കൊല്ലം: പോലീസ് കസ്റ്റഡിയില്‍ നിന്നും വിട്ടയച്ച യുവാവ് തൂങ്ങി മരിച്ച സംഭവത്തില്‍ കൊല്ലം റൂറല്‍ പോലീസ് ഉന്നതതല അന്വേഷണം ആരംഭിച്ചു. യുവാവിന്റെ പിതാവും ബന്ധുക്കളും റൂറല്‍ എസ്പിക്ക് നല്‍കിയ പരാതിയെ തുടര്‍ന്നാണ് അന്വേഷണം ആരംഭിച്ചത്. കൊട്ടാരക്കര ഡിവൈഎസ്പി: ജിഡി വിജയകുമാറും സ്‌പെഷല്‍ ബ്രാഞ്ച് ഡിവൈഎസ്പി: എസ് വിദ്യാധരനുമാണ് അന്വേഷണ ചുമതല
പൂയപ്പള്ളി നെല്ലിപറമ്പ് അജി ഭവനില്‍ ഗോപാലകൃഷ്ണപിള്ളയുടെ മകനും ടാപ്പിംഗ് തൊഴിലാളിയുമായിരുന്ന അജികുമാര്‍ (37) ആണ് കഴിഞ്ഞ വെള്ളിയാഴ്ച പുലര്‍ച്ചെ വീട്ടിലെ കിടപ്പുമുറിയില്‍ തൂങ്ങി മരിച്ച നിലയില്‍ കാണപ്പെട്ടത്. ഭാര്യയുമായുള്ള തര്‍ക്കങ്ങളെ തുടര്‍ന്ന് ഇയാളെ കൊട്ടാരക്കര പോലീസ് കസ്റ്റഡിയിലെടുത്തിരുന്നു. ജാമ്യത്തിലിറങ്ങിയ ശേഷമാണ് വീട്ടില്‍ തൂങ്ങി മരിച്ച നിലയില്‍ കാണപ്പെട്ടത്.
കൊട്ടാരക്കര എസ്എച്ച്ഒയും നഗരസഭാ മുന്‍ ചെയര്‍മാനും കൗണ്‍സിലറുമായ എ ഷാജുവും ഇയാളെ ക്രൂരമായി മര്‍ദിച്ചതായി പരാതിയില്‍ പറയുന്നു. ഭാര്യയുടെയും സുഹൃത്തുക്കളുടെയും മാനസികവും ശാരീരികമായ പീഡനമാണ് ആത്മഹത്യയിലേക്ക് നയിച്ചതെന്ന് യുവാവിന്റെ അച്ഛന്‍ ഗോപാലകൃഷ്ണപിള്ള പരാതിയില്‍ പറഞ്ഞിട്ടുണ്ട്. മരിച്ച യുവാവിന്റെ ഭാര്യ മൂന്നു വര്‍ഷമായി കൊട്ടാരക്കര ചന്തമുക്കിലെ ഒരു ബ്യൂട്ടി പാര്‍ലറില്‍ ജോലി നോക്കി വരികയാണ്. അജികുമാറിന്റെ എതിര്‍പ്പ് മറികടന്നാണ് ഭാര്യ ജോലിക്ക് പോയിരുന്നത്. ഇതേ തുടര്‍ന്ന് ഇരുവരും തമ്മില്‍ അകല്‍ച്ചയിലായിരുന്നു.
ഇതിനിടയില്‍ ബ്യൂട്ടി പാര്‍ലര്‍ നടത്തിപ്പുകാരിയായ സ്ത്രീയുടെ സഹായത്തോടെ അജികുമാറിന്റെ ഭാര്യ വിദേശത്തേയ്ക്ക് പോകാന്‍ ശ്രമം നടത്തി. ഇതിനെ അജികുമാര്‍ എതിര്‍ത്തതോടെ ഇരുവരും തമ്മിലുള്ള തര്‍ക്കം രൂക്ഷമായി. തുടര്‍ന്ന് ഭാര്യ അജികുമാറിനൊപ്പം താമസിക്കാന്‍ താല്‍പര്യമില്ലെന്നും വീട്ടിലുള്ള തന്റെ വസ്ത്രങ്ങളും മറ്റു സാധനങ്ങളും വിട്ടുതരണെന്നും ആവശ്യപ്പെട്ട് പൂയപ്പള്ളി പോലീസില്‍ പരാതി നല്‍കി. പോലീസ് ഇരുകൂട്ടരെയും വിളിപ്പിച്ചെങ്കിലും അജികുമാര്‍ ഹാജരായില്ല. തുടര്‍ന്ന് പിങ്ക് പോലീസെത്തി ഇവരുടെ രണ്ടു കുട്ടികളെയും വസ്ത്രങ്ങളും സാധനങ്ങളും വീട്ടില്‍ നിന്നും കൊട്ടാരക്കരയിലെ ബ്യൂട്ടി പാര്‍ലറില്‍ എത്തിച്ചു നല്‍കി.
തൊട്ടടുത്ത ദിവസം കുട്ടികളെ കാണാനായി അജികുമാര്‍ ബ്യൂട്ടി പാര്‍ലറിലെത്തിയെങ്കിലും കുട്ടികളെയും ഭാര്യയെയും കാണാന്‍ ബ്യൂട്ടി പാര്‍ലര്‍ നടത്തിപ്പുകാരി അനുവദിച്ചില്ല. ഇവര്‍ ഫോണ്‍ ചെയ്ത് അറിയിച്ചതിനെ തുടര്‍ന്ന് നഗരസഭാ കൗണ്‍സിലറും കേരളാ കോണ്‍ഗ്രസ് -ബി ജില്ലാ പ്രസിഡന്റുമായ എ. ഷാജു സ്ഥലത്തെത്തുകയും യുവാവുമായി തര്‍ക്കത്തിലേര്‍പ്പെടുകയും ഇയാളെ ഷാജു മര്‍ദിക്കുകയും ചെയ്‌തെന്നാണ് പരാതിയില്‍ പറയുന്നത്. ഷാജു അറിയിച്ചതിനെ തുടര്‍ന്ന് കൊട്ടാരക്കര പോലീസെത്തി യുവാവിനെ കസ്റ്റഡിയിലെടുത്തു. സ്റ്റേഷനില്‍ വെച്ച് ഇന്‍സ്‌പെക്ടര്‍ ഇയാളെ ക്രൂരമായി മര്‍ദിച്ചതായും ആക്ഷേപമുണ്ട്. ബന്ധുക്കളെത്തിയാണ് ഇയാളെ ജാമ്യത്തിലിറക്കിയത്. പിറ്റേന്ന് പുലര്‍ച്ചെയാണ് തൂങ്ങി മരിച്ച നിലയില്‍ കാണപ്പെട്ടത്.
കൊട്ടാരക്കരയിലെ ബ്യൂട്ടി പാര്‍ലറിനെ കുറിച്ച് സമഗ്ര അന്വേഷണം വേണമെന്ന് പൊതുപ്രവര്‍ത്തകരും നാട്ടുകാരും ആവശ്യപ്പെടുന്നു. മുന്‍പും ഈ സ്ഥാപനത്തെ കുറിച്ച് പരാതികള്‍ ഉണ്ടായിട്ടുണ്ട്. പെണ്‍കുട്ടികളെ വിദേശത്തേക്ക് കടത്തുന്നതിന് ഇടനിലക്കാരായി പ്രവര്‍ത്തിച്ചു വരുന്നതായും ആരോപണമുണ്ട്.
