കൊച്ചി: ഭാര്യയുമായി അടുപ്പമുണ്ടെന്നാരോപിച്ച് യുവാവിനെ ഭര്‍ത്താവ് അടിച്ചുകൊന്നു. എറണാകുളം നെട്ടൂരില്‍ ഞായറാഴ്ച പുലര്‍ച്ചെ ഒരു മണിയോടെയായിരുന്നു കൊലപാതകം. പാലക്കാട് സ്വദേശിയും സ്വകാര്യ ബാങ്ക് ജീവനക്കാരനുമായ അജയ്(25)ആണ് കൊല്ലപ്പെട്ടത്. സംഭവത്തില്‍ പാലക്കാട് സ്വദേശിയായ സുരേഷിനെ പോലീസ് അറസ്റ്റ് ചെയ്തു.
പാലക്കാട് പുതുശ്ശേരി സ്വദേശിയായ സുരേഷിന്റെ ഭാര്യ എറണാകുളത്തെ സ്വകാര്യ ആശുപത്രിയാണ് ജോലി ചെയ്യുന്നത്. കൊല്ലപ്പെട്ട അജയ്ക്ക് ഈ യുവതിയുമായി അടുപ്പമുണ്ടായിരുന്നതായി പറയുന്നു. ഇതിനെ എതിര്‍ത്തിരുന്ന സുരേഷ് കഴിഞ്ഞ ദിവസം കൊച്ചിയിലെത്തി നെട്ടൂരിലെ ഹോട്ടലില്‍ മുറിയെടുത്തു. തുടര്‍ന്ന് ഭാര്യയെ ഇവിടേക്ക് കൊണ്ടുവന്ന ശേഷം പ്രശ്‌നങ്ങള്‍ പറഞ്ഞ് തീര്‍ക്കാനെന്ന പേരില്‍ അജയ്‌യെ പാലക്കാട്ടുനിന്ന് വിളിച്ചുവരുത്തി.
പിന്നീട് അജയ് ഹോട്ടലില്‍ എത്തുന്ന സമയം ഭാര്യയെ തന്ത്രപൂര്‍വം ഹോട്ടലില്‍നിന്ന് മാറ്റി കാറിലിരുത്തി. മുറിയിലെത്തിയ അജയെ പ്രതി സുരേഷ് തുണിയില്‍ പൊതിഞ്ഞ് കയ്യില്‍ കരുതിയിരുന്ന വീല്‍ സ്പാനര്‍ ഉപയോഗിച്ച് മര്‍ദ്ദിക്കുകയായിരുന്നു. മരണം ഉറപ്പാക്കാനായി പിന്തുടര്‍ന്ന് ആക്രമിച്ചാണ് കൊലപ്പെടുത്തിയത്.
അടികൊണ്ട് ഹോട്ടലിന്റെ പുറത്തേക്കോടിയ അജയെ പിന്നാലെത്തി ക്രൂരമായി സുരേഷ് മര്‍ദിക്കുന്നതിന്റെ സിസിടിവി ദൃശ്യങ്ങള്‍ ലഭിച്ചിട്ടുണ്ട്. നാട്ടുകാര്‍ വിവരം അറിയിച്ചതിനെ തുടര്‍ന്നെത്തിയ പൊലീസ് അജയ്‌യെ ആശുപത്രിയിലേക്ക് കൊണ്ടുപോയെങ്കിലും രക്ഷിക്കാനായില്ല. ഹോട്ടലില്‍ നിന്ന് കസ്റ്റഡിയിലെടുത്ത സുരേഷിന് ചോദ്യം ചെയ്യിലിന് ശേഷം ശേഷം കോടതിയില്‍ ഹാജരാക്കും.
