2020 ലെ പട്ടികയില് വോട്ടില്ലാത്ത വിനു വോട്ട് ചെയ്തെങ്കില് അത് കള്ളവോട്ടാണെന്നും ആക്ഷേപം ; നിയമരഹിതമായി വിഎം വിനുവിന് വോട്ട് അനുവദിച്ചാല് എതിര്ക്കുമെന്ന് കോഴിക്കോട് സിപിഐഎം
കോഴിക്കോട്: വോട്ടില്ലാത്ത ആളെ വെച്ചാണോ കോണ്ഗ്രസ് കോര്പ്പറേഷന് പിടിക്കാന് പോകുന്നതെന്നും വിനുവിന് നിയമപരമല്ലാതെ വോട്ട് അനുവദിച്ചാല് എതിര്ക്കുമെന്നും സിപിഐഎം. വിനു കഴിഞ്ഞ തദ്ദേശ തെരഞ്ഞെടുപ്പില് വോട്ട് ചെയ്തിട്ടില്ല. 2020-ലെ പട്ടിക യില് വിനുവിന്റെ പേരില്ല. വോട്ട് ചെയ്തെങ്കില് അത് കള്ള വോട്ടാണെന്നും അദ്ദേഹം ആരോപിച്ചു.
നിയമസഭാ തെരഞ്ഞെടുപ്പിലും തദ്ദേശ തെരഞ്ഞെടുപ്പിലും വെവ്വേറെ വോട്ടര് പട്ടിക ആണെന്ന കാര്യം അറിയാത്ത ആളാണോ വി എം വിനുവെന്ന് ചോദിച്ച് സിപിഐഎം കോഴിക്കോട് ജില്ലാ സെക്രട്ടറി എം മെഹബൂബ് ചോദിച്ചു. കോര്പ്പറേഷനിലേക്ക് മത്സരിക്കുന്ന യുഡിഎഫ് സ്ഥാനാര്ത്ഥി വി എം വിനുവിന്റെ വോട്ട് വെട്ടിയെന്ന കോണ്ഗ്രസ് വാദത്തെ പൊളിക്കുന്ന വിവരങ്ങള് പുറത്തുവന്നിരുന്നു.
2020ലെ വോട്ടെടുപ്പില് വി എം വിനുവിന് വോട്ട് ഉണ്ടായിരുന്നില്ലെന്നാണ് വിവരം. എന്നാല് 2020ലെ വോട്ടര് പട്ടികയില് പേരില്ലെന്ന് കണ്ടെത്തിയിട്ടും 2020ലെ തദ്ദേശ തെരഞ്ഞെടുപ്പില് വോട്ട് ചെയ്തിട്ടുണ്ടെന്ന വാദം ആവര്ത്തിക്കുകയാണ് വിനുവും കോണ്ഗ്രസും. കോര്പ്പറേഷനിലെ എട്ടാം ഡിവിഷനിലെ നാലാം നമ്പര് ബൂത്തില്നിന്ന് താന് വോട്ട് ചെയ്തിട്ടുണ്ടെന്നാണ് വിനു പറയുന്നത്. അന്നത്തെ കൗണ്സിലറായിരുന്ന കെ പി രാജേഷ് കുമാറിനൊപ്പം വന്നാണ് വോട്ട് ചെയ്തതെന്നും വിനു പറഞ്ഞിരുന്നു. ഇക്കാര്യം കോണ്ഗ്രസ് കൗണ്സിലര്മാര് സ്ഥിരീകരിക്കുന്നുണ്ട്.
എന്നാല് വോട്ടര് പട്ടികയില് പേരില്ലെങ്കില് പിന്നെ എങ്ങനെയാണ് വിനു വോട്ട് ചെയ്തത് എന്ന ചോദ്യമാണ് ഇപ്പോള് ഉയരുന്നത്. വിഷയത്തില് കോടതിയെ സമീപിക്കാനിരിക്കയാണ് വി എം വിനു. വോട്ടര്പട്ടികയില് തട്ടിപ്പ് നടന്നുവെന്ന് ആരോപിച്ച വിനു കോര്പ്പറേഷന് ഓഫീസിലെ തെരഞ്ഞെടുപ്പ് റിട്ടേണിങ് ഓഫീസര്ക്ക് പരാതി നല്കും. കരട് വോട്ടര് പട്ടികയോ അന്തിമ പട്ടികയോ പരിശോധിക്കാതെയാണോ സ്ഥാനാര്ത്ഥിയെ തീരുമാനിച്ചതെന്ന ചോദ്യം കോണ്ഗ്രസ് ജില്ലാ നേതൃത്വത്തിനെതിരെ ഉയരുന്നുണ്ട്.
