ലോകമെമ്പാടുമുള്ള വൻ കമ്പനികൾ 2022ൽ ആരംഭിച്ച കൂട്ട പിരിച്ചുവിടൽ 2023 ലും ആവർത്തിക്കുന്നു. ഫിൻ‌ടെക് സ്റ്റാർട്ടപ്പായ പേടിഎമിന്റെ (Paytm) മാതൃ കമ്പനിയായ വൺ 97 കമ്മ്യൂണിക്കേഷൻസ് 1000ലധികം ജീവനക്കാരെ പിരിച്ചുവിട്ടതായി ഇക്കണോമിക് ടൈംസ് റിപ്പോർട്ട് ചെയ്തു. കഴിഞ്ഞ കുറച്ച് മാസങ്ങളായി കമ്പനിയുടെ വിവിധ യൂണിറ്റുകളിൽ പിരിച്ചുവിടൽ നടന്നതായാണ് വിവരം. വരും മാസങ്ങളിൽ കമ്പനിയിലുടനീളം കൂടുതൽ പിരിച്ചുവിടൽ ഉണ്ടാകുമെന്നും പറയുന്നു.
കാരണമായതെന്ത്?
‘ബൈ നൗ പേ ലേറ്റർ’ (Buy Now Pay Later) എന്ന സേവനം അവസാനിപ്പിച്ച് ചെറിയ തോതിലുള്ള വായ്പകൾ നൽകുന്ന ബിസിനസിൽ നിന്ന് പിന്മാറിയതിനാലാണ് പേടിഎം ഈ പിരിച്ചുവിടൽ നടത്തിയതെന്നാണ് കരുതുന്നത്. രാജ്യത്ത് വർധിച്ചുവരുന്ന സുരക്ഷിതമല്ലാത്ത വായ്പകൾ കുറയ്ക്കുന്നതിന് അടുത്തിടെ റിസർവ് ബാങ്ക് പുതിയ മാർഗനിർദേശങ്ങൾ പുറപ്പെടുവിച്ചിരുന്നു. ഇതിനുശേഷം, ക്രെഡിറ്റ് കാർഡുകൾ നൽകുന്നതിനും വ്യക്തിഗത വായ്പകൾ വിതരണം ചെയ്യുന്നതിനും മിക്ക ഇലക്ട്രോണിക്സ് സാധനങ്ങൾ വാങ്ങുന്നതിനും ബാങ്കുകൾ ഉപയോഗിച്ചിരുന്ന ബൈ നൗ പേ ലേറ്റർ സേവനത്തെ ബാധിച്ചു.
ഡിജിറ്റൽ കമ്പനികളിലെ ഏറ്റവും വലിയ പിരിച്ചുവിടൽ
ഈ വർഷത്തെ ഡിജിറ്റൽ കമ്പനികളിലെ ഏറ്റവും വലിയ പിരിച്ചുവിടലുകളിൽ ഒന്നാണ് പേടിഎമ്മിലെ പുതിയ നടപടി. കമ്പനിയുടെ മൊത്തം തൊഴിലാളികളുടെ 10 ശതമാനമാണിത്. മിക്ക പിരിച്ചുവിടലുകളും വായ്പ ബിസിനസ് യൂണിറ്റിൽ നിന്നായിരിക്കാമെന്നാണ് നിഗമനം. എന്നിരുന്നാലും, പിരിച്ചുവിടൽ സംബന്ധിച്ച് പേടിഎം ഇതുവരെ ഔദ്യോഗികമായി ഒന്നും പറഞ്ഞിട്ടില്ല.
ഗൂഗിൾ 30,000 പേരെ പിരിച്ചുവിടും
അതിനിടെ, ലോകത്തിലെ ഏറ്റവും വലിയ സെർച്ച് എൻജിനായ ഗൂഗിളുമായി ബന്ധപ്പെട്ട ഒരു വാർത്ത കൂടിയുണ്ട്. ഗൂഗിൾ ആർട്ടിഫിഷ്യൽ ഇന്റലിജൻസ് അതിവേഗം വികസിപ്പിച്ചെടുത്തിട്ടുണ്ട്, ഇതുമൂലം വരും ദിവസങ്ങളിൽ പരസ്യ വിൽപ്പന വിഭാഗത്തിൽ നിന്ന് ഗൂഗിൾ ഏകദേശം 30,000 പേരെ പിരിച്ചുവിട്ടേക്കുമെന്ന് ‘ദ ഇൻഫർമേഷൻ’ റിപ്പോർട്ട് ചെയ്തു. ഈ വർഷം ആദ്യം കമ്പനി 12,000 പേരെ ജോലിയിൽ നിന്ന് പിരിച്ചുവിട്ടിരുന്നു.
