ചലച്ചിത്ര സംവിധായകൻ ഉണ്ണി ഗോവിന്ദ്‍രാജ് വിവാഹിതനായി. അപർണ മാധവൻ ആണ് വധു. വിവാഹത്തിൻറെ ചിത്രങ്ങൾ ഉണ്ണി സോഷ്യൽ മീഡിയയിലൂടെ പങ്കുവച്ചിട്ടുണ്ട്. സംവിധായകൻ ഹനീഫ് അദേനിയുടെ അസോസിയേറ്റ് ആയി പ്രവർത്തിച്ച ഉണ്ണി ഗോവിന്ദ്‍രാജിൻറെ സ്വതന്ത്ര സംവിധായകനായുള്ള അരങ്ങേറ്റം കഴിഞ്ഞ വർഷം തിയറ്ററുകളിലെത്തിയ ഹെവൻ എന്ന ചിത്രത്തിലൂടെ ആയിരുന്നു.
ഉണ്ണി ഗോവിന്ദ്‍രാജും പി എസ് സുബ്രഹ്‍മണ്യനും ചേർന്നായിരുന്നു ചിത്രത്തിൻറെ രചന. സുരാജ് വെഞ്ഞാറമൂട് നായകനായ ചിത്രത്തിൽ അഭിജ, ജാഫർ ഇടുക്കി, ജോയ് മാത്യു, അലൻസിയർ, സുധീഷ് തുടങ്ങിയവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചു. 2022 ജൂണിൽ തിയറ്ററുകളിലെത്തിയ ചിത്രം പിന്നീട് ഡിസ്‍നി പ്ലസ് ഹോട്ട്സ്റ്റാറിലൂടെ ഒടിടി റിലീസ് ആയും എത്തി.
