എം-ആധാര് നിര്ത്തുന്നു; പുതിയ ആധാര് ആപ്പ് പ്രഖ്യാപിച്ച് സര്ക്കാര്: ക്യൂആര് കോഡ് മുതല് മുഖം തിരിച്ചറിയല് വരെ; വിവരങ്ങളില് പൂര്ണ നിയന്ത്രണം; വിശദാംശങ്ങള് ഇങ്ങനെ
ന്യൂഡല്ഹി: സ്മാര്ട്ട്ഫോണുകളിലെ പഴയ എം-ആധാര് (mAadhaar) ആപ്പ് ഉടന് നിര്ത്തലാക്കുമെന്ന് കേന്ദ്ര സര്ക്കാര്. രാജ്യത്തുടനീളമുള്ള ഉപയോക്താക്കള്ക്കായി കൂടുതല് കര്ശനമായ സുരക്ഷ, വ്യക്തിഗത വിവരങ്ങളുടെ മേല് മികച്ച നിയന്ത്രണം, കൂടുതല് ആധുനികമായ ഡിജിറ്റല് പരിശോധനാ സംവിധാനം എന്നിവ ഉറപ്പാക്കാനുള്ള യുണീക്ക് ഐഡന്റിഫിക്കേഷന് അതോറിറ്റി ഓഫ് ഇന്ത്യയുടെ (UIDAI) ശ്രമങ്ങളുടെ ഭാഗമായാണ് ഈ നീക്കം. എക്സില് പങ്കുവെച്ച പോസ്റ്റിലൂടെ ഇക്കാര്യം സ്ഥിരീകരിക്കുകയും, പുതുതായി പുറത്തിറക്കിയ ആധാര് ആപ്പിലേക്ക് മാറാന് ഉപയോക്താക്കളോട് ആവശ്യപ്പെടുകയും ചെയ്തു.
‘എം-ആധാര് ഉടന് നിര്ത്തലാക്കും. പുതിയ ആധാര് ആപ്പ് ഡൗണ്ലോഡ് ചെയ്ത് കൂടുതല് വേഗതയേറിയ ആക്സസ്, മികച്ച ഫീച്ചറുകള് എന്നിവ അനുഭവിക്കുകയും നിങ്ങളുടെ വിരല്ത്തുമ്പില് സേവനങ്ങള് ആസ്വദിക്കുകയും ചെയ്യുക. നിങ്ങളുടെ ആധാര് അനുഭവം എന്നത്തേക്കാളും ലളിതവും സൗകര്യപ്രദവുമാക്കാന് വേണ്ടിയാണ് ഇത് രൂപകല്പ്പന ചെയ്തിരിക്കുന്നത്’.- ട്വീറ്റില് പറയുന്നു.
പുതിയ ആപ്പ് പഴയ എം-ആധാര് പ്ലാറ്റ്ഫോമിന്റെ വെറുമൊരു ദൃശ്യപരമായ മാറ്റം (redesign) മാത്രമല്ല. ദൈനംദിന ജീവിതത്തില് ആധാര് പരിശോധനയും വ്യക്തിവിവരങ്ങള് പങ്കിടുന്ന രീതിയും ഇത് പൂര്ണ്ണമായി മാറ്റുന്നു. ആപ്പിന്റെ പഴയ പതിപ്പ് പലപ്പോഴും പരിശോധന വേളയില് മുഴുവന് ആധാര് വിവരങ്ങളും പ്രദര്ശിപ്പിച്ചിരുന്നു. എന്നാല് പുതിയ പ്ലാറ്റ്ഫോം, ആവശ്യമായ വിവരങ്ങള് മാത്രം തിരഞ്ഞെടുത്ത് പങ്കിടുന്നതിലും വിവരങ്ങള് ലഭ്യമാക്കുന്നതിന് മുന്പ് കൂടുതല് ശക്തമായ ഐഡന്റിറ്റി പരിശോധനകള് നടത്തുന്നതിലുമാണ് ശ്രദ്ധ കേന്ദ്രീകരിക്കുന്നത്.
ക്യൂആര് കോഡും ഫേസ് ഓതന്റിക്കേഷനും (Face Authentication)
ഹോട്ടലുകള്, ആശുപത്രികള്, സര്ക്കാര് ഓഫീസുകള്, മറ്റ് സേവന കൗണ്ടറുകള് എന്നിവിടങ്ങളില് നേരിട്ടുള്ള പരിശോധനകള് കൂടുതല് സുഗമമാക്കുക എന്ന ലക്ഷ്യത്തോടെയാണ് ഈ ഫീച്ചര് ഉള്പ്പെടുത്തിയിരിക്കുന്നത്. മുഴുവന് ആധാര് വിവരങ്ങളും വെളിപ്പെടുത്തുന്നതിന് പകരം, ക്യൂആര് പരിശോധനയിലൂടെ ആവശ്യമായ വിവരങ്ങള് മാത്രം ഉപയോക്താക്കള്ക്ക് ഇനി പങ്കിടാം.
ഒതന്റിക്കേഷന് സംവിധാനത്തിലും നവീകരണം വരുത്തിയിട്ടുണ്ട്. മുന്പ്, ആധാര് സേവനങ്ങള് ലഭ്യമാക്കുന്നത് പ്രധാനമായും എസ്.എം.എസ് വഴി അയയ്ക്കുന്ന ഒ.ടി.പി പരിശോധനയെ ആശ്രയിച്ചായിരുന്നു. പുതിയ സംവിധാനം ഐഡന്റിറ്റി പരിശോധനയ്ക്ക് കൂടുതല് സുരക്ഷാ പാളികള് ചേര്ക്കുന്നു. ഒ.ടി.പികള്ക്കൊപ്പം, ലഭ്യമാക്കുന്ന സേവനത്തെ ആശ്രയിച്ച് ഉപയോക്താക്കള്ക്ക് ഇനി ഫേസ് ഓതന്റിക്കേഷനും ക്യൂആര് പരിശോധനയും ആവശ്യമായി വന്നേക്കാം. ഡിജിറ്റല് ഐഡന്റിറ്റി ആക്സസിലെ ദുരുപയോഗം കുറയ്ക്കുന്നതിനും സുരക്ഷ മെച്ചപ്പെടുത്തുന്നതിനുമായാണ് ഇത് അവതരിപ്പിക്കുന്നത്.
ഈ ആപ്പ് ഉപയോക്താക്കള്ക്ക് അവരുടെ ബയോമെട്രിക് വിവരങ്ങളുടെ മേല് കൂടുതല് നേരിട്ടുള്ള നിയന്ത്രണവും നല്കുന്നു. ആളുകള്ക്ക് ഇപ്പോള് അവരുടെ വിരലടയാളം, മുഖം , ഐറിസ് ഒതന്റിക്കേഷന് ഡാറ്റ എന്നിവ ആപ്പ് വഴി നേരിട്ട് ലോക്ക് ചെയ്യാനോ നിയന്ത്രിക്കാനോ കഴിയും. ഇത് അനധികൃതമായ ആക്സസ് ചെയ്യാനുള്ള സാധ്യത കുറയ്ക്കുമെന്ന് യു.ഐ.ഡി.എ.ഐ വിശ്വസിക്കുന്നു, പ്രത്യേകിച്ച് മറ്റുള്ളവരുമായി പങ്കിടുന്നതോ പൊതുവായതോ ആയ ഉപകരണങ്ങളില്.
പുതിയ ആധാര് ആപ്പ് എങ്ങനെ സെറ്റ് ചെയ്യാം
പഴയ എം-ആധാര് ഓണ്ബോര്ഡിംഗ് പ്രക്രിയയേക്കാള് അല്പം വിശദമായതാണ് പുതിയ ആധാര് ആപ്പ് സെറ്റ് ചെയ്യുന്ന രീതി. ഉപയോക്താക്കള് ആദ്യം പ്ലേ സ്റ്റോര് പോലുള്ള പരിശോധിച്ചുറപ്പിച്ച ആപ്പ് സ്റ്റോറുകളില് നിന്ന് ഔദ്യോഗിക ‘ആധാര്’ ആപ്പ് ഡൗണ്ലോഡ് ചെയ്യണം. ഇഷ്ടപ്പെട്ട ഭാഷ തിരഞ്ഞെടുത്ത ശേഷം, അവരുടെ ആധാര് അക്കൗണ്ടുമായി ബന്ധിപ്പിച്ചിട്ടുള്ള മൊബൈല് നമ്പര് നല്കുകയും ഒ.ടി.പി ഉപയോഗിച്ച് അത് പരിശോധിച്ചുറപ്പിക്കുകയും വേണം.
ചില ഉപയോക്താക്കളോട് ആപ്പ് സെറ്റപ്പ് ചെയ്യുന്ന സമയത്ത് ഫേസ് ഓതന്റിക്കേഷന് പൂര്ത്തിയാക്കാന് ആവശ്യപ്പെട്ടേക്കാം. ഇത് ചെയ്തുകഴിഞ്ഞാല്, ആധാര് നമ്പര് ചേര്ക്കുന്നതിനും മറ്റൊരു ഒ.ടി.പി പരിശോധന പൂര്ത്തിയാക്കുന്നതിനും മുന്പായി അവര്ക്ക് ഒരു പിന് ക്രിയേറ്റ് ചെയ്യാനോ ബയോമെട്രിക് അണ്ലോക്ക് പ്രവര്ത്തനക്ഷമമാക്കാനോ കഴിയും. ഒരൊറ്റ ലോഗിന് രീതിയെ മാത്രം ആശ്രയിക്കാതെ, വ്യത്യസ്ത ഘട്ടങ്ങളില് ഉപയോക്താവിന്റെ ഐഡന്റിറ്റി സ്ഥിരീകരിക്കുന്നതിനാണ് ഈ വിവിധഘട്ട സെറ്റപ്പ് രൂപകല്പ്പന ചെയ്തിരിക്കുന്നത്.
സൗജന്യ ഓണ്ലൈന് ആധാര് രേഖ പുതുക്കല് സേവനം യു.ഐ.ഡി.എ.ഐ ദീര്ഘിപ്പിച്ച സമയത്താണ് പുതിയ ആപ്പിലേക്കുള്ള ഈ മാറ്റം വരുന്നത്. ഒരു ഔദ്യോഗിക മെമ്മോറാണ്ടം അനുസരിച്ച്, ഉപയോക്താക്കള്ക്ക് മൈആധാര് പോര്ട്ടലില് 2027 ജൂണ് 14 വരെ തങ്ങളുടെ ഐഡന്റിറ്റി, വിലാസ രേഖകള് സൗജന്യമായി പുതുക്കാനും പരിശോധിക്കാനും കഴിയും. മുന്പ്, ഈ സൗകര്യം 2026 ജൂണ് 15 വരെ മാത്രമേ സൗജന്യമായി ലഭ്യമാക്കാന് നിശ്ചയിച്ചിരുന്നുള്ളൂ.
#mAadhaar, #AadhaarApp, #UIDAI, #DigitalIdentity, #AadhaarUpdate, #FaceAuthentication, #QRVerification, #DigitalIndia, #BiometricSecurity, #DataPrivacy, #TechNews, #MalayalamNews, #BreakingNews, #CurrentAffairs
