ചൂട് കൂടുന്നു; തിരക്കേറി കോട്ടയം-ആലപ്പുഴ ബോട്ട് യാത്ര

 ചൂട് കൂടിയതോടെ സഞ്ചാരികളുടെ ഇടയിൽ സൂപ്പർ ഹിറ്റാണ് ഇപ്പോൾ കോട്ടയം കോടിമത ബോട്ട് ജെട്ടിയിൽ നിന്നും ആലപ്പുഴയിലേക്ക് പോകുന്ന ഈ ബോട്ട് യാത്ര. വ്യത്യസ്തമായ കാഴ്ചകളിലൂടെ സഞ്ചാരികളെ കൊണ്ടുപോകുന്ന ഈ‌ ബോട്ട് യാത്രയ്ക്ക് ഒരു സൈഡിലേക്ക് വെറും 29 രൂപ മാത്രമാണുള്ളത് .കായൽ യാത്രയുടെ സുഖത്തിനൊപ്പം തീരത്തിന്റെ ഭംഗി ആസ്വദിക്കാം എന്നതാണ് ഇതിന്റെ പ്രത്യേകത. അതുകൊണ്ടുതന്നെ നിരവധി ആളുകളാണ് വാരാന്ത്യങ്ങളിലും മറ്റു ദിവസങ്ങളിലും ഈ യാത്രയ്ക്കായി എത്തുന്നത്.

 മൂന്ന് ബോട്ടുകളാണ് വിവിധ സമയങ്ങളിൽ ഈ‌ റൂട്ടിൽ സർവീസ് നടത്തുന്നത്.പെട്ടെന്ന് പ്ലാൻ ചെയ്തുപോയി ടിക്കറ്റ് കിട്ടിയില്ലെങ്കിലോ എന്നോർത്ത് ദൂരെനിന്നു വരുന്നവർ വിഷമിക്കേണ്ടതില്ല. മുൻകൂട്ടി ബുക്ക് ചെയ്യുവാനും, ഇനി കൂടുതൽ ആളുകളുണ്ടെങ്കിൽ അധിക സർവീസുകൾ നടത്തുവാനും അധികൃതർ റെഡിയാണ്.

 കാഞ്ഞിരം, വെട്ടിക്കാട്, ആർ ബ്ലോക്ക്, പുന്നമട തുടങ്ങിയ  സ്ഥലങ്ങളെല്ലാം ഈ യാത്രയിൽ കാണാം. യാത്രയിൽ എവിടെ നോക്കിയാലും കാഴ്ചകളായതിനാൽ മനസ്സുനിറഞ്ഞ് കാണുകയും ഫോൺ നിറയെ പകർത്തുകയും ചെയ്യാം.രണ്ടര മണിക്കൂറാണ് യാത്രാ സമയം.

 

ബോട്ട് സമയം കോട്ടയത്ത് നിന്ന്
6.45am, 11.30am, 1.00pm, 3.30pm, 5.15pm.

 

ആലപ്പുഴയിൽ നിന്ന് 7.15am, 9.30 am, 11.30am,2.30pm. 5.15pm