മുറി നിറയെ നോട്ടുകെട്ടുകളുടെ വലിയ ശേഖരം, ഏകദേശം അഞ്ചുകോടി രൂപയോളം ; 1.5 കിലോ ആഭരണങ്ങള്, 40 ലിറ്റര് ഇറക്കുമതി ചെയ്ത മദ്യം ; പഞ്ചാബ് ഉന്നത പോലീസ് ഉദ്യോഗസ്ഥന്റെ വീട്ടില് നിന്നും
ചണ്ഡീഗഡ്: അഴിമതി സംബന്ധമായ കേസില് നേരത്തെ അറസ്റ്റിലായ ഡിഐജിയുടെ വീട്ടില് നിന്നും കണ്ടെത്തിയത് അഞ്ചുകോടിരൂപയോളം. പഞ്ചാബ് പോലീസ് ഉന്നതന് ഹര്ചരണ് ഭുള്ളര് കൈറുമായി ബന്ധപ്പെട്ട കേസില് സിബിഐ നടത്തിയ തിരച്ചിലിലാ്ണ് കണ്ടെത്തല്. അഞ്ച് കോടി രൂപ പണവും ഏകദേശം 1.5 കിലോ തൂക്കമുള്ള ആഭരണങ്ങളും വിദേശമദ്യവും കണ്ടെടുത്തു.
ഫത്തേഗഡ് സാഹിബിലെ ഒരു സ്ക്രാപ്പ് ഡീലര് നല്കിയ പരാതിയെ തുടര്ന്നാണ് ഈ മുതിര്ന്ന പഞ്ചാബ് പോലീസ് ഉദ്യോഗസ്ഥന് പിടിയിലായത്. ഭുള്ളര് തന്നോട് കൈക്കൂലി ആവശ്യപ്പെട്ടുവെന്ന് ഇദ്ദേഹം ആരോപിച്ചിരുന്നു. മുന് പഞ്ചാബ് ഡയറക്ടര് ജനറല് ഓഫ് പോലീസ് എം.എസ്. ഭുള്ളറിന്റെ മകനാണ് ഹര്ചരണ് ഭുള്ളര്. പഞ്ചാബിലും ചണ്ഡീഗഢിലുമുള്ള ഭുള്ളറുമായി ബന്ധപ്പെട്ട വിവിധ സ്ഥലങ്ങളില് സിബിഐ നടത്തിയ തിരച്ചിലില് ഗണ്യമായ പണവും കുറ്റകരമായ വസ്തുക്കളും കണ്ടെത്തി.
ഇതില് ഏകദേശം 5 കോടി രൂപ, ഏകദേശം 1.5 കിലോ തൂക്കമുള്ള ആഭരണങ്ങള്, പഞ്ചാബിലെ സ്ഥാവര സ്വത്തുക്കളും ആസ്തികളും സംബന്ധിച്ച രേഖകള്, രണ്ട് ആഢംബര വാഹനങ്ങളുടെ (മെഴ്സിഡസ്, ഓഡി) താക്കോലുകള് എന്നിവ ഉള്പ്പെടുന്നു. ഈ മുതിര്ന്ന പഞ്ചാബ് പോലീസ് ഉദ്യോഗസ്ഥനുമായി ബന്ധപ്പെട്ട സ്ഥലങ്ങളില് നിന്ന് 22 ആഢംബര വാച്ചുകളും 40 ലിറ്റര് ഇറക്കുമതി ചെയ്ത മദ്യക്കുപ്പികളും അന്വേഷണ ഏജന്സി ഉദ്യോഗസ്ഥര് കണ്ടെടുത്തു.
‘ഒരു ഡബിള് ബാരല് തോക്ക്, ഒരു പിസ്റ്റള്, ഒരു റിവോള്വര്, ഒരു എയര്ഗണ്, എന്നിവയോടൊപ്പം വെടിക്കോപ്പുകളും കണ്ടെത്തി,’ പേര് വെളിപ്പെടുത്താന് ആഗ്രഹിക്കാത്ത ഒരു സിബിഐ ഉദ്യോഗസ്ഥന് പറഞ്ഞു. 2007-ലെ ഐപിഎസ് ഉദ്യോഗസ്ഥനായ ഭുള്ളര് രൂപര് റേഞ്ചിന്റെ ഡിഐജിയായി സേവനമനുഷ്ഠിക്കുകയായിരുന്നു. 2024 നവംബറിലാണ് അദ്ദേഹം ഈ സ്ഥാനത്ത് പ്രവേശിച്ചത്. മൊഹാലി, രൂപ്നഗര്, ഫത്തേഗഡ് സാഹിബ് എന്നീ ജില്ലകള് രൂപര് റേഞ്ചിന് കീഴിലാണ് വരുന്നത്.
ഒരു ബിസിനസുകാരന്റെ പരാതിയെ തുടര്ന്നാണ് ഉദ്യോഗസ്ഥന് അറസ്റ്റിലായത്. കൈക്കൂലി നല്കിയില്ലെങ്കില് തനിക്കെതിരെ കള്ളക്കേസ് എടുക്കുമെന്ന് ഡിഐജി ഭീഷണിപ്പെടുത്തിയതായി ബിസിനസുകാരന് അവകാശപ്പെട്ടു. പരാതിയെ തുടര്ന്ന് കെണിയൊരുക്കുകയും ഏകദേശം 5 ലക്ഷം രൂപ കൈക്കൂലി വാങ്ങുന്നതിനിടെ ഭുള്ളര് പിടിയിലാവുകയുമായിരുന്നു.
തന്റെ ഔദ്യോഗിക ജീവിതത്തില് പട്യാല റേഞ്ച് ഡിഐജി, വിജിലന്സ് ബ്യൂറോ ജോയിന്റ് ഡയറക്ടര്, ജഗ്രാവോണ്, മൊഹാലി, സംഗ്രൂര്, ഫത്തേഗഡ് സാഹിബ്, ഖന്ന, ഹോഷിയാര്പൂര്, ഗുരുദാസ്പൂര് എന്നിവിടങ്ങളില് സീനിയര് സൂപ്രണ്ട് ഓഫ് പോലീസ് എന്നീ നിലകളില് ഭുള്ളര് സേവനമനുഷ്ഠിച്ചിട്ടുണ്ട്. ശിരോമണി അകാലിദള് (എസ്എഡി) നേതാവ് ബിക്ക്രം സിംഗ് മജിതിയക്കെതിരെ 2021-ല് നടന്ന മയക്കുമരുന്ന് കേസ് അന്വേഷിച്ച പ്രത്യേക അന്വേഷണ സംഘത്തെയും അദ്ദേഹം നയിച്ചിട്ടുണ്ട്. കൂടാതെ, പഞ്ചാബ് സര്ക്കാരിന്റെ ‘യൂത്ത് നാഷിയാന് വിരുദ്ധ്’ എന്ന മയക്കുമരുന്ന് വിരുദ്ധ സംരംഭത്തിലും ഭുള്ളര് സജീവമായിരുന്നു.
