എത്തിയത് പരാതി നല്കാനെന്ന വ്യാജേന; ജനസമ്പര്ക്ക പരിപാടിക്കിടെ ഡല്ഹി മുഖ്യമന്ത്രിയുടെ കരണത്തടിച്ചു; യുവാവ് അറസ്റ്റില്
ന്യൂഡല്ഹി: മുഖ്യമന്ത്രി രേഖ ഗുപ്തയ്ക്കു നേരെ ആക്രമണം. ഔദ്യോഗിക വസതിയില് നടന്ന ജനസമ്പര്ക്ക പരിപാടിയില് വച്ചാണ് ആക്രമണം ഉണ്ടായത്. പരാതി നല്കാനെന്ന വ്യാജേന അടുത്തെത്തിയ ആള് മുഖ്യമന്ത്രിയുടെ കരണത്ത് അടിച്ചതിനുശേഷം മുടിപിടിച്ചു വലിച്ചതായി ദേശീയ മാധ്യമങ്ങള് റിപ്പോര്ട്ടു ചെയ്തു. 35 വയസ്സുകാരനാണ് ആക്രമിക്കാന് ശ്രമിച്ചതെന്ന് പൊലീസ് പറഞ്ഞു. ഇയാളെക്കുറിച്ചുള്ള വിവരങ്ങള് പൊലീസ് പുറത്തുവിട്ടിട്ടില്ല. രേഖ ഗുപ്തയെ ആശുപത്രിയില് പ്രവേശിപ്പിച്ചു. ബിജെപി ഡല്ഹി ഘടകമാണ് ഈ സംഭവത്തെക്കുറിച്ച് സമൂഹമാധ്യമത്തിലൂടെ അറിയിച്ചത്. രേഖ ഗുപ്തയുടെ പരുക്ക് ഗുരുതരമല്ലെന്ന് ബിജെപി ഡല്ഹി അധ്യക്ഷന് മാധ്യമങ്ങളോട് പറഞ്ഞു.
കസ്റ്റഡിയിലുള്ള ആളെ ചോദ്യം ചെയ്യുകയാണ്. എന്തിനാണ് ആക്രമണം നടത്തിയതെന്നതില് വ്യക്തതയില്ല. രേഖ ഗുപ്ത സ്വന്തം വസതിയില് എല്ലാ ബുധനാഴ്ചകളിലും രാവിലെ ജനങ്ങളെ കണ്ട് പരാതികള് സ്വീകരിക്കാറുണ്ട്. ‘യോഗത്തില് പങ്കെടുത്ത ഒരാള് മുഖ്യമന്ത്രിയെ ആക്രമിച്ചു. ഡോക്ടര്മാര് മുഖ്യമന്ത്രിയെ പരിശോധിക്കുകയാണ്. ഈ ആക്രമണത്തെ പാര്ട്ടി അപലപിക്കുന്നു. അക്രമം രാഷ്ട്രീയ പ്രേരിതമായിരുന്നോ എന്ന് അന്വേഷിക്കണം’ മുതിര്ന്ന ബിജെപി നേതാവ് ഹരീഷ് ഖുറാന പറഞ്ഞു.
സംഭവത്തില് സുരക്ഷാ വീഴ്ചയുണ്ടായതായി ആരോപണം ഉയര്ന്നിട്ടുണ്ട്. ഉന്നത പൊലീസ് ഉദ്യോഗസ്ഥര് സ്ഥലത്തെത്തി. പ്രകോപനമില്ലാതെ മുഖ്യമന്ത്രിയെ ആക്രമിക്കുകയായിരുന്നെന്ന് ദൃക്സാക്ഷികള് പറഞ്ഞു. വിവിധ രാഷ്ട്രീയ പാര്ട്ടികള് സംഭവത്തെ അപലപിച്ചു. സംഭവം ദൗര്ഭാഗ്യകരമാണെന്ന് കോണ്ഗ്രസ് പ്രതികരിച്ചു.
