ന്യൂഡല്‍ഹി: റഷ്യയില്‍ നിന്നും ഉക്രെയ്നില്‍ നിന്നും ഏറ്റവും കൂടുതല്‍ ഗോതമ്പ് ഇറക്കുമതി ചെയ്യുന്ന രാജ്യങ്ങളിലൊന്നായ ഈജിപ്ത്, ഇന്ത്യന്‍ ഗോതമ്പ് ഇറക്കുമതി ചെയ്യുന്നു. ആഗോള ഗോതമ്പ് ഉല്‍പ്പാദനം കുത്തനെ ഇടിഞ്ഞ സാഹചര്യത്തിലാണ് ഇന്ത്യന്‍ ഗോതമ്പ് ഇറക്കുമതി ചെയ്യുന്നത്. വാണിജ്യ-വ്യവസായ, ഉപഭോക്തൃകാര്യ, ഭക്ഷ്യ-പൊതുവിതരണ മന്ത്രി പിയൂഷ് ഗോയല്‍ തിങ്കളാഴ്ച ദുബായില്‍ ഈജിപ്ഷ്യന്‍ സാമ്പത്തിക വികസന മന്ത്രി ഹലാ എല്‍-സെയ്ദുമായി കൂടിക്കാഴ്ച നടത്തി വ്യാപാരത്തിന്റെ വിശദാംശങ്ങള്‍ ചര്‍ച്ച ചെയ്തു.
2020-ല്‍ ഈജിപ്ത് റഷ്യയില്‍ നിന്ന് 1.8 ബില്യണ്‍ ഡോളറിന്റെയും ഉക്രെയ്നില്‍ നിന്ന് 600 മില്യണ്‍ ഡോളറിന്റെയും ഗോതമ്പ് ഇറക്കുമതി ചെയ്തു. ഇതിനകം ഗോതമ്പ് അയയ്ക്കുന്ന ശ്രീലങ്ക, ബംഗ്ലാദേശ്, മിഡില്‍ ഈസ്റ്റ്, യെമന്‍, കൊറിയ, ഫിലിപ്പീന്‍സ്, നേപ്പാള്‍, ഇന്തോനേഷ്യ തുടങ്ങിയ രാജ്യങ്ങളിലേക്കുള്ള കയറ്റുമതി വിഹിതം വര്‍ദ്ധിപ്പിക്കാനും ഇന്ത്യ നോക്കുന്നുണ്ട്. നിലവില്‍ ഈ രാജ്യങ്ങളുടെ ഇറക്കുമതിയില്‍ ഇന്ത്യയുടെ ഗോതമ്പ് സംഭാവന 2-10 ശതമാനം വരെയാണ്.
റഷ്യയില്‍ നിന്ന് ഏകദേശം 13 ദശലക്ഷം ടണ്‍ ഗോതമ്പ് ഇറക്കുമതി ചെയ്യുന്ന നൈജീരിയ, 11 ടണ്‍ ഇറക്കുമതി ചെയ്യുന്ന ഉക്രെയ്ന്‍, തുര്‍ക്കി, 4 ടണ്‍ ഇറക്കുമതി ചെയ്യുന്ന വിയറ്റ്നാം തുടങ്ങിയ പുതിയ കയറ്റുമതി ലക്ഷ്യസ്ഥാനങ്ങളെയും രാജ്യം ഉറ്റുനോക്കുന്നു. വിയറ്റ്നാമിലേക്കുള്ള ഇന്ത്യയുടെ സംഭാവന മൊത്തം ഗോതമ്പ് ഉപയോഗത്തിന്റെ 1 ശതമാനമാണ്. അതേസമയം നൈജീരിയയിലേക്കും തുര്‍ക്കിയിലേക്കും ഗോതമ്പ് കയറ്റുമതി ചെയ്യുന്നില്ല.
ഇന്ത്യ 11 മെട്രിക് ടണ്‍ ഗോതമ്പ് ഉല്‍പ്പാദനം ഉറ്റുനോക്കുന്നു. മാര്‍ച്ച് അവസാനത്തോടെ ഗോതമ്പിന്റെ കേന്ദ്ര സ്റ്റോക്ക് 20 മെട്രിക് ടണ്‍ ആകുമെന്ന് പ്രതീക്ഷിക്കുന്നു. അതിനാല്‍ കയറ്റുമതി വര്‍ധിപ്പിക്കാന്‍ വലിയ സാധ്യതയുണ്ടെന്നും ഉദ്യോഗസ്ഥര്‍ കൂട്ടിച്ചേര്‍ത്തു. കൂടുതല്‍ ഓര്‍ഡറുകള്‍ നേടുന്നതിനായി ഗോതമ്പിന്റെയും സര്‍ട്ടിഫിക്കേഷനുകളുടെയും ഗുണനിലവാര പരിശോധന ശക്തമാക്കാനും ഇന്ത്യ നോക്കുന്നുണ്ട്. ചില കീടങ്ങളെ നിയന്ത്രിക്കുന്നതിന് മെച്ചപ്പെട്ട അടിസ്ഥാന സൗകര്യങ്ങളുള്ള സര്‍ക്കാര്‍ അംഗീകൃത ലാബുകളുടെ എണ്ണം വര്‍ദ്ധിപ്പിക്കാന്‍ രാജ്യം പദ്ധതിയിടുന്നു.
ഇന്ത്യ പ്രതിവര്‍ഷം 107.59 ദശലക്ഷം മെട്രിക് ടണ്‍ ഗോതമ്പ് ഉത്പാദിപ്പിക്കുന്നു. ഇന്ത്യയിലെ പ്രധാന ഗോതമ്പ് ഉല്‍പ്പാദിപ്പിക്കുന്ന സംസ്ഥാനങ്ങള്‍ ഉത്തര്‍പ്രദേശ്, പഞ്ചാബ്, ഹരിയാന, മധ്യപ്രദേശ്, രാജസ്ഥാന്‍, ബിഹാര്‍, ഗുജറാത്ത് എന്നിവയാണ്. ഗോതമ്പ് കയറ്റുമതി വര്‍ധിപ്പിക്കാന്‍ സംസ്ഥാന സര്‍ക്കാരുകളും വിവിധ നടപടികള്‍ ആരായുന്നുണ്ട്. ഉത്തര്‍പ്രദേശിന് ശേഷം ഏറ്റവും കൂടുതല്‍ ഗോതമ്പ് ഉത്പാദിപ്പിക്കുന്ന സംസ്ഥാനമായ മധ്യപ്രദേശ്, കയറ്റുമതിക്കായി സ്വകാര്യ ഗോതമ്പ് സംഭരണം സുഗമമാക്കുന്നതിന് കയറ്റുമതിക്കാരുടെ യോഗം വിളിച്ചു.
