കാഠ്മണ്ഡു: അണ്ടര്‍ 19 സാഫ് കപ്പില്‍ ഇന്ത്യക്ക് കിരീടം. ഫൈനലില്‍ പാകിസ്താനെ എതിരില്ലാത്ത മൂന്ന് ഗോളുകള്‍ക്ക് തകര്‍ത്താണ് ഇന്ത്യ ജേതാക്കളായത്. കീപ്ഗന്‍(2) ഗൊയാറിയ(1) എന്നിവരാണ് ഇന്ത്യക്ക് വേണ്ടി ഗോളുകൾ നേടിയത്.
മത്സരത്തിന്റെ ആദ്യ പകുതി ഗോള്‍ രഹിതമായി അവസാനിച്ച ശേഷം 64-ാം മിനിറ്റിലാണ് ഇന്ത്യ ആദ്യ ഗോള്‍ നേടിയത്. പെനാല്‍റ്റി ബോക്‌സിന് പുറത്തുനിന്ന് ഒരു മനോഹരമായ വോളിയിലൂടെ കീപ്ഗന്‍ ആണ് ഇന്ത്യയ്ക്ക് ലീഡ് സമ്മാനിക്കുന്നത്.
85-ാം മിനിറ്റില്‍ കീപ്ഗനിലൂടെ ഇന്ത്യ ലീഡ് ഇരട്ടിയാക്കി. ഫ്രീകിക്കിലൂടെയായിരുന്നു കീപ്ഗന്‍ രണ്ടാം ഗോള്‍ നേടിയത്. ഇഞ്ച്വറി ടൈമില്‍ ഗൊയാറിയിലൂടെ മൂന്നാം ഗോള്‍ നേടിയതോടെ ഇന്ത്യ വിജയവും കിരീടവും ഉറപ്പിച്ചു. സെമിയില്‍ നേപ്പാളിനെ തകര്‍ത്താണ് ഇന്ത്യ ഫൈനലിലെത്തിയത്.
ജൂലൈയിൽ നടന്ന സാഫ് സീനിയർ കപ്പ് ഫുട്ബോൾ കിരീടവും ഇന്ത്യ നേടിയിരുന്നു. ഫൈനലിൽ കുവൈറ്റിനെ സഡൻ ഡെത്തിൽ തോൽപ്പിച്ചായിരുന്നു കിരീടനേട്ടം.
