തിരുവനന്തപുരം: കേരളം സമ്പൂര്‍ണ്ണ ഭക്ഷ്യഭദ്രത ലക്ഷ്യമാക്കിയുള്ള കര്‍മ്മ പദ്ധതികളുമായി മുന്നോട്ട് പേകുകയാണെന്ന് മുഖ്യമന്ത്രി പിണറായി വിജയന്‍. സംസ്ഥാന സര്‍ക്കാര്‍ രണ്ട് വര്‍ഷം പൂര്‍ത്തിയാകുന്നതിന്റെ ഭാഗമായി തയ്യാറാക്കിയിട്ടുള്ള മൂന്നാം നൂറുദിന കര്‍മ്മ പരിപാടിയില്‍ ഉള്‍പ്പെടുത്തി അരലക്ഷം മുന്‍ഗണന റേഷന്‍ കാര്‍ഡുകളുടെ സംസ്ഥാനതല വിതരണോദ്ഘാടനം നിര്‍വ്വഹിക്കുകയായിരുന്നു മുഖ്യമന്ത്രി.
സംമ്പൂര്‍ണ്ണ ആധാര്‍ സീഡിംഗ് പൂര്‍ത്തിയാക്കിയ രാജ്യത്തെ ആദ്യ സംസ്ഥാനമായി കേരളം മാറിയതായി അധ്യക്ഷത വഹിച്ച മന്ത്രി ജി.ആര്‍. അനില്‍ അറിയിച്ചു. റേഷന്‍ വ്യാപാരി ക്ഷേമനിധിയ്ക്കായി തയ്യാറാക്കിയ ഒദ്യോഗിക ഇന്ററാക്ടീവ് വെബ് പോര്‍ട്ടലിന്റെ ഉദ്ഘാനം ചടങ്ങില്‍ മന്ത്രി ആന്റണി രാജു നിര്‍വ്വഹിച്ചു. നിലവില്‍ റേഷന്‍ വ്യാപാരികള്‍ക്ക് അവരുടെ ക്ഷേമനിധിയുമായി ബന്ധപ്പെട്ട ആവശ്യങ്ങള്‍ക്കായി അതാത് താലൂക്ക് സപ്ലൈ ഓഫീസുകളിലേക്ക് നേരിട്ട് എത്തേണ്ട സ്ഥിതിയായിരുന്നു. ഈ വെബ് പോര്‍ട്ടല്‍ നിലവില്‍ വന്നതോടുകൂടി റേഷന്‍ വ്യാപാരി ക്ഷേമനിധിയുമായി ബന്ധപ്പെട്ട അപേക്ഷകള്‍ സമര്‍പ്പിക്കുക, വരിസംഖ്യ അടയ്ക്കുക, റേഷന്‍ വ്യാപാരികള്‍ക്കുള്ള ഐഡന്റിറ്റി കാര്‍ഡുകള്‍ ജനറേറ്റ് ചെയ്യുക തുടങ്ങിയ വിവിധ ആവശ്യങ്ങള്‍ ഓണ്‍ലൈനായി വെബ് പോര്‍ട്ടലിലൂടെ ചെയ്യാവുന്നതാണ്. സമ്മേളനത്തില്‍ സിവില്‍ സപ്ലൈസ് കമ്മീഷ്ണര്‍ ഡോ. സജിത് ബാബു , ജില്ലാ പഞ്ചായത്ത് പ്രസിഡന്റ് ഡി. സുരേഷ് കുമാര്‍, സി.പി.ഐ ജില്ലാ അസിസ്റ്റന്റ് സെക്രട്ടറി പള്ളിച്ചല്‍ വിജയന്‍, റേഷനിംഗ് കണ്‍ട്രോളര്‍ മനോജ് കുമാര്‍ എന്നിവര്‍ പ്രസംഗിച്ചു.
