ക്രിക്കറ്റിലെ സ്വാധീനം ബെറ്റിങ് ആപ്പിനെ പ്രോത്സാഹിപ്പിക്കാന് ഉപയോഗിച്ചു ; സുരേഷ് റെയ്നയുടെയും ശിഖര് ധവാന്റെയും 11.14 കോടി രൂപയുടെ സ്വത്തുക്കള് കണ്ടുകെട്ടി ; ഓണ്ലൈന് ബെറ്റിംഗ് ആപ്പ് കള്ളപ്പണം വെളുപ്പിക്കലെന്ന് കേസ്
ന്യൂഡല്ഹി: നിയമവിരുദ്ധമായ ഓണ്ലൈന് ബെറ്റിംഗ് ആപ്പുമായി ബന്ധപ്പെട്ട കള്ളപ്പണം വെളുപ്പിക്കല് കേസില് മുന് ഇന്ത്യന് താരങ്ങളായ സുരേഷ് റെയ്നയുടേയും ശിഖര് ധവാന്റെയും 11.14 കോടി രൂപയുടെ സ്വത്തുക്കള് കണ്ടുകെട്ടി. ശിഖര് ധവാന്റെ 4 .5 കോടി വിലമതിയ്ക്കുന്ന സ്ഥാപന സ്വത്തുക്കളും സുരേഷ് റെയ്നയുടെ 6.64 കോടി രൂപയുടെ സ്വത്തുക്കളാണ് കണ്ടുകെട്ടിയിരിക്കുന്നത്.
വണ്എക്സ് ബെറ്റ് എന്ന ഓണ്ലൈന് വാതുവെപ്പ് ആപ്പിനെതിരായ കേസിലാണ് നടപടി. ബെറ്റിങ് ആപ്പിനെ പ്രോത്സാഹിപ്പിക്കുന്നതിന് വേണ്ടി ഇരുവരും അറിഞ്ഞുകൊണ്ട് കരാറില് ഏര്പ്പെട്ടുവെന്ന് ഇ ഡി നേരത്തെ കണ്ടെത്തിയിരുന്നു. ഉപയോക്താക്കളെ വഞ്ചിക്കുകയും ഗണ്യമായ നികുതി വെട്ടിപ്പ് നടത്തുകയും ചെയ്തതായാണ് ആപ്പിനെതിരായ ആരോപണം.
വാതുവെപ്പ് പ്ലാറ്റ്ഫോമായ വണ്എക്സ് ബെറ്റുമായി ബന്ധപ്പെട്ട കള്ളപ്പണം വെളുപ്പിക്കല് അന്വേഷണവുമായി ബന്ധപ്പെട്ട് മുന് ഇന്ത്യന് ക്രിക്കറ്റ് താരം ശിഖര് ധവാനെ ഇ ഡി സമന്സ് അയച്ചിരുന്നു. ക്രിക്കറ്റ് താരങ്ങള്ക്കപ്പുറത്തേക്ക് അന്വേഷണം വ്യാപിക്കാനാണ് നീക്കം, ടെക് കമ്പനികളായ ഗൂഗിള്, മെറ്റ എന്നിവയുടെ പ്രതിനിധികളെയും ഇ ഡി ചോദ്യം ചെയ്യുമെന്നും റിപ്പോര്ട്ടുകളുണ്ട്.
