വർദ്ധിച്ചുവരുന്ന പെട്രോൾ വില സാധാരണക്കാരുടെ ബജറ്റിനെ താറുമാറാക്കുന്നു. അത്തരമൊരു സാഹചര്യത്തിൽ, ദൈനംദിന ഓഫീസ് അല്ലെങ്കിൽ മറ്റ് ജോലികൾക്ക് ഉയർന്ന മൈലേജ് നൽകുന്ന ഒരു ഇരുചക്രവാഹനം ആവശ്യമാണ്. ഇക്കാലത്ത്, വർദ്ധിച്ചുവരുന്ന നഗര ഗതാഗതവും ഇന്ധന വിലയും കാരണം ഒരു ബൈക്കിന്റെ മൈലേജ് നിലനിർത്താൻ ബുദ്ധിമുട്ടാണ്. തങ്ങൾക്ക് മികച്ച ബ്രാൻഡഡ് ബൈക്കുകൾ സ്വന്തമായുണ്ടെങ്കിലും അവയ്‌ക്കായി ദിവസേന അമിത തുക ചെലവഴിക്കുന്നതായി പല ബൈക്ക് ഉടമകളും പരാതിപ്പെടുന്നു.
തങ്ങളുടെ ചെലവുകളിൽ ഭൂരിഭാഗവും തങ്ങളുടെ ബൈക്കിന് വേണ്ടി മുടക്കുന്നതായി തോന്നുന്നതായും മൈലേജ് കുറവായതാണ് ഇതിന് മൂലകാരണമെന്നും പലരും പരാതി പറയുന്നു. ബൈക്ക് മൈലേജ് എങ്ങനെ മെച്ചപ്പെടുത്താമെന്ന് നിങ്ങൾ എപ്പോഴെങ്കിലും ചിന്തിച്ചിട്ടുണ്ടോ? ചില ലളിതമായ നുറുങ്ങുകൾ സ്വീകരിക്കുകയാണെങ്കിൽ, നമ്മുടെ പഴയ സ്‍കൂട്ടറിനോ ബൈക്കിനോ പുതിയത് പോലെ മൈലേജ് നൽകാനാകും. ഇതാ ഇരുചക്ര വാഹനങ്ങളുടെ മൈലേജ് വർധിപ്പിക്കാൻ സഹായിക്കുന്ന ചില എളുപ്പവഴികൾ അറിയാം.
കൃത്യസമയത്ത് സർവ്വീസ്
ഇരുചക്ര വാഹനങ്ങൾ കൃത്യസമയത്ത് സർവീസ് നടത്തണം. എയർ ഫിൽട്ടർ, എഞ്ചിൻ ഓയിൽ, സ്‍പാർക്ക് പ്ലഗുകൾ എന്നിവ പരിശോധിക്കുക. എഞ്ചിൻ ഓയിൽ വളരെ പഴയതോ വൃത്തിഹീനമോ ആകുമ്പോൾ, അത് എഞ്ചിൻ ഭാഗങ്ങളെ നശിപ്പിക്കാൻ തുടങ്ങുന്നു. ഇത് മൈലേജിനെ ബാധിക്കുന്നു.
ടയർ മർദ്ദം
ടയറിലെ വായു മർദ്ദം ശരിയായിരിക്കണം. വായു കുറവായതിനാൽ എഞ്ചിനിൽ മർദ്ദം ഉണ്ടാകുന്നു. ഇത് മൈലേജ് കുറയ്ക്കുന്നു. ഇതുകൂടാതെ, അമിതമായി തേഞ്ഞ ടയറുകളും എഞ്ചിനുമേൽ സമ്മർദ്ദം ചെലുത്തുന്നു. മുൻ ടയറിലെ വായു 22 പിഎസ്ഐ മുതൽ 29 പിഎസ്ഐ വരെയും പിന്നിലെ ടയറിൽ 30 പിഎസ്ഐ മുതൽ 35 പിഎസ്ഐ വരെയുമാണ് എന്നാണ് കണക്കുകൾ.
ഓയിൽ ശ്രദ്ധിക്കുക
നിങ്ങളുടെ ഇരുചക്ര വാഹനം വൃത്തിയായി സൂക്ഷിക്കുക. അതിൻറെ ചെയിൻ, എഞ്ചിൻ, മറ്റ് ഭാഗങ്ങൾ എന്നിവയിൽ ഓയിൽ നിറയ്ക്കുക. ഡിസ്‍ക് ബ്രേക്കിന്റെ ലൂബ്രിക്കൻറ് കുറയ്ക്കാൻ അനുവദിക്കരുത്. എഞ്ചിനിൽ ഘർഷണം നിലനിർത്തണം. അല്ലെങ്കിൽ എഞ്ചിൻ കൂടുതൽ പെട്രോൾ ഉപയോഗിക്കും. എഞ്ചിൻ ഓയിൽ പതിവായി മാറ്റണം.
ഇടയ്ക്കിടെ ഗിയർ മാറ്റരുത്
നിശ്ചിത വേഗത അനുസരിച്ച് ബൈക്ക് ഓടിക്കുക. ഉയർന്ന വേഗതയിൽ ഇടയ്ക്കിടെയുള്ള ബ്രേക്കിംഗ്, ഉയർന്ന വേഗതയിൽ ഇടയ്ക്കിടെയുള്ള ഗിയർ മാറ്റങ്ങൾ എന്നിവ ബൈക്കിൽ അധിക സമ്മർദ്ദം സൃഷ്‍ടിക്കുന്നു. ഇത് മൈലേജിനെ നേരിട്ട് ബാധിക്കുന്നു. ക്ലച്ച് അമർത്തി ബൈക്ക് ഓടിക്കാൻ പാടില്ല.
രണ്ടിൽ കൂടുതൽ യാത്രികർ അരുത്
രണ്ടിൽ കൂടുതൽ യാത്രക്കാരുമായി ഇരുചക്ര വാഹനം ഓടിക്കാൻ പാടില്ല. അധിക ഭാരം എഞ്ചിനും സസ്‌പെൻഷനും സമ്മർദ്ദം ചെലുത്തുന്നു. ഭാരക്കൂടുതൽ നൽകുന്നത് എണ്ണ ഉപഭോഗം വർധിപ്പിക്കുകയും ബൈക്കിൻറെ വിവിധ ഭാഗങ്ങളിൽ കേടുപാടുകൾ സംഭവിക്കുകയും ചെയ്യും.
നല്ല ഗുണനിലവാരമുള്ള ഇന്ധനം
ശരിയായ ഗുണനിലവാരമുള്ള ഇന്ധനം നിറച്ച് നിങ്ങളുടെ ബൈക്കിനെ പരിപാലിക്കേണ്ടതുണ്ട്. തെറ്റിദ്ധരിപ്പിക്കുന്ന ഇന്ധനങ്ങളിൽ നിന്ന് വിട്ടുനിൽക്കുക. മികച്ച എഞ്ചിൻ പ്രകടനത്തിനായി എപ്പോഴും നല്ല നിലവാരമുള്ള പ്രീമിയം ഇന്ധനം തിരഞ്ഞെടുക്കുക.
കിൽ സ്വിച്ച് ഉപയോഗിക്കുക
മിക്ക ട്രാഫിക് സിഗ്നലുകളും ഒരു മിനിറ്റിലധികം നീണ്ടുനിൽക്കും. മുപ്പത് സെക്കൻഡിൽ കൂടുതൽ നിങ്ങളുടെ വാഹനം നിശ്ചലമാകുമെന്ന് ഉറപ്പാണെങ്കിൽ എഞ്ചിൻ കിൽ സ്വിച്ച് ഉപയോഗിച്ച് എഞ്ചിൻ ഓഫ് ചെയ്യുക. ഇത് ഇന്ധനവും എഞ്ചിൻ ആരോഗ്യവും സംരക്ഷിക്കുന്നു.
സൂര്യപ്രകാശത്തിൽ പാർക്കിംഗ് ഒഴിവാക്കുക
മനുഷ്യരെപ്പോലെ ബൈക്കുകളും അധികനേരം വെയിലത്ത് ഇരിക്കാൻ ഇഷ്‍ടപ്പെടുന്നില്ല. സൂര്യപ്രകാശം ഇന്ധനത്തിന്റെ ബാഷ്‍പീകരണത്തിന് കാരണമാകുന്നു. ഇത് മൈലേജ് കുറയ്ക്കുന്നു. പകൽ സമയത്ത് നിങ്ങളുടെ ബൈക്ക് തണലിൽ പാർക്ക് ചെയ്‍തിട്ടുണ്ടെന്ന് ഉറപ്പാക്കുക. ഇത് നിങ്ങളുടെ ബൈക്ക് മൈലേജ് മെച്ചപ്പെടുത്താൻ സഹായിക്കും.
