്രൊഫ.പി.ആര്‍. ഹരികുമാര്‍, കനകശ്രീ അവാര്‍ഡ്- കിങ് ജോണ്‍സ്, ഗീതാ ഹിരണ്യന്‍ അവാര്‍ഡ്- വിവേക് ചന്ദ്രന്‍, ജി.എന്‍. പിള്ള അവാര്‍ഡ്- ഡോ. പി.കെ. രാജശേഖരന്‍, ഡോ. കവിത ബാലകൃഷ്ണന്‍, തുഞ്ചന്‍ സ്മാരക പ്രബന്ധ മത്സരം- എന്‍.കെ. ഷീല.

പുരസ്‌കാരങ്ങള്‍ ഇങ്ങനെ…

  • കവിത
    അന്‍വര്‍ അലി (മെഹബൂബ് എക്‌സ്പ്രസ്)
  • നോവല്‍ (രണ്ട് പേര്‍ക്ക്)
    ഡോ. ആര്‍.രാജശ്രീ (കല്യാണിയെന്നും ദാക്ഷായണിയെന്നും പേരായ രണ്ട് സ്ത്രീകളുടെ കഥ)
    വിനോയ് തോമസ് (പുറ്റ്)
  • ചെറുകഥ
    ദേവദാസ് വി.എം. (വഴി കണ്ടുപിടിക്കുന്നവര്‍)
  • നാടകം
    പ്രദീപ് മണ്ടൂര്‍ (നമുക്ക് ജീവിതം പറയാം)
  • സാഹിത്യ വിമര്‍ശനം
    എന്‍.അജയകുമാര്‍ (വാക്കിലെ നേരങ്ങള്‍)
  • വൈജ്ഞാനിക സാഹിത്യം
    ഡോ. ഗോപകുമാര്‍ ചോലയില്‍ (കാലാവസ്ഥാ വ്യതിയാനവും കേരളവും: സൂചനകളും കാരണങ്ങളും)
  • ജീവചരിത്രം/ആത്മകഥ
    പ്രൊ. ടി.ജെ.ജോസഫ് (അറ്റുപോകാത്ത ഓര്‍മ്മകള്‍)
    എം.കുഞ്ഞാമന്‍ (എതിര്)
  • യാത്രാവിവരണം
    വേണു (നഗ്‌നരും നരഭോജികളും)
  • ബാലസാഹിത്യം
    രഘുനാഥ് പലേരി (അവര്‍ മൂവരും ഒരു മഴവില്ലും)
  • ഹാസ സാഹിത്യം
    ആന്‍ പാലി (അ ഫോര്‍ അന്നാമ്മ)

 

Leave a Reply

Your email address will not be published. Required fields are marked *

Back to top button
error: