ദുബായ്: ഐഫോണ്‍ 15ന്റെ വില്‍പ്പന ആരംഭിച്ചതോടെ ദുബായ് മാളിലെ ആപ്പിള്‍ സ്റ്റോറിലേക്ക് ഉപഭോക്താക്കളുടെ ഒഴുക്ക്. ഏതാനും ദിവസം മുമ്പ് വിപണിയിലെത്തിയ പുതിയ മോഡല്‍ ഫോണ്‍ വെള്ളിയാഴ്ച മുതലാണ് ഷോറൂമുകളില്‍ ഔദ്യോഗികമായി വില്‍പ്പന ആരംഭിച്ചത്. എന്നാല്‍ ആപ്പിള്‍ പ്രേമികള്‍ തലേന്ന് തന്നെ സ്റ്റോറിന് പുറത്ത് അണിനിരന്നതായി സോഷ്യല്‍ മീഡിയ പ്ലാറ്റ്ഫോമുകളില്‍ പ്രചരിച്ച വീഡിയോകള്‍ കാണിക്കുന്നു.
ഏറെ പ്രതീക്ഷയോടെ കാത്തിരുന്ന ഐഫോണ്‍ 15 സീരീസ് ആദ്യമായി വാങ്ങാന്‍ നൂറുകണക്കിന് ആളുകള്‍ ദുബായ് മാളിലെ ആപ്പിള്‍ സ്റ്റോറിന് മുന്നില്‍ ക്യൂ നില്‍ക്കുകയാണ്. ജനക്കൂട്ടം മുന്നോട്ട് കുതിച്ചപ്പോള്‍ നിയന്ത്രിക്കാനായി സുരക്ഷാ ഉദ്യോഗസ്ഥര്‍ ബാരിക്കേഡുകള്‍ സ്ഥാപിക്കുന്നതും കാണാം.
3,399 ദിര്‍ഹം (76,748 രൂപ) മുതല്‍ 6,799 ദിര്‍ഹം (1,53,519 രൂപ) വരെയാണ് ഫോണുകളുടെ വില. നിരവധി ഉപഭോക്താക്കള്‍ക്ക് ഇന്ന് പുതിയ ഐഫോണില്‍ തൊടാനും പുതിയ സവിശേഷതകള്‍ അനുഭവിച്ചറിയാനും സാധിച്ചു. യുഎഇയിലെത്തിയ ഈജിപ്ഷ്യന്‍ വിനോദസഞ്ചാരികള്‍ 22.58 ലക്ഷം രൂപ (100,000 ദിര്‍ഹം ) നല്‍കി 11 ഐഫോണുകള്‍ വാങ്ങിയതായി ഖലീജ് ടൈംസ് റിപ്പോര്‍ട്ട് ചെയ്തു.
ഐഫോണ്‍ 15 മോഡലുകള്‍ പുറത്തിറക്കിയതിന് തൊട്ടുപിന്നാലെ വിവിധ രാജ്യങ്ങളില്‍ നിന്നുള്ള ടെക് പ്രേമികള്‍ ഏറ്റവും പുതിയ ഫോണിനായി ദുബായില്‍ എത്തിയിരുന്നു. നികുതി കുറവും ലഭ്യതയും കാരണമാണ് ഇന്ത്യ, പാകിസ്ഥാന്‍, യൂറോപ്പ് എന്നിവിടങ്ങളില്‍ നിന്നുള്ളവര്‍ ദുബായിലെത്തുന്നത്. യുഎഇയില്‍ ഐഫോണ്‍ 15 സീരീസിനുള്ള ബുക്കിങ് സെപ്റ്റംബര്‍ 15ന് ആരംഭിച്ചിരുന്നു. മൂന്നോ നാല് ഫോണുകള്‍ വാങ്ങാനായാല്‍ യുഎഇയിലെത്തി തിരിച്ചുപോകുന്നതിന്റെ ചെലവും ഇന്ത്യയിലെ ഫോണിന്റെ വിലയും തുല്യമാവുമെന്നാണ് ആപ്പിള്‍ പ്രേമികള്‍ പറയുന്നത്.
