‘മനുഷ്യരാശിക്കെതിരായ കുറ്റകൃത്യം’; ഹമാസിന്റെ ഇസ്രയേല്‍ ആക്രമണത്തെയും ഗാസയിലെ ബന്ദികളോടുള്ള ക്രൂരതയും വിവരിച്ച് ആംനസ്റ്റി ഇന്റര്‍നാഷണല്‍ റിപ്പോര്‍ട്ട്; ‘ബന്ദികള്‍ ലൈംഗിക പീഡനത്തിന് ഇരയായി, ഹമാസ് വംശഹത്യ ലക്ഷ്യമിട്ടു; ഗാസയിലെ സാധാരണക്കാരില്‍ അധികവും മരിച്ചത് ഹമാസിന്റെ വെടിയേറ്റ്; ഞെട്ടിക്കുന്ന കണ്ടെത്തലുകള്‍

ജറുസലേം: ഒക്‌ടോബര്‍ ഏഴിന് ഇസ്രയേലില്‍ ഹമാസ് നടത്തിയ ആക്രമണം മനുഷ്യത്വത്തിന് എതിരായ കുറ്റകൃത്യമെന്ന് മനുഷ്യാവകാശ സംഘടനയായ ആംനസ്റ്റി ഇന്റര്‍നാഷണലിന്റെ റിപ്പോര്‍ട്ട്. ഇസ്രയേലില്‍ നടത്തിയ ആക്രമണങ്ങളും ഗാസയിലേക്കു കടത്തിക്കൊണ്ടുപോയ ബന്ദികളോടുമുള്ള ക്രൂരതകള്‍ ചൂണ്ടിക്കാട്ടിയാണ് ആംനസ്റ്റി ബുധനാഴ്ച റിപ്പോര്‍ട്ട് പുറത്തുവിട്ടത്.

ആക്രമണത്തിന്റെ രീതി, അക്രമികള്‍ തമ്മിലുള്ള ആശയവിനിമയം, ഹമാസിന്റെയും മറ്റു സായുധ സംഘടനകളുടെയും പ്രസ്താവനകള്‍, ഇരകളുമായുള്ള ആശയവിനിയമം എന്നിവയുടെ അടിസ്ഥാനത്തിലാണ് ലണ്ടന്‍ ആസ്ഥാനമാക്കി പ്രവര്‍ത്തിക്കുന്ന സംഘടനയുടെ റിപ്പോര്‍ട്ട് പുറത്തുവന്നത്. നേരത്തേ, ഇസ്രയേലിനെ ഐക്യരാഷ്ട്ര സഭയിലടക്കം ഒറ്റപ്പെടുത്തിയുള്ള നീക്കങ്ങള്‍ക്ക് തിരിച്ചടിയാണ് രാജ്യാന്തര തലത്തില്‍ തന്നെ ഏറ്റവും ബഹുമാന്യമര്‍ഹിക്കുന്ന സംഘടനയുടെ കണ്ടെത്തല്‍.

ഇസ്രയേലിന്റെ പെഗാസസ്, പ്രഡേറ്റര്‍ ചാര സോഫ്റ്റ്‌വേറുകള്‍ മനുഷ്യാവകാശങ്ങള്‍ക്കെതിരേ എങ്ങനെ ഉപയോഗിക്കപ്പെടുന്നെന്ന ഞെട്ടിക്കുന്ന റിപ്പോര്‍ട്ടുകള്‍ പുറത്തുവിട്ടതും ഇതേ സംഘടനയാണ്. ഇതാദ്യമായാണ് ഹമാസിനെതിരേ മുഖ്യധാരാ മനുഷ്യാവകാശ സംഘടന രംഗത്തുവരുന്നത്.

ഒക്‌ടോബര്‍ ഏഴിനു നടന്ന ആക്രമണങ്ങളില്‍നിന്നു രക്ഷപ്പെട്ടവര്‍, ഇരകളുടെ കുടുംബാംഗങ്ങള്‍, ഫോറന്‍സിക് വിദഗ്ധര്‍, മെഡിക്കല്‍ പ്രഫഷണലുകള്‍ എന്നിവരടക്കം എഴുപതോളം പേരുടെ അഭിമുഖങ്ങള്‍ നടത്തിയാണ് റിപ്പോര്‍ട്ട് തയാറാക്കിയത്. ആക്രമണ കേന്ദ്രങ്ങളും ബന്ദികളായിരിക്കുമ്പോള്‍ അവരെ സന്ദര്‍ശിച്ചും ബന്ദികളുമായി ബന്ധപ്പെട്ട 350 വീഡിയോകളും സംഘടന സൂഷ്മ വിശകലനത്തിനു വിധേയമാക്കി.

കൊലപാതകം, വംശഹത്യ, തടവിലാക്കല്‍, പീഡനം, ബലാത്സംഗം, ലൈംഗിക അതിക്രമങ്ങള്‍, മനുഷ്യത്വ രഹിതമായ പ്രവൃത്തികള്‍ എന്നിവ ഹമാസ് തീവ്രവാദികള്‍ നടപ്പാക്കി. സാധാരണക്കാരായ ഒരു വിഭാഗം ജനങ്ങള്‍ക്കെതിരേ ആസൂത്രിതമായി നടത്തിയ ആക്രമണമായിരുന്നു അത്. പൗരന്‍മാരെ ലക്ഷ്യമിട്ട് ആക്രമണം നടത്താന്‍ തീവ്രവാദികള്‍ക്കു നിര്‍ദേശം ലഭിച്ചിരുന്നെന്നും അന്വേഷണത്തില്‍ കണ്ടെത്തി.

എന്നാല്‍, ഇത്തരത്തിലൊരു കുറ്റകൃത്യം നടത്തിയിട്ടില്ലെന്നും റിപ്പോര്‍ട്ട് പിന്‍വലിക്കണമെന്നും ഹമാസ് ആവശ്യപ്പെട്ടു. അതേസമയം, ഹമാസ് നടത്തിയ ക്രൂരതകള്‍ പൂര്‍ണമായി റിപ്പോര്‍ട്ടില്‍ ഉള്‍പ്പെട്ടിട്ടില്ലെന്നാണ് ഇസ്രയേല്‍ വിദേശകാര്യ മന്ത്രാലയത്തിന്റെ പ്രതികരണം. ഹമാസ് ആക്രമണത്തില്‍ 1200 പേര്‍ കൊല്ലപ്പെട്ടു. അതില്‍ ഭൂരിഭാഗവും സാധാരണ പൗരന്‍മാരാണ്. കുട്ടികളെ ഉള്‍പ്പെടെ 251 പേരെ ബന്ദികളാക്കി. ഒരാളെ ഒഴികെ എല്ലാവരെയും മോചിപ്പിച്ചു. ഇതുതന്നെ വെടിനിര്‍ത്തല്‍ കരാറിന്റെ ഭാഗമാണ്. ബാക്കിയുള്ളവ ഇസ്രയേലിന്റെ സൈനിക നടപടിയുടെ ഭാഗവും.

ഈ ആക്രമണമാണ് ഗാസയിലെ ഇസ്രായേല്‍ യുദ്ധത്തിന് കാരണമായത്. ഗാസ ആരോഗ്യ അതോറിറ്റികളുടെ കണക്കനുസരിച്ച്, ഇതുവരെ 70,000-ല്‍ അധികം പലസ്തീനികള്‍ കൊല്ലപ്പെട്ടു അവരില്‍ ഭൂരിഭാഗവും സാധാരണ പൗരന്മാര്‍ മേഖലയുടെ വലിയ ഭാഗങ്ങള്‍ തകര്‍ന്നു, ജനസംഖ്യയുടെ ഏറിയ പങ്കും ഭവനരഹിതരായി.

2024 ഡിസംബറിലെ ഒരു ആംനസ്റ്റി റിപ്പോര്‍ട്ട്, ഇസ്രായേല്‍ ഗാസയിലെ പലസ്തീനികള്‍ക്കെതിരെ വംശഹത്യ ചെയ്തുവെന്നായിരുന്നു. ഈ റിപ്പോര്‍ട്ട് ഇസ്രയേല്‍ നിഷേധിച്ചിരുന്നു. തങ്ങളുടെ യുദ്ധം ഹമാസിനെതിരെയാണെന്നും പലസ്തീനികള്‍ക്കെതിരെയല്ലെന്നും ഇസ്രായേല്‍ അന്നു വ്യക്തമാക്കിയിരുന്നു.

കണ്ടെത്തലിന്റെ പ്രസക്ത ഭാഗങ്ങള്‍

ഹമാസ് തങ്ങളുടെ യോദ്ധാക്കള്‍ സാധാരണക്കാരെ ലക്ഷ്യമിട്ട് കൊലപ്പെടുത്തുകയോ തട്ടിക്കൊണ്ടുപോവുകയോ പീഡിപ്പിക്കുകയോ ചെയ്തിട്ടില്ലെന്നും, പല സാധാരണക്കാരും ഇസ്രായേല്‍ തോക്കുകളാല്‍ കൊല്ലപ്പെട്ടവരാണെന്നും, സാധാരണക്കാരെ ബന്ദികളാക്കാന്‍ പദ്ധതിയിട്ടിരുന്നില്ലെന്നും അവകാശപ്പെടുന്നു. എന്നാല്‍, വിപുലമായ വീഡിയോ, സാക്ഷ്യമൊഴികള്‍, മറ്റ് തെളിവുകള്‍ എന്നിവയുടെ അടിസ്ഥാനത്തില്‍ ആംനസ്റ്റി ഇന്റര്‍നാഷണലിന്റെ കണ്ടെത്തല്‍ ഇങ്ങനെയാണ്:

1. ചില സാധാരണക്കാരെ ഇസ്രായേല്‍ സേനയുടെ വെടിവയ്പില്‍ കൊല്ലപ്പെട്ടിട്ടുണ്ടെങ്കിലും മരിച്ചവരില്‍ അധികവും പലസ്തീന്‍ യോദ്ധാക്കളാല്‍ കൊല്ലപ്പെട്ടവരാണ്.

2. ഗാസയിലേക്ക് കൊണ്ടുപോയ എല്ലാവരെയും നിയമവിരുദ്ധമായി ബന്ദികളാക്കി.
എല്ലാവരും മാനസിക പീഡനത്തിന് വിധേയരായി.

3. 2023 ഒക്ടോബര്‍ 7-ന് പിടികൂടിയ ചിലര്‍സൈനികരും സാധാരണക്കാരുംഇസ്രായേലിലോ ഗാസയിലോ വച്ച് ശാരീരികവും ലൈംഗികവുമായ പീഡനങ്ങള്‍ക്ക് വിധേയരായതിന് തെളിവുകളുണ്ട് (എന്നാല്‍ ലൈംഗിക പീഡനത്തിന്റെ വ്യാപ്തിയും തോതും നിര്‍ണയിക്കാന്‍ കഴിഞ്ഞിട്ടില്ല).

2023 ഒക്ടോബര്‍ 7-ലെ ആക്രമണങ്ങളില്‍ ഏകദേശം 1,200 പേര്‍ കൊല്ലപ്പെട്ടു. ഇതില്‍ 800-ല്‍ അധികം സാധാരണക്കാര്‍ (ഉള്‍പ്പെടുന്നു; അതില്‍ കുറഞ്ഞത് 36 കുട്ടികളും ഉണ്ട്. ഏകദേശം 300 ഇസ്രായേല്‍ സൈനികരും കൊല്ലപ്പെട്ടു. ഇരകളില്‍ ഭൂരിഭാഗവും ജൂത-ഇസ്രായേലികളാണ്; എന്നാല്‍ ഇസ്രായേല്‍ പൗരന്മാരായ ബെദൂയിന്‍ വിഭാഗക്കാരും വിദേശ തൊഴിലാളികളും വിദ്യാര്‍ഥികളും അഭയാര്‍ഥികളും ഉള്‍പ്പെടുന്നു.

4,000-ല്‍ അധികം പേര്‍ക്ക് പരിക്കേറ്റു. നൂറുകണക്കിന് വീടുകളും സിവിലിയന്‍ കെട്ടിടങ്ങളും തകര്‍ക്കപ്പെടുകയോ താമസയോഗ്യമല്ലാതാവുകയോ ചെയ്തു.
മറ്റൊരു 251 പേരെ (ഭൂരിഭാഗവും സാധാരണക്കാര്‍) 2023 ഒക്ടോബര്‍ 7-ന് ബലമായി ഗാസയിലേക്ക് കൊണ്ടുപോയി. ഇവരില്‍ 36 പേര്‍ പിടികൂടുമ്പോള്‍ തന്നെ മരിച്ചവരായിരുന്നു. ബാക്കിയുള്ളവര്‍ ആഴ്ചകളോളം, മാസങ്ങളോളം, ചിലര്‍ രണ്ട് വര്‍ഷത്തിലേറെയോളം തടവില്‍ കഴിഞ്ഞു.

ആക്രമിക്കപ്പെട്ട പ്രദേശങ്ങളിലെയും തെക്കന്‍ ഇസ്രായേലിലെ മറ്റിടങ്ങളിലെയും പതിനായിരക്കണക്കിന് നിവാസികള്‍ 2023 ഒക്ടോബര്‍ 7-ന് വീടുകളില്‍ നിന്ന് പലായനം ചെയ്തു. ആയിരക്കണക്കിന് പേര്‍ ഇപ്പോഴും താമസം മാറ്റപ്പെട്ട നിലയിലാണ്; പ്രിയപ്പെട്ടവരെയും വീടുകളെയും നഷ്ടപ്പെട്ടവര്‍ തുടര്‍ന്നുപോകുന്ന മാനസികാഘാതവും അനുഭവിക്കുന്നു.

ഠ അനിയന്ത്രിതമായ റോക്കറ്റ് ആക്രമണം

2023 ഒക്ടോബര്‍ 7-ന് അല്‍-ഖാസം ബ്രിഗേഡുകളും മറ്റ് പലസ്തീന്‍ സായുധ സംഘങ്ങളും ഇസ്രായേലിലെ ജനവാസ മേഖലകളിലേക്ക് ഏകദേശം 3,000 മുതല്‍ 5,000 വരെ റോക്കറ്റുകളും മോര്‍ട്ടാറുകളും തൊടുത്തുവിട്ടു. 2001 മുതല്‍ ആവര്‍ത്തിച്ചു വരുന്ന ഇത്തരം ആക്രമണങ്ങളുടെ പശ്ചാത്തലത്തില്‍ ഇതുവരെ കാണാത്ത തീവ്രതയുള്ള ആക്രമണമായിരുന്നു ഇത്.

ഇസ്രായേല്‍ സൈന്യത്തിന്റെ കണക്കനുസരിച്ച് ആദ്യ നാല് മണിക്കൂറിനുള്ളില്‍ തന്നെ 2,200-ലധികം റോക്കറ്റുകളും മോര്‍ട്ടാറുകളും വര്‍ഷിക്കപ്പെട്ടു. ഈ റോക്കറ്റ് ആക്രമണങ്ങളില്‍ കുറഞ്ഞത് 10 സാധാരണക്കാരെങ്കിലും കൊല്ലപ്പെട്ടു. ഇസ്രായേലിന്റെ എയര്‍ റെയ്ഡ് മുന്നറിയിപ്പ് സംവിധാനങ്ങളും പൊതു-സ്വകാര്യ ബോംബ് ഷെല്‍ട്ടറുകളും ഇല്ലായിരുന്നുവെങ്കില്‍ മരണസംഖ്യ വളരെയധികം ഉയരുമായിരുന്നു.

കൊല്ലപ്പെട്ടവരില്‍ ഏഴുപേര്‍ തെക്കന്‍ ഇസ്രായേലിലെ നെഗെവ്/നഖബ് മേഖലയില്‍ താമസിക്കുന്ന ബെദൂയിന്‍ പൗരന്മാരായിരുന്നു. ഈ പ്രദേശങ്ങളില്‍ എയര്‍ റെയ്ഡ് മുന്നറിയിപ്പ് സംവിധാനങ്ങളോ ബോംബ് ഷെല്‍ട്ടറുകളോ ഇല്ല; അടിയന്തര വൈദ്യസഹായവും വളരെ പരിമിതമാണ്. ഇവരില്‍ ആറുപേര്‍ 5 നും 15 നും ഇടയ്ക്ക് പ്രായമുള്ള കുട്ടികളായിരുന്നു.

പലസ്തീന്‍ സായുധ സംഘങ്ങള്‍ പിന്നീടും ഇസ്രായേലിലേക്ക് റോക്കറ്റുകള്‍ തൊടുത്തുകൊണ്ടിരുന്നു; എന്നാലും ഗാസയിലെ ഇസ്രായേല്‍ ആക്രമണം വര്‍ധിച്ചതോടെ ആവൃത്തി ക്രമേണ കുറഞ്ഞു. ഇസ്രായേല്‍ സൈന്യത്തിന്റെ കണക്കനുസരിച്ച് 2023 ഒക്ടോബര്‍ 7 മുതല്‍ 2024 മേയ് വരെ ഗാസയില്‍ നിന്ന് ഏകദേശം 12,500 റോക്കറ്റുകളും മോര്‍ട്ടാറുകളും ഇസ്രായേലിലേക്ക് വിക്ഷേപിക്കപ്പെട്ടു.

നോവാ മ്യൂസിക് ഫെസ്റ്റിവലിന് നേരെയുള്ള ആക്രമണം മുന്‍കൂട്ടി ആസൂത്രണം ചെയ്തതല്ല. ഹമാസിനോ മറ്റ് പലസ്തീന്‍ സായുധ സംഘങ്ങള്‍ക്കോ ആ സ്ഥലത്ത് ഒരു സംഗീതോത്സവം നടക്കുന്നുണ്ടെന്ന അറിവുണ്ടായിരുന്നില്ല. മറിച്ച്, മറ്റിടങ്ങളില്‍ ആക്രമണം നടത്താന്‍ പോകുന്ന വഴിക്ക് റോഡ് 232-ല്‍ വാഹനത്തില്‍ പോകവേ യോദ്ധാക്കള്‍ ആകസ്മികമായാണ് നോവാ ഫെസ്റ്റിവല്‍ സ്ഥലം കണ്ടെത്തിയത്.

അവര്‍ സാധാരണക്കാര്‍ നിറഞ്ഞ പ്രദേശങ്ങളിലേക്ക് വെടിയുതിര്‍ത്തു, ഭയന്നോടുന്ന സാധാരണക്കാരെ ലക്ഷ്യമിട്ട് വെടിവെച്ചു, ബോംബ് ഷെല്‍ട്ടറുകളിലും പൊതു ടോയ്ലറ്റുകളിലും കുഴികളിലും കാട്ടുമുള്ളുകള്‍ക്കിടയിലും ഒളിക്കാന്‍ ശ്രമിക്കുന്നവരെ തിരഞ്ഞുപിടിച്ച് കൊന്നു.

റൈഫിളുകളും മെഷിന്‍ ഗണ്ണുകളും ഗ്രനേഡുകളും ആര്‍പിജികളും കൈവശമുള്ള യോദ്ധാക്കള്‍ റോഡ് തടഞ്ഞു. ഫെസ്റ്റിവലില്‍ പങ്കെടുത്തവര്‍ ഓടി രക്ഷപ്പെടുന്നത് തടയാനും, സഹായത്തിനെത്തുന്ന സൈന്യത്തെയും സുരക്ഷാ സേനയെയും തടയാനുമായിരുന്നു ഇത്. റോഡ് 232-ന്റെ ഇരുവശത്തും മൃതദേഹങ്ങള്‍ വീണുകിടക്കുന്ന കാഴ്ചകള്‍, തോക്കുകള്‍ കൊണ്ട് തുളഞ്ഞ കാറുകള്‍, ഓടിരക്ഷപ്പെടാന്‍ ശ്രമിക്കുന്നവരെ വേട്ടയാടുന്ന ദൃശ്യങ്ങള്‍ തെളിവാണ്. ആംനസ്റ്റി ഇന്റര്‍നാഷണല്‍ പരിശോധിച്ച് ഉറപ്പുവരുത്തിയ സിസിടിവി, ഡാഷ്ബോര്‍ഡ് ക്യാമറ ദൃശ്യങ്ങള്‍രക്ഷപ്പെടാനുള്ള വഴികളില്‍ സാധാരണക്കാരെ മനഃപൂര്‍വം കൊലപ്പെടുത്തുന്നതിന്റെ തെളിവുകളാണ്.

പിടികൂടിയ ബന്ദികളെയും കൊല്ലപ്പെട്ടവരുടെ മൃതദേഹങ്ങളോടും ലൈംഗിക പീഡനം നടത്തി. 16 പേരുടെ ശാരീരിക പീഡനം രേഖപ്പെടുത്തി. പീഡകരില്‍ ഭൂരിഭാഗവും ഹമാസ് തീവ്രവാദികളും ചിലര്‍ അല്‍-ഖാസം ബ്രിഗേഡിലുള്ളവരുമാണെന്നു വീഡിയോ പരിശോധിച്ചതില്‍നിന്ന് വ്യക്തമായെന്നും റിപ്പോര്‍ട്ടില്‍ പറയുന്നു.