KeralaNEWS

തൊഴിലിനായി കാത്തിരിക്കുന്നത് എൻജിനീയർമാർ 47,400, ഡോക്ടർമാർ 8,559

തിരുവനന്തപുരം: സംസ്ഥാനത്ത് എംപ്ലോയ്മെന്റ് എക്സ്ചേഞ്ചുകളിൽ റജിസ്റ്റർ ചെയ്തു തൊഴിലിനായി കാത്തിരിക്കുന്നവരിൽ എൻജിനീയറിങ് യോഗ്യതയുള്ള 85,606 പേർ. ഇതിൽ 47,400 പേർ എൻജിനീയറിങ് ബിരുദധാരികളും 38,206 പേർ ഡിപ്ലോമ യോഗ്യതയുള്ളവരുമാണ്. എംബിബിഎസ് പാസായ 8,559 പേ‍രും സംസ്ഥാനത്തെ 85 എംപ്ലോയ്മെന്റ് എക്സ്ചേഞ്ചുകളിലായി റജിസ്റ്റർ ചെയ്തവരുടെ പട്ടിക‍യിലുണ്ട്.

ബിരുദധാരികളായ തൊഴിലന്വേഷകരിൽ വനിതകളാണു കൂടുതൽ; 7158 ഡോക്ടർമാരും 26,163 എൻജിനീയർമാരും. ജോലിക്കായി സംസ്ഥാനത്തെ എംപ്ലോയ്മെന്റ് എക്സ്ചേഞ്ചുകളിൽ റജിസ്റ്റർ ചെയ്തു കാത്തിരിക്കുന്നവരുടെ ആകെ സംഖ്യ 29,17,007. ഇതിൽ 18.52 ലക്ഷം പേരും വനിതകളാണ്. ഈ വർഷം മാർച്ച് 31 വരെയുള്ള കണക്കാണിത്. പുരുഷന്മാർ:10,64,871, ട്രാൻസ്ജെൻഡർ: 30. പട്ടികജാതി വിഭാഗത്തിൽ നിന്ന് 5,43,721 പേരും പട്ടിക വിഭാഗത്തിൽ(എസ്‍ടി) നിന്ന് 43,874 പേരുമുണ്ട്. തൊഴിൽ തേടുന്നവരുടെ എണ്ണത്തിൽ തിരുവനന്തപുരം ജില്ലയാണു മുന്നിൽ.

റജിസ്റ്റർ ചെയ്തവരിൽ ചിലർക്കു ജോലി ലഭിച്ചാലും യഥാസമയം അറിയിക്കാറി‍ല്ലെന്ന് എംപ്ലോയ്മെന്റ് ഡയറക്ടറേറ്റ് അറിയിച്ചു. 3 വർഷത്തിനകം റജിസ്ട്രേഷൻ പുതുക്കിയില്ലെങ്കിൽ റദ്ദാകും. സ്വകാര്യ മേഖലയിൽ തൊഴിൽ ലഭ്യമാക്കുന്നതിനു തൊഴി‍ലുടമകളുമായി സഹകരിച്ചു മേളകൾ നടത്താൻ 11 ജില്ലകളിൽ എംപ്ലോയബിലിറ്റി സെന്ററുകളും ഗ്രാമീണ മേഖലയിലുള്ളവർക്ക് ഉന്നത വിദ്യാഭ്യാസം നേടുന്നതിനും തൊഴിലവസരങ്ങൾ ലഭ്യമാക്കുന്നതിനും 6 ജില്ലകളിൽ കരിയർ ഡവലപ്മെന്റ് സെന്ററുകളും സ്ഥാപിച്ചിട്ടുണ്ടെന്നും ഡയറക്ടറേറ്റ് അറിയിച്ചു.

Leave a Reply

Your email address will not be published. Required fields are marked *

Back to top button
error: