ഗുജറാത്തിൽ കോൺഗ്രസിന്റെ വൻ തോൽവിയുമായി ബന്ധപ്പെട്ട ജോൺ ബ്രിട്ടാസ് എംപിയുടെ ട്വീറ്റ് ലൈക് ചെയ്ത് കോൺഗ്രസ് എംപി ശശി തരൂർ. ഗുജറാത്ത് കോൺഗ്രസ് വർക്കിംഗ് പ്രസിഡണ്ടും എംഎൽഎയുമായ ജിഗ്നേഷ് മേവാനിയുടെ ഇന്ത്യൻ എക്സ്പ്രസിൽ വന്ന അഭിമുഖം ഷെയർ ചെയ്തുള്ളതാണ് ജോൺ ബ്രിട്ടാസ് എംപിയുടെ ട്വീറ്റ്. കോൺഗ്രസ് നേതൃത്വത്തെ വിമർശിക്കുന്നതാണ് ട്വീറ്റ്.
നിയമസഭ തിരഞ്ഞെടുപ്പ് കാലത്ത് പാർട്ടി തന്നെ വേണ്ടവിധം ഉപയോഗിച്ചില്ലെന്ന് ജിഗ്നേഷ് മേവാനി അഭിമുഖത്തിൽ തുറന്നുപറയുന്നു. കൂടുതൽ ക്രെഡിബിലിറ്റിയുള്ള തന്നെ കോൺഗ്രസ് നന്നായി ഉപയോഗിക്കണമായിരുന്നു എന്ന് ജിഗ്നേഷ് മേവാനി അഭിമുഖത്തിൽ ചൂണ്ടിക്കാണിക്കുന്നു .
ഇത്തരത്തിൽ എത്ര കോൺഗ്രസ് നേതാക്കൾ തുറന്നു സംസാരിക്കുമെന്ന് അറിയാൻ കൗതുകം ഉണ്ടെന്നും ശശി തരൂരിനെ പോലുള്ളവരെ പ്രചാരണരംഗത്ത് പോലും പരിഗണിക്കാതിരുന്ന കാര്യവും ജോൺ ബ്രിട്ടാസ് ട്വീറ്റിൽ പറയുന്നുണ്ട് . രാഹുൽ ഗാന്ധി നയിക്കുന്ന ഭാരത് ജോഡോ യാത്രയുടെ റൂട്ടിൽ നിന്ന് ഗുജറാത്തിനെ ഒഴിവാക്കിയ കാര്യവും ജോൺ ബ്രിട്ടാസ് ചൂണ്ടിക്കാട്ടുന്നുണ്ട്. ഈ ട്വിറ്റാണ് ശശി തരൂർ ലൈക്ക് ചെയ്തിരിക്കുന്നത്. അടുത്തിടെ നടന്ന ഗുജറാത്ത് നിയമസഭാ തെരഞ്ഞെടുപ്പിൽ 77 സീറ്റ് ഉണ്ടായിരുന്ന കോൺഗ്രസ് 17 സീറ്റിലേക്ക് ചുരുങ്ങിയിരുന്നു.
