ആലപ്പുഴ: ഭാര്യക്കു ജോലിനല്‍കിയതിന്റെ വൈരത്തില്‍ ഹോംസ്റ്റേ ഉടമയെ കുത്തി പരുക്കേല്‍പ്പിച്ചയാളെ പോലീസ് അറസ്റ്റുചെയ്തു. മണ്ണഞ്ചേരി പഞ്ചായത്ത് 22-ാം വാര്‍ഡ് കണ്ണന്തറ വെളിയില്‍ മനോജ് (41) ആണ് പിടിയിലായത്.
വളവനാടു ഭാഗത്തുള്ള ഹോംസ്റ്റേയുടെ ഉടമയെയാണ് ആക്രമിച്ചത്. ഹോംസ്റ്റേയില്‍ അതിക്രമിച്ചുകയറി മര്‍ദിച്ചശേഷം ഉടമയുടെ കഴുത്തില്‍ കത്തികൊണ്ട് കുത്തുകയായിരുന്നെന്നാണ് പോലീസ് പറയുന്നത്.
ശനിയാഴ്ച വൈകിട്ട് ആറുമണിയോടെയായിരുന്നു സംഭവം. പിന്നീട് കലവൂര്‍ ജങ്ഷനുസമീപം മണ്ണഞ്ചേരി പ്രിന്‍സിപ്പല്‍ എസ്.ഐ. കെ.ആര്‍. ബിജുവിന്റെ നേതൃത്വത്തില്‍ എസ്.ഐ. ജോമോന്‍, സി.പി.ഒ. സുരേഷ് എന്നിവര്‍ ചേര്‍ന്നാണ് പ്രതിയെ പിടികൂടിയത്. പട്ടണക്കാട്ട് കൊലപാതക കേസിലും മണ്ണഞ്ചേരിയില്‍ വധശ്രമക്കേസിലും മനോജ് പ്രതിയാണെന്ന് പോലീസ് പറഞ്ഞു.
