കോട്ടയം: സുരക്ഷാസംവിധാനങ്ങളൊരുക്കാതെ ഗതാഗതത്തിന് തുറന്നുകൊടുത്തെന്ന ആരോപണം ശക്തമാകുന്നതിനിടെ, പട്ടിത്താനം-ഏറ്റുമാനൂർ ബൈപാസിൽ വീണ്ടും അ‌പകടം. ഇന്ന് ഉച്ചയോടെ ഏറ്റുമാനൂർ ക്ഷേത്രത്തിന്റെ കിഴക്കേനടയ്ക്കു സമീപമാണ് അ‌പകടമുണ്ടായത്. ബൈപാസിലൂടെ യെത്തിയ കാർ മറ്റൊരു കാറുമായി കൂട്ടിയിടിക്കുകയായിരുന്നു. ഇരുവാഹനത്തിലെയും യാത്രക്കാർക്ക് നിസാര പരുക്കുകളേറ്റു.
ഏറ്റുമാനൂർ പാറകണ്ടം ഭാഗത്തുനിന്ന് എത്തിയ കാർ, ബൈപാസ് കുറുകെ കടക്കുകയായിരുന്ന കാറിൽ ഇടിക്കുകയായിരുന്നു. വാഹനങ്ങളുടെ അ‌മിതവേഗവും ശ്രദ്ധക്കുറവുമാണ് ബൈപാസിലെ അ‌പകടങ്ങൾക്ക് പ്രധാന കാരണമെന്ന് നാട്ടുകാർ ചൂണ്ടിക്കാട്ടുന്നു. റോഡ് ഗതാഗതത്തിന് തുറന്നുനൽകി ഒരു മാസത്തിനകം സുരക്ഷാ സംവിധാനങ്ങൾ ഒരുക്കുമെന്നായിരുന്നു അ‌ധികൃതരുടെ വാഗ്ദാനം. എന്നാൽ, നാളിതുവരെയായി യാതൊരു സുരക്ഷാ സംവിധാനങ്ങളും ഒരുക്കിയിട്ടില്ലെന്ന് നാട്ടുകാർ ആരോപിച്ചു.
പുതുതായി നിർമാണം പൂർത്തീകരിച്ച പട്ടിത്താനം-ഏറ്റുമാനൂർ മേഖലയിലാണ് ഏറ്റവും കൂടുതൽ അ‌പകടസാധ്യതയുള്ളത്. നിരവധി ചെറുറോഡുകളാണ് ബൈപാസ് കുറുകേ കടന്ന് പോകുന്നത്. ഇത് അ‌റിയാതെ അ‌മിതവേഗത്തിലെത്തുന്ന വാഹനങ്ങളും അ‌ശ്രദ്ധയോടെ ചെറുറോഡുകളിൽനിന്ന് ബൈപാസിലേക്കു പ്രവേശിക്കുന്ന വാഹനങ്ങളുമാണ് അ‌പകടത്തിൽപ്പെടുന്നത്. തിരക്കേറിയ സമയങ്ങളിൽ പാലാ റോഡ് ജങ്ഷനിൽ പോലീസ് ഉദ്യോഗസ്ഥരെ ഗതാഗത നിയന്ത്രണത്തിന് നിയോഗിച്ചത് ആശ്വാസകരമാണ്.
