ഇന്ത്യൻ സിനിമാ ചരിത്രത്തിലെ റെക്കോഡുകൾ തകർത്ത് മുന്നേറുന്ന ഷാരൂഖ് ഖാൻ ചിത്രം പത്താൻ ആയിരം കോടി ക്ലബ്ബിൽ ഇടം പിടിച്ചു. റിലീസ് ചെയ്‌ത് 27 ദിവസങ്ങൾ പിന്നിടുമ്പോൾ ഇന്ത്യയിൽനിന്നും മാത്രം ചിത്രം നേടിയത് 620 കോടിയാണ്. ഇന്ത്യയ്ക്ക് പുറത്ത് നിന്നും 380 കോടിയാണ് ഇതുവരെയുള്ള കളക്ഷൻ. ബഹിഷ്കരണ ആഹ്വാനങ്ങളെയെല്ലാം കാറ്റിൽ പറത്തിക്കൊണ്ടാണ് കിങ് ഖാൻ ചിത്രം ബോക്സ് ഓഫീസിൽ ചരിത്രമെഴുതുന്നത്.
ഏറ്റവുമധികം വരുമാനം നേടിയ ഇന്ത്യൻ ചിത്രങ്ങളിൽ നിലവിൽ അഞ്ചാം സ്ഥാനത്താണ് ഇപ്പോൾ പത്താൻ. പ്രശാന്ത് നീൽ സംവിധാനം ചെയ്ത കെജിഎഫ്-ചാപ്റ്റർ 2, രാജമൗലി സംവിധാനം ചെയ്ത ആർആർആർ, ബാഹുബലി 2-ദ് കൺക്ലൂഷൻ, ആമീർ ഖാൻ ചിത്രം ദംഗൽ എന്നിവയാണ് മറ്റ് ചിത്രങ്ങൾ.
ഏപ്രിലിൽ ചിത്രം ഒടിടിയിൽ റിലീസാകും. കേരളത്തിൽ ആമിർ ഖാൻ ചിത്രം ദംഗലിന്റെ റെക്കോഡ് പൊട്ടിച്ചാണ് പത്താൻ മുന്നേറുന്നത്. കേരളത്തിൽ നിന്നും ചിത്രം ഇതുവരെ നേടിയത് 15.85 കോടിയാണ്. സിദ്ധാർഥ് ആനന്ദ് സംവിധാനം ചെയ്ത ചിത്രത്തിൽ ഷാറൂഖിനൊപ്പം ദീപിക പദുക്കോൺ ആണ് നായിക. ജോൺ ഏബ്രഹാം നെഗറ്റീവ് റോളിലാണ് ചിത്രത്തിൽ എത്തുന്നത്.
