കോട്ടയം: തലയോലപ്പറമ്പില്‍ സ്വകാര്യ പണമിടപാട് സ്ഥാപനത്തിലെ ജീവനക്കാരികള്‍ 42.72 ലക്ഷം രൂപയുടെ തട്ടിപ്പ് നടത്തിയതായി പരാതി. ഉടമയുടെ പരാതിയില്‍ ഡിവൈഎഫ്‌ഐ മേഖലാ ജോയിന്റ് സെക്രട്ടറി പുത്തന്‍പുരയ്ക്കല്‍ കൃഷ്ണേന്ദു, വൈക്കപ്രയാര്‍ സ്വദേശിനി ദേവി പ്രജിത്ത് എന്നിവരുടെ പേരില്‍ തലയോലപ്പറമ്പ് പൊലീസ് കേസെടുത്ത് അന്വേഷണം ആരംഭിച്ചു.
ഉദയംപേരൂര്‍ തെക്കേ പുളിപ്പറമ്പില്‍ പി. എം. രാഗേഷിന്റെ ഉടമസ്ഥതയില്‍ തലയോലപ്പറമ്പില്‍ പ്രവര്‍ത്തിക്കുന്ന യുണൈറ്റഡ് ഫിന്‍ ഗോള്‍ഡ് എന്ന ധനകാര്യ സ്ഥാപനത്തിന്റെ ബ്രാഞ്ച് ഇന്‍ ചാര്‍ജും ഗോള്‍ഡ് ഓഫിസറുമായ കൃഷ്ണേന്ദുവും ഗോള്‍ഡ് ലോണ്‍ ഓഫിസര്‍ ദേവി പ്രജിത്തും ചേര്‍ന്നു തട്ടിപ്പ് നടത്തിയെന്ന പരാതിയിലാണ് അന്വേഷണം.
ഉപയോക്താക്കള്‍ പണയ ഉരുപ്പടികള്‍ തിരിച്ചെടുക്കുമ്പോള്‍ നല്‍കുന്ന പണം ഇക്കഴിഞ്ഞ ഏപ്രില്‍ മുതല്‍ സ്ഥാപനത്തിന്റെ അക്കൗണ്ടില്‍ ഇവര്‍ അടച്ചിരുന്നില്ല.19 ഉപയോക്താക്കളില്‍ നിന്നായി വാങ്ങിയ 42.72 ലക്ഷം രൂപയാണ് തട്ടിയെടുത്ത്. ഈ പണം കൃഷ്ണേന്ദു സ്വന്തം അക്കൗണ്ടിലേക്കും ബന്ധുക്കളുടെ അക്കൗണ്ടിലേക്കും മാറ്റി. ഉപയോക്താക്കള്‍ പണം നല്‍കിയത് സ്ഥാപന ഉടമ കണ്ടുപിടിക്കാതിരിക്കാന്‍ സ്ഥാപനത്തിന്റെ സിസി ടിവി ക്യാമറ കേടുവരുത്തിയെന്നും പരാതിയുണ്ട്.
കൃഷ്ണേന്ദുവിന്റെ ഭര്‍ത്താവ് അനന്തു ഉണ്ണി സിപിഎം തലയോലപ്പറമ്പ് ലോക്കല്‍ കമ്മിറ്റി മുന്‍ അംഗമാണ്. സാമ്പത്തിക ക്രമക്കേടിന്റെ പേരില്‍ അനന്തു ഉണ്ണിയെ പാര്‍ട്ടിയുടെ പ്രാഥമികാംഗത്വത്തില്‍ നിന്ന് 6 മാസം മുന്‍പ് സസ്‌പെന്‍ഡ് ചെയ്തിരുന്നുവെന്നു സിപിഎം തലയോലപ്പറമ്പ് ഏരിയ സെക്രട്ടറി കെ. ശെല്‍വരാജ് അറിയിച്ചു. ഒരു വര്‍ഷത്തിനുള്ളില്‍ വിവിധ ബാങ്കുകളിലായി കൃഷ്ണേന്ദു 10 കോടി രൂപയ്ക്കു മുകളില്‍ ഇടപാട് നടത്തിയതായി കണ്ടെത്തിയിട്ടുണ്ടെന്ന് സ്ഥാപന ഉടമ രാഗേഷ് പറഞ്ഞു.
