പൂനെ: ഓസ്കാർ ജേതാവ് സംഗീതസംവിധായകൻ എ ആർ റഹ്മാൻറെ സംഗീത നിശ ഇടയ്ക്ക് വച്ച് അവസാനിപ്പിച്ച് പൂനെ പൊലീസ്. ഞായറാഴ്ചയാണ് സംഭവം. പൂനെ രാജാ ബഹാദൂർ മിൽ റോഡിലെ ദ മിൽസിൽ ഫീഡിംഗ് സ്‌മൈൽസും 2 ബിഎച്ച്‌കെയും സംഘടിപ്പിച്ച സംഗീത നിശയാണ് രാത്രി പത്തുമണിവരെ നൽകിയ സമയപരിധി ലംഘിച്ചതിനെ തുടർന്ന് പൊലീസ് ഇടപെട്ട് നിർത്തിച്ചത്.
Pune police stop AR Rahman concert midway citing court-mandated 10 pm deadline
Read More: https://t.co/syWW1efdqq pic.twitter.com/jSZYm7chZt
— Express PUNE (@ExpressPune) May 1, 2023
എന്നാൽ സംഗീത നിശ ഇടയ്ക്ക് നിർത്തിയതുമായി ബന്ധപ്പെട്ട് സംഘാടകർ ഔദ്യോഗികമായി പ്രതികരിച്ചിട്ടില്ല. എആർ റഹ്മാൻ ഒരു ഗാനം ആലപിക്കുന്ന സമയത്ത് തന്നെ ഒരു പോലീസ് ഉദ്യോഗസ്ഥൻ സ്റ്റേജിൽ കയറി തന്റെ വാച്ച് കാണിച്ച് രാത്രി 10 മണിക്കുള്ള സമയപരിധി ചൂണ്ടിക്കാണിക്കുന്ന വീഡിയോ വൈറലായിട്ടുണ്ട്. ഇതിന് പിന്നാലെ പരിപാടി അവസാനിച്ചുവെന്നാണ് വിവരം.
സുപ്രീം കോടതിയുടെ ഉത്തരവിന് അനുസൃതമായി രാത്രി 10 മണിക്ക് ശേഷം സംഗീത പരിപാടി അനുവദിക്കില്ലെന്ന് പൂനെ സിറ്റി പോലീസിലെ മുതിർന്ന ഉദ്യോഗസ്ഥനെ ഉദ്ധരിച്ച് ഇന്ത്യൻ എക്സ്പ്രസ് റിപ്പോർട്ട് ചെയ്തു. “രാത്രി 10 മണി കഴിഞ്ഞ് കുറച്ച് മിനിറ്റുകൾക്കുള്ളിൽ തന്നെ ഷോ അവസാനിപ്പിച്ച് നിയമം പാലിക്കാൻ പരിപാടിയുടെ സംഘാടകരെ പോലീസ് ഓർമ്മിപ്പിച്ചു. സംഘാടകർ പോലീസുമായി സഹകരിച്ച് പരിപാടി അവസാനിപ്പിച്ചു” പൊലീസ് ഉദ്യോഗസ്ഥൻ സംഭവത്തെക്കുറിച്ച് വിവരിച്ചു.
