അബ്ദുല് റഹീമിന് തിരിച്ചടി: തടവ് 20 വര്ഷം തന്നെ; സൗദി കീഴ്ക്കോടതി വിധി അപ്പീല് കോടതി ശരിവെച്ചു
റിയാദ്: സൗദി ജയിലില് കഴിയുന്ന കോഴിക്കോട് സ്വദേശി അബ്ദുല് റഹീമിന്റെ കേസില് കീഴ്കോടതി വിധി ശരിവെച്ച് അപ്പീല് കോടതിയുടെ ഉത്തരവ്. മെയ് 26 നാണ് 20 വര്ഷത്തെ തടവിന് വിധിച്ചുള്ള കീഴ്ക്കോടതി വിധിയുണ്ടായത്. വിധിക്ക് ശേഷം പ്രോസിക്യൂഷന് അപ്പീല് സമര്പ്പിച്ചതിനെ തുടര്ന്നാണ് ഇന്ന് രാവിലെ 11 മണിക്ക് അപ്പീല് കോടതിയില് സിറ്റിങ് ഉണ്ടായത്.
19 വര്ഷം പിന്നിട്ട പ്രതിക്ക് മോചനം അനുവദിക്കണമെന്ന് പ്രതിഭാഗം ആവശ്യപ്പെട്ടെങ്കിലും കോടതി പരിഗണിച്ചില്ല. എന്നാല് ആവശ്യമെങ്കില് പ്രതിഭാഗത്തിന് മേല്ക്കോടതിയെ സമീപിക്കാം എന്നും കോടതി പറഞ്ഞു.
റഹീമിന്റെ അഭിഭാഷകാരും ഇന്ത്യന് എംബസ്സി പ്രതിനിധി സവാദ് യൂസഫും റഹീം കുടുംബ പ്രതിനിധി സിദ്ദീഖ് തുവ്വൂരും ഓണ്ലൈന് കോടതിയില് ഹാജരായിരുന്നു. കീഴ്ക്കോടതി വിധി ശരിവെച്ച അപ്പീല് കോടതിയുടെ വിധി ആശ്വാസകരമാണെന്ന് വിധിക്ക് ശേഷം റിയാദ് റഹീം സഹായ സമിതി അറിയിച്ചു.
