കോഴിക്കോട്: മുത്തപ്പന്‍പുഴ മൈനാവളവില്‍ നാലുവയസ്സ് പ്രായമുള്ള പുള്ളിപ്പുലിയെ ചത്ത നിലയില്‍ കണ്ടെത്തി. പുലര്‍ച്ചെ പാല്‍ സംഭരിക്കാന്‍ പോയ ഓട്ടോക്കാരനാണ് മൈനവളവു ഭാഗത്ത് റോഡരികില്‍ ചത്ത നിലയില്‍ പുള്ളിപ്പുലിയെ കണ്ടത്. മുള്ളന്‍പന്നിയുടെ ആക്രമണത്തിലാണ് പുള്ളിപ്പുലി ചത്തതെന്നാണ് പ്രാഥമിക നിഗമനം. ചത്ത പുള്ളിപ്പുലിയുടെ ദേഹത്ത് നിരവധി മുള്ളുകള്‍ തറച്ചിട്ടുണ്ട്. മുമ്പ് പലപ്പോഴും മുത്തപ്പുഴ -മറിപ്പുഴ ഭാഗത്ത് പുള്ളിപ്പുലിയുടെ ആക്രമണം നടന്നതായി പരാതി ഉയര്‍ന്നിരുന്നു.
രണ്ടുമാസം മുമ്പ് ഒരു കര്‍ഷകന്റെ മൂരി കിടാവിനെ പുള്ളിപ്പുലി ആക്രമിച്ച് കൊന്നിരുന്നു. പ്രദേശത്തിന്റെ പല ഭാഗത്തും പുള്ളിപ്പുലിയെ കണ്ടിരുന്നതായി നാട്ടുകാര്‍ നേരത്തെ പറഞ്ഞിരുന്നുവെങ്കിലും ഇത് സംബന്ധിച്ച കാര്യക്ഷമമായി അന്വേഷണം നടന്നിരുന്നില്ലയെന്നാണ് നാട്ടുകാരുടെ പരാതി.
