പൊതു ആവശ്യത്തിനു ഭൂമി ഏറ്റെടുക്കല്: വീടും ജീവനോപാധിയും നഷ്ടപ്പെടുന്നവരെ പുനരധിവസിപ്പിച്ചാല് മതിയെന്ന് സുപ്രീം കോടതി; ചട്ട പ്രകാരമുള്ള നഷ്ടപരിഹാരത്തിന് എല്ലാവര്ക്കും അവകാശം
ന്യൂഡല്ഹി: പൊതു ആവശ്യങ്ങള്ക്ക് ഭൂമിയേറ്റെടുക്കുമ്പോള് വീടും ജീവനോപാധിയും നഷ്ടപ്പെടുന്നവരെ മാത്രം പുനരധിവസിപ്പിച്ചാല് മതിയെന്ന് സുപ്രീംകോടതി. ഭൂമി ഏറ്റെടുക്കുമ്പോള് ചട്ടപ്രകാരമുള്ള നഷ്ടപരിഹാരത്തുകയ്ക്ക് എല്ലാവര്ക്കും അവകാശമുണ്ട്. എന്നാല്, ഭൂമി ഏറ്റെടുക്കലില് വീടും ജീവനോപാധിയും നഷ്ടപ്പെടുന്നവര്ക്ക് മാത്രമേ പുനരധിവാസത്തിന് അര്ഹതയുണ്ടായിരിക്കൂ. അപൂര്വങ്ങളില് അപൂര്വമായി മാത്രമേ പുനരവധിവാസ പദ്ധതികള് പാടുള്ളൂവെന്നും ജസ്റ്റിസുമാരായ ജെ ബി പര്ദിവാല, ആര് മഹാദേവന് എന്നിവരുടെ ബെഞ്ച് ഉത്തരവിട്ടു.
ഭൂമി വിട്ടുനല്കിയവര്ക്ക് 1992ലെ നയപ്രകാരം നഷ്ടപരിഹാരത്തിന് പുറമേ പുനരധിവാസവും നടപ്പാക്കണമെന്ന ഹരിയാന ഹൈക്കോടതി വിധി റദ്ദാക്കിയാണ് സുപ്രീംകോടതിയുടെ വിധി. ഹരിയാന നഗര വികസന അതോറിറ്റിയുടെ അപ്പീലാണ് പരിഗണിച്ചത്. എങ്കിലും, പ്രസ്തുത കേസിലെ ഹര്ജിക്കാര്ക്ക് 2016ലെ നയത്തിന്റെ അടിസ്ഥാനത്തില് പകരം ഭൂമി ലഭ്യമാക്കണമെന്നും ഉത്തരവിട്ടിട്ടുണ്ട്.
നഷ്ടപരിഹാരത്തുകയ്ക്ക് പുറമേ പുനരധിവാസം നടപ്പാക്കുന്നുണ്ടെങ്കില് മാനുഷിക പരിഗണനയിലും, ഭൂവുടമകള്ക്ക് നീതി ഉറപ്പാക്കാനും മാത്രമായിരിക്കണം. അനാവശ്യമായി പ്രീണന പുനരധിവാസ പദ്ധതികള് പ്രഖ്യാപിക്കരുത്. സംസ്ഥാനങ്ങളുടെ പ്രീണന പദ്ധതികളെച്ചൊല്ലി വലിയ നിയമയുദ്ധങ്ങളാണ് നടക്കുന്നത് -ഉത്തരവില് പറഞ്ഞു.
