മലപ്പുറം പുളിക്കലില്‍ സ്കൂള് ബസ് നിയന്ത്രണം വിട്ട് മതിലിൽ ഇടിച്ച ശേഷം മോട്ടോർ ബൈക്കിനു മുകളിലേക്ക് മറിഞ്ഞുണ്ടായ അപകടത്തിൽ വിദ്യാര്‍ഥിനി മരിച്ചു. ബൈക്കിലുണ്ടായിരുന്ന ഹയ ഫാത്തിമ (6) എന്നവിദ്യാർത്ഥിനിയാണ് മരിച്ചത്. ഹയ ഫാത്തിമയും, മുത്തച്ഛനും സഞ്ചരിച്ച ബൈക്കിലേക്കാണ് ബസ് മറിഞ്ഞത്. നാല്‍പതോളം വിദ്യാര്‍ഥികളാണ് സ്കൂള് ബസിലുണ്ടായിരുന്നത്. കുട്ടികള്‍ സ്കൂള് വിട്ട് വീടുകളിലേക്ക് മടങ്ങുന്നതിനിടെയാണ് ഈ ദാരുണ സംഭവം നടന്നത്. പുളിക്കല്‍ നോവല്‍ സ്‌കൂളിന്റെ ബസാണ് അപകടത്തില്‍പെട്ടത്.
നോവല്‍ സ്‌കൂളിലെ വിദ്യാര്‍ഥിനിയാണ് ഹയ ഫാത്തിമ. മുത്തച്ഛൻ ബഷീറി (65) നൊപ്പം ബൈക്കില്‍ വീട്ടിലേക്ക് പോകുന്നതിനിടെ ഇവര്‍ സഞ്ചരിച്ച ഇരുചക്രവാഹനത്തിനു മുകളിലേക്ക് ബസ് നിയന്ത്രണം വിട്ട് മറിയുകയായിരുന്നു. കുട്ടിയെ ഉടന്‍ തന്നെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. ബസില്‍ നാല്‍പ്പതോളം കുട്ടികളും ബസ് ജീവനക്കാരും ഉണ്ടായിരുന്നു.
ഇതില്‍ 10 പേരെ കോഴിക്കോട് ആസ്റ്റര്‍ മിംസ് ആശുപത്രിയില്‍ പ്രവേശിപ്പിച്ചു. മരിച്ച കുട്ടിയുടെ മുത്തച്ഛന്‍ ബഷീറിന് തലയോട്ടില്‍ ചെറിയ തോതില്‍ രക്തസ്രാവം കണ്ടുപിടിച്ചതിനാല്‍ ന്യൂറോസര്‍ജറി വിഭാഗത്തില്‍ നിരീക്ഷണത്തില്‍ തുടരുകയാണ്. കൂടാതെ റന എന്ന കുട്ടിക്കും തലയ്ക്ക് പരിക്കുണ്ട്. മറ്റാര്‍ക്കും തന്നെ സാരമായ പരുക്കുകള്‍ ഇല്ല. ഏതാനും മണിക്കുര്‍ നിരീക്ഷണത്തില്‍ കഴിഞ്ഞ ശേഷം അവരെ ഡിസ്ചാര്‍ജ് ചെയ്യാന്‍ സാധിക്കുമെന്ന് എമര്‍ജന്‍സി വിഭാഗം തലവന്‍ ഡോ. വേണുഗോപാലന്‍ പിപി അറിയിച്ചു.
