ഹൈദരാബാദ്: തെലങ്കാന മുഖ്യമന്ത്രി രേവന്ത് റെഡ്ഡിക്കെതിരെ അപകീര്ത്തിപരമായ പരാമര്ശം പങ്കുവച്ചെന്ന് ആരോപിച്ച് മുതിര്ന്ന വനിതാ മാധ്യമപ്രവര്ത്തക അറസ്റ്റില്. ഇന്നു പുലര്ച്ചെ ഹൈദാരാബാദിലെ വീടു വളഞ്ഞാണ് മാധ്യമപ്രവര്ത്തക രേവതി പൊഗദാദന്തയെ പൊലീസ് കസ്റ്റഡിയില് എടുത്തത്. രേവന്ത് റെഡ്ഡിക്കെതിരെ പള്സ് ന്യൂസ് ബ്രേക്ക് എന്ന യുട്യൂബ് ചാനലില് പങ്കുവച്ച വിഡിയോയാണ് വിവാദമായത്.
രേവതിയുടെ യുട്യൂബ് ചാനലിന്റെ ഓഫീസ് പൊലീസ് സീല് ചെയ്തതായാണ് വിവരം. ഇവരുടെയും ഭര്ത്താവിന്റെയും ലാപ്ടോപ്പും മൊബൈല് ഫോണുകളും പൊലീസ് കൈക്കലാക്കി. പൊലീസ് പുലര്ച്ചെ നാലോടെ വീട്ടിലെത്തിയ വിഡിയോയും രേവതി പങ്കുവച്ചിട്ടുണ്ട്.
രേവതിയുടെ ചാനലില് ഒരു വയോധികന് മുഖ്യമന്ത്രിക്കെതിരെ നടത്തിയ പരാമര്ശങ്ങളാണ് വിവാദമായത്. സംസ്ഥാനത്ത് അരങ്ങേറുന്ന വിവിധ വിഷയങ്ങളിലുള്ള തന്റെ പ്രതിഷേധമാണ് അയാള് വീഡിയോയില് പറയുന്നത്. കോണ്ഗ്രസ് നേതാക്കളുടെ പരാതിയിലാണ് പൊലീസ് കേസെടുത്തത്.
